Runja mnohim gmejnam w Budyskim wokrjesu dyrbja tež w Kubšicach kóždy euro dwójce wobroćić, prjedy hač jón wudadźa. Najebać to chce gmejna lětsa wjacore projekty zwoprawdźić.

Kubšicy (UM/SN). Kaž hižo loni přewjedźe Budyski wokrjes tež lětsa zaso tójšto twarskich naprawow na dróhach Kubšiskeje gmejny. Na prěnim městnje steji wutwar wjesneje dróhi w Bošecach. Tam chcedźa dźěła na třećim a poslednim wotrězku mjez šulu a wuchodom wsy do směra na Kubšicy bórze zahajić. „Jako gmejna wobdźělimy so na kóštach za wotwódnjenje dróhi, za chódniki kaž tež za nadróžne wobswětlenje“, znazorni wjesnjanosta Olaf Reichert (njestronjan). Hač do kónca lěta maja dźěła na něhdźe kilometer dołhim puću přez wjes za­kónčene być.