Wotrow (JK/SN). Za wudźěłanje wuwa­ženeho hospodarskeho plana za tute lěto ma so gmejna Pančicy-Kukow chětro napinać. Lutowanje we wšelakich wobłukach by tomu přinošowało. Tak je wjesnjanosta Markus Kreuz (CDU) na wčerawšim posedźenju gmejnskeje rady w starej Wotrowskej šuli móžne redukowanje nócneho wobswětlenja předstajił. To by po planje wjesnjanosty gmejnje na lěto 3 800 eurow zalutowało. Tójšto gmejnskich radźićelow so za namjet wupraji, ­tola wjetšina z nich přećiwo tomu. Najwažniši argument bě nócna wěstota we wjeskach. Gmejna ma wobchadnu kaž tež ciwilnu wěstotu zaručić. Redukowanje wobswětlenja, wšojedne na kotre wašnje, tomu njewotpowěduje. Tak wostanje we wjeskach gmejny w nocach dale swětło a namjet redukowanja wot 23 hodź. do ranja 4.30 hodź. su najprjedy raz wotpokazali. Před lětami je gmejna wobswětlenje hižo na system LED přestajiła, z tym hižo tójšto lutuja. Přiwšěm by gmejna z redukowanjom časa wobswětlenja lětnje 14 000 kWh zalutowała.