Budyšin (PBe/SN). Budyske Dźiwadło ­na hrodźe bě minjene dny městnosć zetkanja Serbow z Hornjeje a Delnjeje Łužicy. Wobhospodar Radušanskeho ­słowjanskeho hrodźišća David Chmelík bě z małej delegaciju a z pisanej paletu wudźěłkow do města přijěł, zo by Hornjołužičanam hrodźišćo a jeho aktiwity bliže předstajił. „Wjeselu so, zo so słowjanske hrodźišćo prěni raz w swojich nowšich stawiznach w Budyšinje jako kulturnym centrumje Hornjeje Łužicy předstajeja. Přetož wone je hrodźišćo wšitkich łužiskich Serbow“, Chmelík při zahajenju rjekny. Hajko Kozel, kiž hrodźišćo jako poradźowar sobu podpěruje, składnosć wuži a wo dźěle Serbskeho sejma rozprawješe.

Radušenjo běchu někotre ze swojich wudźěłkow sobu přinjesli. Tak smědźachu wopytowarjo chłóšćenki njedaw­neho domjaceho swinjorězanja Grodkowskeho Gäblerec rěznistwa runje tak woptać kaž wosebite piwo, kotrež w Budyskej Frenclec piwarni warić dadźa.