Dojutrowna tradicija w srjedźnej Łužicy wopytowarjow přiwabiła

Nowa Łuka/Brězowka (JoS/SN). Něhdźe 600 wopytowarjow zličichu bołmončku na 30. wikach jutrownych jejkow w Nowej Łuce pola Wojerec. Tam njesteja jenož debjene wuměłske twórby w srjedźišću, ale tež zachowanje serbskej rěče a kultury. K zahajenju zarejowachu wjesne dźěći „Stup dale“ a „Hanamarju“. Při tym rozłoži Kirsten Bejmic jednotliwe dźěle serbskeje drasty. Přiklesk hosći na to pokaza, zo sej woni wjace tajkich informacijow wot fachowcow přeja.

Wiki jutrownych jejkow w Nowej Łuce mějachu přeco hižo swójbny charakter. Tam so w přiběracej měrje jejka debjacy dorost předstaja. Tak wobdźělichu so ­lětsa Kasperec swójba ze Židźinoho, Silke Raakowa ze synom a Sabina Młodźinkowa z Ćiska ze swojimaj wnučkomaj. Dohromady 20 debjerjow bě do Noweje ­Łuki přišło. Přezjedni sej woni wšitcy ­běchu, zo chcedźa tež klětu zaso rjanu tradiciju dale wjesć a swoje ručne dźěło na wikach prezentować.