Lessingowe město hotuje so na 800. róčnicu prěnjeho naspomnjenja

Kamjenc (SN/MG). Měsac hišće, potom zahaja w Kamjencu wulki swjedźenski kónc tydźenja składnostnje 800. narodnin města. Wobšěrny program planuja na dohromady štyrjoch jewišćach, rozłoži nawoda wotrjada za marketing Dawid Kliman na nowinskej konferency wčera, wutoru, w běrowje wyšeho měšćanosty Rolanda Dantza (njestronjan). Nic pak jenož jewišća, ale cyłe město budźe wot 16. do 18. meje wulke swjedźenišćo. Dohromady 150 000 kwadratnych metrow wužiwaja za najwšelakoriše temowe mile a atrakcije.