Wojerecy (KD/SN). Měr je to najwažniše za wšitkich ludźi na swěće. To wědźeše čěski komponist Antonín Dvořák w 19. lětstotku runje tak kaž bohužel jenož jara mała ličba wopytowarjow koncerta Serbskeho ludoweho ansambla minjeny pjatk we Wojerowskej Janskej cyrkwi. Tam zanjesechu spěwarki a spěwarjo chóra SLA zhromadnje z młodym organistom Janom Kralom pod nawodom ­dirigenta Tvrtka Karlovića Dvořákowu misu w D-dur op. 86 „Lužanská“. Dvořák bě tónle twórbu na próstwu přećela k poswjećenju kapałki w čěskich Lužanach skomponował, kotrejež wulkosć wob­sadku postaješe. Raz cunje a raz sylne melodije a z empory klinčacy spěw chóra powědachu łaćonsce stawiznu ćerpjenja Jězusa. Zdobom zwuraznjeja wone próstwu Dvořáka wo měr.