Rozdźěl we wudawkach
Wiesbaden. Zjawne wysoke šule wudawaja nimale dwójce telko pjenjez za jednotliweho studenta kaž priwatne. Pola priwatnych wysokich šulow je to 5 920, pola zjawnych nimale 11 000 eurow. Ličbje poćahujetej so na lěto 2013, kaž Statistiski zwjazkowy zarjad we Wiesbadenje zdźěla. Jako přičinu mjenuja statistikarjo wuběr wučbnych předmjetow.
Rozbuchnjenje w superwikach
Drježdźany. Woheń a rozbuchnjenje stej w Drježdźanach nakupowanske wiki zničiłoj. Krótko po přichadźe wuchowanskich mocow wohenja dla bě wčera wječor we wobchodźe k eksploziji dóšło, kaž wohnjowa wobora dźensa informowaše. Bydlenski a wobchodowy dom, w kotrymž su wegane superwiki, dyrbjachu ewakuować. Dwaceći wobydlerjow je potrjechenych, nichtó so njezrani.
„Safari“ w Rudnych horinach
Mjenje plastikowych titow
Berlin. Wikowanje měło přetrjebu plastikowych titow čujomnje pomjeńšić. Zo by so tónle zaměr docpěł, hrozy zwjazkowa ministerka za wobswět Barbara Hendricks (SPD) z krućišimi postajenjemi. „Samozawjazka wo kóždužkuli płaćiznu ze mnu žanoho njebudźe. Porjadniskoprawniske rjadowanje sej tohodla wotewrjenje wobchowam“, praji ministerka w dźensnišim wudaću nowiny Bild.
SPD z nowym mustwom
Budyšin. Za noweho předsydu Budyskeho městneho towarstwa SPD su minjenu srjedu na sobustawskej zhromadźiznje inženjera dr. Martina Schneidera wuzwolili. Jeho naměstnik je Eckart Riechmann, pokładnik Marko Kuring. Tak sta so změna generacijow na čole Budyskich socialdemokratow. Čoło dotalneho předsydstwa bě po 15 lětach wotstupiło.
Jantarowa komora w Čěskej?
Darmotny WLAN w chorowni
Kamjenc. Pacienća a wopytowarjo Kamjenskeje chorownje maltezow Swj. Jana móža wot tohole tydźenja na wšitkich stacijach darmotnje WLAN wužiwać. Štóž chce so z laptopom, smartphonom a tabletom do interneta podać, móže sej w přijimarni chorownje indiwiduelny přistupny code wustajić dać. Přistup je na čas přebywanja w chorowni wobmjezowany, chorownja zdźěli.
Połojca ludźi wo swjatk njerodźi
Berlin. Dźeń swj. Walentina (14.02.) ludnosć Němskeje pači. Nimale kóždy druhi (47,4 proc.) ma ju za „předawansku akciju wikowarjow kwětkow“, kaž institut za přeslědźenje wikow GfK dźensa zdźěli. Zdobom zhladuje nimale telko ludźi (47 proc.) pozitiwnje na swjedźeń lubowacych a swojeho partnera wobdaruje. Prašeli běchu so 1 940 žonow a muži.
Pruwuja superdołhi bus
Rekordne lěto za turizm
Wiesbaden. Rozmach turizma w Němskej dale přiběra. Lońše lěto je hladajo na ličbu přenocowanjow w Němskej nowy, mjeztym šěsty rekord, wunjesło. Zwjazkowy statistiski zarjad je 436,4 miliony přenocowanjow pućowacych z tu- a wukraja zličił. To je tři procenty wjace hač 2014. Ličba wukrajnych hosći zwyši so wo pjeć procentow na 79,7 milionow.
„Swětłowy smog“ wobmjezować
Frýdlant. Wobydlerjo Frýdlantskeho wuběžka w sewjernej Čěskej protestuja přećiwo hoberskim škleńčnikam w pólskej Bogatyniji. Tamne škleńčane rostlinarnje dźě w nocy tak mócnje swěća kaž město ze sto tysac wobydlerjemi. Nócne swětło myli wuraznje ludźi a wobwliwuje wobswět. Najebać protesty pak pólska firma Citronex planuje škleńčnikowu přestrjeń hišće dźesać króć powjetšić.
Pola Amazon zaso stawkuja
Rozprawa wuběrka předleži
Wojerecy. Nachwilny poradźowacy wuběrk Piwarska haska 1 Wojerowskeje měšćanskeje rady je na swojim wčerawšim posedźenju kónčnu rozprawu swojeho dźěła zestajił. Dokument chcedźa měšćanskej radźe na jeje posedźenju w měrcu předpołožić. Wuběrk bě so z přičinami zaběrał, čehodla bě saněrowanje wobydlerskeho centruma w měsće 700 000 eurow dróše hač planowane.
Natwarja wjelči centrum
Berlin. Pjatnaće lět po nawróće wjelkow do Němskeje je zwjazkowe ministerstwo za wobswět skupinje wědomostnikow nadawk dało, wjelči poradźowanski centrum natwarić. W nim chcedźa prěni króć scyła informacije wo wjelkach w Němskej zběrać a zamołwitym w zwjazkowych krajach spřistupnić, zwjazkowa ministerka za wobswět Barbara Hendricks (SPD) dźensa připowědźi.
Bartsch: CSU won z knježerstwa
Dźěłowe městna zachować
Praha. Čěski energijowy koncern ČEZ je sej wěsty, zo móhł po móžnym přewzaću brunicoweje wotnožki koncerna Vattenfall 8 000 dźěłowych městnow we Łužicy zachować. „Njeplanujemy rewoluciju“, rjekny šef koncerna Daniel Beneš powěsćerni dpa. „Brunicowe jamy su derje wobstarane. Njetrjebamy čěski personal město němskeho zasadźić.“
Karnewal wotprajeny
Dieburg. Wjedro je karnewalistam tež dźensa, póstnisku wutoru, swjedźeń skazyło. Kaž policija zdźěli, dyrbjachu w Hessenskej wjacore zarjadowanja hrožaceho njewjedra dla wotprajić. Tež w porynsko-pfalcskim Ramsteinje-Miesenbachu přećah norow wupadny. Wobdźělnicy běchu město toho do měšćanskeje hale na swjedźeń prošeni.
Wobchad w Praze blokowali
Interview z Benom Budarjom
Lipsk. W januarskim wudaću informaciskeho łopjena Sakskeje literarneje rady „angezettelt“ nadeńdu čitarjo dwustronski interview z Benom Budarjom. W rozmołwje z dr. Sibillu Tröml praji serbski spisowaćel mjez druhim, zo je nuznje trjeba, wědu wo rěči, stawiznach a literaturje Serbow němskemu rěčnemu rumej bóle spřistupnjeć.
Muflony po puću do Bołharskeje
Česká Lípa. Stadło 34 muflonow z přirodoweho parka Vřísek pola Českeje Lípy je tuchwilu na nakładnych awtach po puću do Bołharskeje. Tam chcedźa je w hońtwjerskim rewěrje pola města Laki w Rodopach zaměstnić. Po zdźělenju firmy Lesy ČR jedna so wo najwjetšu předań tuteje zwěrjaceje družiny w minjenych 50 lětach. W Čěskej je třećina cyłkowneje populacije muflonow žiwa.
Pruwowarjo w Pólskej
Wjetšina žane nory
Budyšin. Wjetšina čitarjow Serbskich Nowin žane nory njejsu. Jeničce 26 procentow je prašenje, hač wobdźěleja so na wjerškach pjateho počasa, z „haj“ wotmołwiło. Nimale 70 procentow so njewobdźěla, pjeć procentow je njerozsudźenych. Mnozy čitarjo pak su zawěsće kostimy paslili a njemóžachu wothłosować. Nowe naprašowanje namakaće pod www.serbske-nowiny.de.
Kniha wo prezidentach wušła
Praha. Pod titlom „Čěskosłowakscy prezidenća“ je w Praskim nakładnistwje Paseka wušła kniha, wobjednawaca wšitke dźewjeć hłowow Čěskosłowakskeje wot Tomáša G. Masaryka hač k Václavej Havelej. Žiwjenjoběhi pochadźeja z pjera wuznamnych čěskich stawiznarjow. Skutkowanje prezidentow socialistiskeho časa dodnić njebě – hladajo na njepřistupnosć sowjetskich archiwow – móžno.
Wočakuja nalětnje wjedro
Prěnje serbske blido wuspěšne
Lipsk. Prěnje serbske blido w měsće nad Plesnu bě wuspěch. 17 ludźi je so wčera na nim wobdźěliło, zdźěli sobuiniciatorka Bibiana Bartec Serbskemu rozhłosej. Přichodne zetkanje Serbow w Lipsku planuja nalěto přewjesć. Zetkać chcyli so njedźelu popołdnju, tak maja předewšěm młode serbske swójby składnosć, so z dźěćimi wobdźělić.
Hdyž žanych pjenjez wjac njeje
Drježdźany. Drježdźanske zarjadniske sudnistwo, ke kotremuž słušatej Budyski a Zhorjelski wokrjes, je loni 1 100 priwatnych a 550 firmowych insolwencow zahajiło. Wjac hač dwójce telko firmow je sudnistwu zdźěliło, zo njejsu wjace kmane płaćić. Insolwencu přizjewichu přewažnje awtowe domy, twarske zawody a předźěłanske firmy.
Njespokojnosć přiběra
Gripa zaso knježi
Budyšin. We wokrjesu Budyšin zličichu wot spočatka lěta 36 padow schorjenja na gripu. To je jasny rozrost, ale typiske wuwiće za počas, praji rěčnik Budyskeho krajnoradneho zarjada. Potrjecheni su ludźo wšitkich starobow. Na zbožo njejsu cyle ćežke pady dotal njeběchu. Strowotniski zarjad pak poruča škitne šćěpjenje, seruma je dosć. Ćěło trjeba dwaj tydźenjej, zo by škit wutworiło.
Žane kite-surfowanje
Zhorjelc. Kite-surfowanje na Bartonjanskim (Berzdorf) jězoru njeje dale dowolene. Zhorjelski krajnoradny zarjad zakaz z tym wobkruća, zo su kupanscy hosćo a wodosportowcy wohroženi. Před lětomaj bě so kite-surfowar runje tak smjerći wuwinył. Jeho parašut bě so w bliskim milinowodźe zapopadnył.
Čěscy zastajency swobodni