Krótkopowěsće (19.05.23)
Zahraja zakónčacy koncert
Budyšin. Dźensa w 19 hodź. zahraja studenća z Europy kaž tež Aziskeje zhromadnje z orchestrom Serbskeho ludoweho ansambla (SLA) na tamnišej žurli zakónčacy koncert festiwala „TŘIANGEL“. Hižo cyły tydźeń su woni swoje hraće na huslach, brači abo violoncellu pod nawodom wuznamnych docentow w mišterskej akademiji wukmanili. Tuta wotmě so lětsa prěni raz w Budyšinje.
Wubědźowanje idejow
Budyšin. „Rěč zwjazuje. Rěc zwězujo. Sorbisch verbindet – 2023“ rěka lětuše wubědźowanje idejow Załožby za serbski lud. Wot 1. junija do 25. julija móža so towarstwa, komuny, gmejny, institucije, priwatne wosoby a druzy nošerjo z tu- a wukraja wo mytowanske pjenjezy mjez 1 000 a 10 000 eurami požadać. Załožba pyta za wosebje kreatiwnymi a inowatiwnymi naprawami, kotrež temje wubědźowanja wotpowěduja.
Kyrkonoška „dožiwjenska karta“
Krótkopowěsće (17.05.23)
Pytanje wulětow přestorčili
Budyšin. Marketingowa towaršnosć Hornja Łužica-Delnja Šleska dyrbi zahajenje onlinoweje pytanskeje funkcije FAMIL-O-MAT techniskich ćežow dla wot 1. junija na 7. julija přestorčić. Z funkciju móža zajimcy za wólnočasnymi poskitkami w Hornjej Łužicy pytać, zo móhli swoje wulěty ze swójbu optimalnje planować. W testowej fazy bě wjac hač 300 poskitkow cyłkownje 260 poskićerjow na platformje wopisane.
Spěwy popoweje opery online
Budyšin. Wšitke spěwy předlońšeje serbskeje popoweje opery „Carpe Noctem – njeskónčna nóc“ su wot nětka na wšelkich streamingowych platformach přistupne. Cyłkownje třinaće spěwow namakaće mjez druhim na „Spotify“. Projekt nasta w kooperaciji hudźbneho kolektiwa „Trio a Kumple“ z młodźinskim towarstwom „Pawk z.t.“.
Orlando Bloom a čěske piwo
Krótkopowěsće (16.05.23)
Serwisowy běrow zaručeny
Wojerecy. Sakski nutřkowny minister Armin Schuster (CDU) je wčera we Wojerecach zdźělenku wo dalšim spěchowanju serwisoweho běrowa za serbšćinu w komunalnych naležnosćach hač do kónca lěta 2024 nošerjej Domowinje přepodał. Město Kulow je 3 500 eurow za restawrowanje wobškodźenych swjatych křižow dóstał.
Serbska filmowa koordinatorka
Choćebuz. Filmowča Angela Šusterec je koordinatorka za Syć serbskich filmowcow. Wot 10. meje znajerka sceny hižo w tutym zastojnstwje skutkuje. Jeje hłowne nadawki su, so wo syć filmowcow a jich poradźowanje starać. Dale chce wona zetkanja dźěći organizować, ze Serbskim institutom přehlad hižo nawjerćanych filmow zestajić a webstronu syće znowa wuhotować kaž tež wobstajnje aktualizować.
Sudetscy Němcy a Čěska
Krótkopowěsće (15.05.23)
Kandidat AfD 47,6 procentow
Beeskow. Dotalny měšćanosta wokrjesneho města Beeskow Frank Steffen (SPD) je so w druhim kole wólbow krajneho rady wokrjesa Wódra-Sprjewja wusko z 52,4 procentami přećiwo kandidatej AfD Rainerej Galla (47,6 procentow) přesadźił. Po wólbach Steffen CDU a Swobodnych wolerjow pobrachowaceje podpěry dla kritizowaše. W prěnim kole běše Galla na prěnim městnje kandidatow.
Na zahrodźe koncertowali
Pančicy-Kukow. Před wulkej syłu připosłucharjow je chór Lipa wčera w klóšterskej zahrodźe w Pančicach-Kukowje nalětni koncert wuhotował. Cyłk pod nawodom Jadwigi Kaulfürstoweje zanjese znate a woblubowane štučki, tež jedna premjera je zaklinčała. Wjacore spěwy přednjese dorostowa skupina Lipki. Wosebita chłóšćenka bě šulerska kapała Šwintuchi. Wjace wo tym jutře.
Njeskutki wotkryli
Krótkopowěsće (12.05.23)
Město přewza kupnicu
Choćebuz. Město Choćebuz přewza ležownosć a twarjenje kupnicy Galeria Kaufhof, kotrejž koncern Galeria Karstadt Kaufhof swojich hospodarskich ćežow dla w juniju spušći. Wjetšina měšćanskich zapósłancow běše so srjedu wječor za to wuprajiła, zdźěli měšćanski rěčnik Jan Gloßmann. Cyłkownje 15 milionow eurow město za to inwestuje. Cil je, žiwe nutřkowne město zachować.
Woswjeća róčnicu
Zhorjelc. Z wobydlerskim swjedźenjom swjećitej susodnej měsće Zhorjelc a Zgorzelec jutře róčnicu 25. róčnicu wobstaća partnerstwa. Prěni raz zhromadnje wustupiłoj stej měsće 5. meje 1998 we wobłuku proklamacije Europske město. Kaž Zhorjelski měšćanski zarjad zdźěli, bě to zakład za zhromadne dźěło. Wjac hač 70 towarstwow, institucijow a wuměłskich skupinow na swjedźenju wustupi.
Minister najlěpšich počesćił
Krótkopowěsće (11.05.23)
Z naslědnistwom so zaběrali
Radeberg. Mjeztym hižo 12. króć zarjadowaše hospodarske spěchowanje Drježdźanskeje industrijneje a wikowanskeje komory wčera dźeń předewzaćelkow, na kotrymž wobdźělichu so tež žony z Budyskeho wokrjesa. W Radebergu zaběrachu so mějićelki firmy mjez druhim z naslědnistwom. Dale wužiwachu składnosć so mjez sobu wuměnjeć.
Dźiwadłowe dny zahajili
Budyšin. 24. dny serbskeho dźěćaceho dźiwadła su so dźensa w Budyskim dźiwadle na hrodźe zahajili. Hač do jutřišeho dožiwja dźiwadłowe skupiny serbskich zakładnych šulow a hortow zajimawe dźěłarnički pod profesionelnym nawodom. Wuslědki tutych jutře předstaja. Wosebity wjeršk lětušich dnjow budźe drje předstajenje dźiwadłoweho krucha „Ptaškowa swjaźba“ horta Žylowskeje zakładneje šule.
Krabat klětu w Choćebuzu
Krótkopowěsće (10.05.23)
Na festiwalu spěwała
Halle. Delnjoserbska spěwarka Lena Hauptmannojc je wčera wječor na 18. festiwalu Woman in Jazz w Halle nad Solawu wustupiła a tež wjacore delnjoserbske spěwy zanjesła. Studowana jazz- a pop-spěwarka je loni na samsnym festiwalu loni dobyła 2. myto publikuma mjez 22 wobdźělnikami z cyłeje Europy a z tym składnosć tam lětsa koncertować.
Seminar MENS klětu we Łužicy
Budyšin. Serbske młodźinske towarstwo Pawk wuhotuje klětuši jutrowny seminar MENS, Młodźiny europskich narodnych skupin. To su sobustawske organizacije na swojej wurjadnej hłownej zhromadźiznje kónc tydźenja jednohłósnje wobzamknyli. Tak witaja młodźi Serbja na 60 młodostnych z cyłeje Europy do sprjewineho města. Nimo dźěłarničkow k mjeńšinowym temam je tež mały wulět po Łužicy předwidźany.
Kniha pohonja kreatiwni być
Krótkopowěsće (09.05.23)
Steinmeier „knježi“ we Łužicy
Zły Komorow. Sedmy raz poda so zwjazkowy prezident Frank-Walter Steinmeier ze swojim hamtskim sydłom na tři dny do republiki – dźensa do Złeho Komorowa. Chce tu wosebje zhonić, kak ludźo we Łužicy z kóncom wudobywanja brunicy a z tym zwisowacej změnu strukturow wobchadźeja. Tež wo zaměstnjenju ćěkancow chce porěčeć.
Mjezykulturelnej tydźenjej
Wojerecy. „Nowe rumy“ je hesło lětušeju mjezykulturelneju tydźenjow. Wot 16. septembra do 1. oktobra wotměja so w komunach Budyskeho wokrjesa mnohe zarjadowanja. Nowe rumy maja so při zetkanjach, mjezsobnym zeznaću a zhromadnych aktiwitach wotkryć. Wo spěchowanje móža so zajimcy nětko w interneće pod požadać.
Lěkarjo dźensa stawkowali
Krótkopowěsće (08.05.23)
Insolwenca přizjewjena
Niska. Za Nišćansku wagonownju je słowakska mějićelka Tatrawagonka pola Drježdźanskeho hamtskeho sudnistwa 4. meje insolwencu přizjewiła. „To je hórke, móže pak tež šansa być“, rěka z IG metal wuchodneje Sakskeje. Po zawodnej zhromadźiznje namołwja dźěłarnistwo jutře na 26. pominansku stražu před zawodnymi wrotami. Zaměr wostanje, poslednjeho twarca nakładnych wagonow w Němskej do přichoda wjesć.
Kubłanska jězba do Smolinow
Budyšin. 27 čłonow-seniorow Serbskeho šulskeho towarstwa, jich partnerojo a přećeljo towarstwa su so wčera na kubłansku wuprawu do Smolinow podało. Z přewodom sobudźěłaćerki SŠT Moniki Deleńkoweje wotkryja sej města kaž Wernigerode, Goslar, Blankenburg a Halberstadt. Mjez wosebitosćemi, kotrež wopytaja, je zawěra Rappbodetal a njedaloki najdlěši powjazowy wisaty móst swěta.
Partnerstwo skrućili
Krótkopowěsće (05.05.23)
Přirada załožby so schadźowała
Wojerecy. Zaručenje wučby serbšćiny na šulach běše dźensa tema na posedźenju parlamentariskeje přirady Załožby za serbski lud pod nawodom Marka Šimana ze sakskim kultusowym ministrom Christianom Piwarzom (wobaj CDU) a županku župy „Handrij Zejler“, Gabrielu Linakowej, w domje Domowiny. Linakowa sej žadaše direktne spěchowanje šulskich projektow ze stron ministerstwa.
Biografiju předstajił
Neubrandenburg/Berlin. Składnostnje 90. posmjertnych narodnin tež we Łužicy znateje spisowaćelki Brigitte Reimann wuńdźe lětsa w juliju pod titulom „Žedźu so za žiwjenjom – Brigitte Reimann“ prěnja biografija wo njej. Awtor Carsten Gansel je knihu we wobłuku „Knižneho nalěća 2023“ wčera wječor w Neubrandenburgu předstajił, piše powěsćernja dpa. Gansel je literarny wědomostnik a sobustaw němskeho PEN-centruma.
Wětřikowy sćežor poswjećili
