Pawk z nowym předsydu
Budyšin. Radworčan Lukaš Pěčak je nowy předsyda młodźinskeho towarstwa Pawk. Jeho su čłonojo sobotu na hłownej wólbnej zhromadźiznje wolili. Wón naslěduje Jakuba Wowčerja, kotryž je towarstwo štyri lět nawjedował. Verena Suchec je nowa pokładnica, kotraž naslěduje Fabiana Šěraka. Klětušej wjerškaj stej Jutrowny seminar MENS w Budyšinje a 30lětne wobstaće towarstwa.
Dóstanu wjace mzdy
Choćebuz. Koncern Łužiska energija a milinarnje (LEAG) płaći swojim sobudźěłaćerjam wot 1. decembra wjace mzdy. Tole zdźěli zawčerawšim industrijne dźěłarnistwo IGBCE. Tak dóstanu přistajeni předewzaća sydom procentow wjace, znajmjeńša dyrbjało to 240 eurow być. Nimo toho dóstanu čłonojo IGBCE w oktobrje přiražku we wobjimje 6 000 eurow.
Ochranowske sydlišća do lisćiny
Dalše zetkanje phōnē
Santiago de Compostela. Intendant Němsko-Serbskeho ludoweho dźiwadła, Lutz Hillmann, a zamołwita za serbske dźiwadło, Madleńka Šołčic, podaštaj so dźensa na dalšu konferencu w zwisku z projektom phōnē w Španiskej. W galiciskim měsće Santiago de Compostela wuměnjeja sej zamołwići a režiserojo mjeńšinoweho dźiwadła.
Přikrótši jězbny plan za liniju S8
Kamjenc. Zastupjerjo Němskeje železnicy kaž tež wobchadneho zwjazka VVO su so srjedu w Kamjencu z měšćanskimi radźićelemi zetkali, zo bychu wo rozrisanju kopicy ćežow na železniskej čarje mjez Kamjencom a Drježdźanami (S8) diskutowali. Z nowym jězbnym planom z jasnje mjenje zwiskami wot oktobra sem chce Němska železnica problem rozrisać.
Dilema wokoło wulkopósłanca
Přidatne srědki komunam
Drježdźany. Sakski krajny sejm je wčera puć runał na dobro wokrjesow a komunow, kotrež su wot bytostneho zwyšenja kóštow potrjechene. Wjetšina zapósłancow je trěbnu změnu zakonjow za komunalne financne wurunanje schwaliła. Tak přewostaji Sakska wokrjesam a komunam hišće lětsa nimale 133 milionow eurow za jich nadawki w zwisku z wójnu Ruskeje w Ukrainje.
Wotchadna jězba do Prahi
Praha. Šulerjo 10. lětnika Worklečanskeje wyšeje šule „Michał Hórnik“ přebywaja z rjadowniskej wučerku Katku Bukowej tuchwilu w Praze. Na zakónčacej jězbje su sej mjez druhim Hradčany z cyrkwju swj. Wita wobhladali kaž tež na Karlowym mosće a při Praskim Jězusdźěćatku pobyli. Dźensa je jich Danko Handrik do studija ARD w Praze přeprosył.
Historiska wěža na předań
17 namjetow mytowanych
Budyšin. W lětušim wubědźowanju idejow „Rěč zwjazuje. Rěc zwězujo. Sorbisch verbindet“ je jury 17 namjetow mytowała. Kaž Załožba za serbski lud wčera zdźěli, je hač do 25. julija 50 požadanjow dóšło. Mytowanske zarjadowanje budźe 17. nowembra w Budyšinje. Tam zhonja wuznamjenjeni tež wo wysokosći swojeho myta. Přehlad mytowanych namakaće pod .
Wuwzaćna dowolnosć móžna
Drježdźany. Sakska wuwólnja dotalny zakaz w boju přećiwo afriskej swinjacej mrětwje. W postajenym zawrjenym pasmje II, to je najbóle wohrožena kónčina, móža plahowarjo pod wěstymi wuměnjenjemi wuwzaćnu dowolnosć dóstać, zo bychu domjace swinje pod hołym njebjom plahowali. Krajna direkcija Sakskeje je za to płaćiwy powšitkowny wukaz wotpowědnje změniła.
Chmjelarstwo w zapisu UNESCO
Znowa wo elektrifikaciji rěčeli
Berlin. Wospjet zetkachu so zastupjerjo łužiskeje politiki wčera w zwjazkowym ministerstwje za wobchad, zo bychu wo dalšim postupowanju při elektrifikaciji čary Drježdźany–Zhorjelc wuradźowali. Konkretne wuslědki drje přeco hišće njepředleža, ale politikarjo, mjez nimi Budyski krajny rada Udo Wićaz (CDU) , su so na dalši časowy plan dojednali. Z rozsudom liča w nalěću 2024.
Z čahom po cyłej Europje
Drježdźany. Druhi raz wulosuje sakske ministerstwo za Europu lětsa tikety za tak mjenowany „Program Interrail“ pod titulom #saxorail. Z tutymi zmóžnja młodym dorosćenym w starobje 18 do 27 lět sydom dnjow dołho bjezpłatnje na wosebitych čarach po cyłej Europje jězdźić. W horncu maja lětsa 700 tiketow, wo kotrež móža so zajimcy online hišće hač do 15. oktobra požadać.
Syły Čechow na Dnjach NATO
Přećiwo wuswojenju lěsa
Freiberg. Sakski wyši hórnistwowy zarjad w Freibergu je dźensa wo wuswojenju priwatneho lěsa blisko Rownoho za Wochožansku jamu jednało. Mějićeljo a Zelena liga jako najenk přećiwjataj so předani woneje połhektarskeje přestrjenje LEAG. Wažny argument přećiwnikow je, zo wot 2026 žadyn wobkrućeny ramikowy zawodny plan jako zakład móžneho wuswojenja njepředleži.
Hornjołužiska firma w Gdańsku
Drježdźany/Gdańsk. Sakski know-how na kolije wjazanu mobilitu nastupajo steji w srjedźišću mjezynarodnych wikow železniskeje techniki TRAKO wot jutřišeho hač do pjatka w pólskim Gdańsku. Na zhromadnym stejnišću z Clusterom za železnisku techniku Rail.S a z Hospodarskim spěchowanjom Sakskeje je mjez dźesać předewzaćemi tež firma Lakowa z Wjelećina zastupjena.
Tarifowy konflikt so přiwótřa
Sprjewiny móst njepodpěruje
Budyšin. Budyski wyši měšćanosta Karsten Vogt (CDU) nochce hladajo na jasny wotum ludnosće přećiwo natwarej noweho Sprjewineho mosta projekt w nětčišej formje podpěrować. „Dwě třećinje přećiwnych hłosow wot dohromady 7 000 wobdźělnikow na wšitkich naprašowanjach njemóžu prosće ignorować“, wón praji. Poziciju je měšćanskej radźe zdźělił, kiž w oktobrje wo projekće wothłosuje.
Nowej ediciji z LND
Budyšin. Knižna Protyka 2024 a Wšědne hesła Ochranowskeje bratrowskeje wosady, kotrež su w serbskej rěči zhromadny wudźěłk ze Serbskim ewangelskim towarstwom, stej jako nowej ediciji w Ludowym nakładnistwje Domowina (LND) wušłoj. W srjedźišću protyki steja křižerjo, knižna premjera budźe 19. oktobra w Starym dwórnišću w Radworju.
Jendźelšćinu jako prěnju cuzu rěč
W jědnaćich šmóratko drišćało
Budyšin. Proboweho alarma po cyłej Němskej dla su dźensa na warnowanskim dnju tež we Łužicy šmóratka drišćeli a sireny wuli. Warnował je Zwjazkowy zarjad za škit ludnosće a pomoc w katastrofach w 11 hodź. ludnosć přez system Cell Broadcast. Probowy alarm tohorunja po rozhłosowych a telewizijnych sćelakach kaž tež měšćanskich informaciskich taflach rozšěrjachu.
Spěchowanje přepodał
Wojerecy. Dohromady nimale 15 milionow eurow spěchowanja ze srědkow za změnu strukturow je sakski minister za regionalne wuwiće Thomas Schmidt (CDU) wčera we Wojerecach přepodał. Z tutych nałožuja 8,2 milionaj za projekt přetwara a rozšěrjenja něhdyšeje młodźinskeje klubownje na nowy Nowoměšćanski forum. Dalši projekt: „Komunalna energijowa centrala“, dóstanje 6,5 milionow eurow.
Serbšćinarjo so zetkaja
Hawarija ze sćěhami
Janšojcy. Po hawariji w Janšojskej milinarni je wobhospodarjer Łužiska energija a milinarnje (LEAG) dwaj blokaj ze syće wotpinało, zdźěli wčera nowinska rěčnica koncerna Kathi Gerstner w Choćebuzu. Hižo w nocy wot minjeneje soboty do njedźele je ćežka konstrukcija na kolije padnyła. Tohodla njemóža tam hižo popjeł z ćahami wotwozyć.
Wužiwanje Z-symbola po prawje
Budyšin. Budyska wotnožka krajneho sudnistwa w Zhorjelcu je zasudźenje 36lětneje Wjelećanki, kotraž běše na póndźelnišej demonstraciji dwaj Z-symbolaj pokazowała, zaso zběhnyła. Hačrunjež steji symbol za nadpad ruskeho wójska na Ukrainu, běchu sudnicy měnjenja, zo njeje jeho potencial wohrožowanja w Němskej sylny dosć a zo smě so po prawje na swobodne měnjenja wužiwać.
Serija nominowana
Köln. Serija ze cyłkownje šěsć dźělemi „Lauchhammer – Tod in der Lausitz“ je za lětuše němske telewizijne myto nominowana. W kriminalce dóstanu přihladowarjo tež dokumentariski dohlad na region w Delnjej Łužicy. Wuznamjenjenja chcedźa zamołwići 27. a 28 septembra w Kölnje přepodać.
Ludźi bóle zapřijeć
Niska. Do změny strukturow měli ludźi z jich potencialemi we Łužicy bóle zapřijeć. Na to skedźbni Stefan Körzell, čłon zwjazkoweho předsydstwa DGB, dźensa dopołdnja na 19. łužiskej konferency wobwodow DGB Sakska a Berlin-Braniborska w Niskej. Wosebje za Saksku žadaše sej tarifowe mzdy, kotrež su z wida dźěłarnistwa w předewzaćach přemało rozšěrjene.
Wo wjelkach so informowali
Budyšin. Techniski wuběrk Budyskeho wokrjesneho sejmika je so wčera z genetiskim přepytowanjom wjelkow w Hornjej Łužicy zaběrał. K tomu běchu sej radźićeljo Bernda Dankerta ze sakskeho statneho ministerstwa za energiju, škit klimy, wobswět a ratarstwo přeprosyli. Fachowc je jim genetiski monitoring wjelkow předstajił.
Jandźel přećiwo kurjenju