Policija (17.05.24)
Přez balkon so zadobyli
Njechorń. Njeznaći su so minjene dny do njewobydleneho domskeho w Njechornju zadobyli a ze stwow wšelke wěcy w hódnoće 300 eurow pokradnyli, mjez druhim šmóratka, dalokowid a widejowu kameru. Při tym nasta wěcna škoda we wysokosći něhdźe połsta eurow.
Policija (16.05.24)
Wjacore awta zapalili
Kamjenc. W nocy wot wutory na srjedu su njeznaći tři awta na Lessingowym naměsće a na Stiftdróze w Kamjencu zapalili. Wobškodźenej buštej płót wokoło Lessingoweho muzeja kaž tež jězdnja. Škoda wučinja něhdźe 10 000 eurow.
Policija (15.05.24)
Elektriske nastroje pokradnyli
Kulow. W Nowej Wsy pola Kulowa su wobydlerjo w pódlanskim twarjenju jedneje ležownosće póndźelu popołdnju załamanje zwěsćili. Po zdaću běchu so njeznaći w nocy wot njedźele na póndźelu zadobyli a wšelake elektriske nastroje a graty pokradnyli. Wěcna škoda wučinja dohromady 25 eurow. Policisća su slědy zawěsćili. Wo dalše přepytowanja so nětko kriminalna słužba přisłušneho rewěra stara.
Policija (14.05.24)
Swobodu lubowacy mul
Wosečk (Hähnichen). Z hródźe twochnjeny mul (Muli) Pedro je kónc tydźenja samo zastojnikow zwjazkoweje policije zaběrał. Tutych běchu wobsydnicy na pomoc wołali, po tym zo jeho sami zapopadnyć zamóhli njejsu. Mjez druhim błudźeše so mul na železniskej čarje njedaloko wsy. Z pomocu mobilneho płota su Pedra na kóncu popadnyli.
Policija (03.05.24)
Wulka škoda w chorowni
Kamjenc. Mjeztym zo hewak w Kamjenskej chorowni pacientow hoja, dyrbjachu tam nětko policiju wołać. W nocy na srjedu su njeznaći wulku wěcnu škodu načinili. Kaž policija rozprawja, woni po wšěm zdaću wodowy honač manipulowachu, tak zo něhdźe 5 000 litrow wody wuběža. Při tym wobškodźichu so špundowanje, wjerch pincy, sćěny, přewětrjenska připrawa a lampy. Po prěnim trochowanju wučinja škoda něhdźe 50 000 eurow, njeje pak hišće doskónčnje wobličena. Nětko pytaja swědkow, kotřiž su snano něšto wobkedźbowali. Pokiwy přijimuja pod 03578/ 35 20.
Policija (02.05.24)
Za test přepjany był
Biskopicy. Z wopitymi kolesowarjemi dyrbi so policija nastajnosći zaběrać. Zo pak je něchtó tak pjany, zo ani alkoholowy test njezmištruje, so přehusto njestawa. Wutoru wječor su policisća w Biskopicach tajki pad dožiwili. Tam chcychu kolesowarja kontrolować. Tón pak přikaz, zo ma zastać, ignorowaše. Na to policisća jeho z awtom přesćahnychu a před nim zastachu. Muž pak njebě kmany tohorunja zastać a do słužbneho awta zastojnikow zajědźe. Na awće nasta při tym něhdźe 150 eurow škody. Poskićeny alkoholowy test Biskopičan zmištrować njemóžeše. Zastojnicy jemu tuž dalšu jězbu z kolesom zakazachu a přikazachu, zo ma krej dać, zo móhli zwěsćić, kelko alkohola je wón pił. Muž dyrbi so nětko wohroženja nadróžneho wobchada dla zamołwić, w policajskej rozprawje rěka.
Policija (25.04.24)
Ćěkanje pomhało njeje
Njedźichow. Po wšěm zdaću čuwy zhubił je we wčerawšich rańšich hodźinach wodźer Audija A 6 Avant, jako w Njedźichowje policajske awto za sobu wuhlada. Muž stupi na płun a smaleše zdźěla hač do 160 km/h spěšnje po statnymaj dróhomaj S 94 a S 92 kaž tež přez Lěsku (Lieske) a Debricy (Döbra) do směra na Kamjenc. Policisća jědźechu za nim, zhubichu pak Audi z wočow. Dokelž běchu zastojnicy čisło awta spóznali, wopytachu woni 27lětneho doma. Při tym so wukopa, zo měješe młody muž 0,4 promilow alkohola w kreji. Najskerje bě to přičina nócneho ćěkanja. Wón změje so nětko podhlada zakazaneho awtoweho wubědźowanja dla zamołwić.
Policija (24.04.24)
Šofer transportera zemrěł
Brunow. Při ćežkim wobchadnym njezbožu je wčera wječor na S 100 pola Brunowa (Brauna) wodźer transportera zemrěł. Wón bě z wotmachom do štoma zrazył a bu při zražce z awta ćisnjeny. We wobkruhu sto metrow pytachu wobornicy za dźělemi awta a ćěła.
Policija (19.04.24)
Wjele škody po zražce
Halštrow. Złe sćěhi měješe srjedu na pózdnim wječoru wobchadne njezbožo na statnej dróze S 94 při wotbóčce do Halštrowa. Tam bě 24lětna žona ze swojim Honda po puću, jako krótko do 23 hodź. sorna přez puć a runu smuhu do awta skoči. Zražki dla zajědźe wodźerka na lěwym boku jězdnje do skłoniny a zwróći. Skónčnje pak Honda zaso na kolesach, ale do nawopačneho směra steješe. Kaž policija zdźěli, so 24lětna snadnje zrani. Ze swojim awtom pak wona hižo dale jěć njemóžeše. Jězdźidło dyrbješe wona wotwlec dać. Po informacijach policije nasta něhdźe 15 000 eurow škody.
Policija (15.04.24)
Jězbna dowolnosć fuk
Malešecy. Při wobchadnej kontroli sobotu w Delnjej Hórce policisća zwěsćichu, zo steješe 35lětny wodźer VWja pod wliwom alkohola. Pola njeho naměrichu 1,42 promilow. Jeho jězbnu dowolnosć sej zastojnicy hnydom wobchowachu. Muž změje so nětko pjanosće w nadróžnym wobchadźe dla zamołwić.
