W tunlu dwójce tak spěšnje jěł
Zhorjelc. Njelube sćěhi změje awtowa jězba za šofera Mercedesa, kiž bě w nocy na wčerawšu wutoru na awtodróze A 4 do směra na Zhorjelc po puću. Jeho lepichu policajscy zastojnicy při kontroli spěšnosće w tunlu pod Limasom. Z cyłkownje 1 136 měrjenych jězdźidłow bě 82 spěšnišo po puću hač dowolene 80 km/h. Rekord docpě w Pólskej přizjewjeny Mercedes, jako ze 157 km/h nimo smaleše, potajkim nimale dwójce tak spěšnje kaž dowolene. Šofer změje nětko znajmjeńša 600 eurow pokuty płaćić. Nimo toho čakaja na njeho tři měsacy zakaza jězdźenja po dróhach w Němskej. Z tymle a dalšimi padami zaběra so nětko krajna direkcija.
Grilowanje ze sćěhami
Malešecy. Njelube sćěhi měješe zawčerawšim popołdnju grilowanje w Malešecach. Tam mjenujcy zawołachu wohnjowych wobornikow k hašenju. Na Dróze Arnošta Sykory paleše so wotpadkowe sudobjo. Płomjenja přeskočichu na dalše wotpadkowe sudobja kaž tež na carport a na sćěnu bydlenskeho domu. Na zbožo wobornicy płomjenja spěšnje podusychu, tak zo so nichtó njezrani. Kaž policija zdźěli, bě 37lětny wobsedźer ležownosće po grilowanju žehliwe wuhlo z grila do wotpadkoweho sudobja ćisnył. Wuskutk tajkeje lochkomyslnosće je 5 000 eurow wěcneje škody.
Dźěćo mylnje do awta zamknył
Budyšin. Po nakupowanju ze swojej třilětnej dźowku wróći so sobotu 33lětny muž w Budyšinje k swojemu awtu. Sadźiwši do toho holcu na jeje městno, połoži wón twory do wačoknika a wostaji tam tež kluč ležo. Začiniwši wačoknik so awto sekundy pozdźišo same wot so zamkny. W swojej nuzy zawoła muž policiju. Zastojnicy dojědźechu sej k jeho mandźelskej po rezerwowy kluč, tak zo móžachu dźěćo njezranjene „wuswobodźić“.
Gumijowy čołm pokradnyli
Wulke Ždźary. Na kotrym z łužiskich jězorow drje paduši swoju rubiznu wužiwaja? Z tymle prašenjom zaběra so policija we Wulkich Ždźarach, hdźež běchu sej njeznaći njewšědnu rubiznu wupytali. W nocy na minjenu srjedu přewinychu woni płót wokoło saněrowanskeje kónčiny Hórnikečanskeho jězora a dóstachu so tak na twarnišćo. Tam pokradnychu industrijowy gumijowy čołm, štyri padle a wonkowny motor. Škodu na skóncowanym płoće a hódnotu pokradnjeneho dźěłoweho gratu saněrarjow trochuja na dohromady 5 500 eurow. Kriminalna policija pad přepytuje a nětko najskerje při jězorach wosebje kedźbuje.
Kuchinski grat drohi był
Kamjenc. Před móžnymi wobšudnikami warnuje policija w Kamjencu a wokolinje. 89lětneho wobydlerja Lessingoweho města je zawčerawšim njeznaty muž narěčał a wudawał, zo chce jemu antikske meble za njemało pjenjez wotkupić. Popołdnju chcyše pjenjezy přinjesć. W běhu rozmołwy poskići njeznaty kófer z kuchinskim gratom, kotryž bě pječa jara drohotny a 700 eurow hódny. Rentnar jemu to wěrješe a nahladnu sumu na městnje zapłaći. Něšto hodźin pozdźišo, jako podarmo na muža čakaše, poča starc dwělować, hač bě wšitko prawje činił, a informowaše policiju.