Přichodnje wučer w Bórkowach

Borkowy. Uwe Gutšmidt budźe wot noweho šulskeho lěta na Bórkowskej zakładnej a wyšej šuli „Mina Witkojc“ skutkować. Jako wučer za Witaj-wučbu zawěsći wón sobu serbskorěčne kubłanje na šuli, w kotrejž mjeztym dźesać lět bilingualnu wučbu po koncepće WITAJ poskićuja. Dotal bě Gutšmidt na Tšupčanskej zakładnej šuli wučił.

„Słowjanska epopeja“ do Azije

Praha. Znatu přehladku wulkoformatnych wobrazow Alfonsa Muchi, zwobraznjacu wuznamne wokomiki słowjanskich stawiznow, wupožča dlěšodobnje do wukraja. Klětu budźe w Japanskej a Chinje wustajena; pozdźišo snano tež w Južnej Koreji a USA. China zapłaći za wupožčenje 100 000 eurow a zaruna kóšty transporta a zawěsćenja.

Za zhromadne spěchowanje

Podstupim. Braniborski ministerski prezident Dietmar Woidke (SPD) zasadźuje so za zhromadne dźěło ze Sakskej při hospodarskim spěchowanju Łužicy. Tole je wažne wuměnjenje zesylnjenja regiona, rjekny Woidke wčera po zetkanju z nowym jednaćelom Inowaciskeho regiona Łužica tzwr, Hansom Rüdigerom Langu w statnej kencliji.