Njewjedro škody zawostajiło
Zhorjelc. Njewjedro je w Zhorjelcu wčera wječor wjacore štomy spowalało. Po tym běštej zwjazkowa dróha B 99 a železniska čara do Žitawy nachwilnje zaraćenej, rěčnik wohnjoweje wobory zdźěli. Wichor je tež třěchu dweju domow wobškodźił. Přichodnu nóc připowědźeja meteorologojo njewjedra tež we Łužicy.
Wjele nadhodźin w jastwach
Drježdźany. W sakskich jastwach je so mjez přistajenymi hač do kónca junija nimale 77 000 nadhodźin nakopiło. Statistisce ma kóždy zastojnik a přistajeny 43 nadhodźin na konće dźěłoweho časa. Je to sćěh napjateho personalneho połoženja, kaž justicne ministerstwo informuje. Přiběraca ličba zapokazanych ćěkancow situaciju přidatnje poćežuje.
Pomocnikow z piwom wabja
Praha. Hladajo na chětro napinace dźěło zajim čěskich pomocnikow při tradicionelnym ručnym šćipanju chmjela widźomnje woteběra. Mjeztym zo mějachu něhdy 5 000 ludźi za šćipanje, je jich lětsa mjenje hač 1 000. Wulkopiwarnja Gambrinus dźěłowe mocy hladajo na to jeničce ze zwyšenej mzdu njewabi, ale tež z darmotnym poskitkom piwa.
