Krótkopowěsće (14.06.19)
Žurnalistiske myta přepodali
Wrócław. Lětušich lawreatow Němsko-Pólskeho žurnalistiskeho myta Tadeusza Mazowieckeho su wčera we wobłuku Němsko-Pólskich medijowych dnjow we Wrócławju počesćili. We wosebitej kategoriji „žurnalizm w pomjeznym regionje“ doby Małgorzata Jurgiel, Polskie Radio Szczecin, z přinoškom „Doma pólsce rěčimy“. W nim dźe wo nawuknjenje rěčow za zhromadny pomorski přichod.
Nowej dźěćacej knize wušłoj
Budyšin. Pod titulomaj „Findus a hara z honačom“ resp. „Findus a kokot-spiwarik“ stej w Ludowym nakładnistwje Domowina wušłoj knize dyrdomdejow po cyłym swěće znateho a woblubowaneho duwa Petterson a Findus. Šwedski original Svena Nordqvista stej Dorothea Šołćina do hornjo- a Madlena Norbergowa do delnjoserbšćiny přenjesłoj.
Posledni sněh w Kyrkonošach
Krótkopowěsće (13.06.19)
Kapacity přepruwować
Kiel. W boju přećiwo lěsnym wohenjam wobstawaja nutřkowni ministrojo krajow na tym, zo Zwjazk swoje kapacity za hašenje z powětra přepruwuje. To wuchadźa z předłohi za wobzamknjenje, kotruž rozjimuje tuchwilna konferenca nutřkownych ministrow w Kielu. Předłoha powěsćerni dpa předleži. Kraje maja podpěru z helikopterami Zwjazkoweje wobory a Zwjazkoweje policije za rozsudne.
Słona woda na planetoidźe
Köln. Najwyša hora Ahuna Mons na planetoidźe Ceres w pasmje asteroidow je „jedna z najdźiwnišich strukturow našeho słónčneho systema“, rěka w zdźělence Němskeho centruma za lětarstwo a astronawtiku DLR. Objekt je „aktiwny wulkan, nastaty něhdy z erupcijow słoneje wody“. Dotal tajki fenomen wobkedźbowali njeběchu.
Modelowy region za strowotu
Krótkopowěsće (12.06.19)
Škoda za předsydu wuzwoleny
Hochoza. Clemens Škoda předsyduje nowemu wuběrkej Zwjazkoweho předsydstwa Domowiny „Europeada 2020“. Jeho je wčera dźesaćčłonski gremij na skonstituowanju skupiny wuzwolił, zdźěla Domowina. Clemensa Škodu zastupuje Marcus Końcaŕ. Wuběrk ma serbskej mustwje žonow a muži za koparske europske mišterstwa narodnych mjeńšin-europeadu, kotraž wotměje so klětu pola Korutanskich Słowjencow w Awstriskej, zestajeć.
Zrěčenje na dobro najmjeńšich
Drježdźany. Zwjazkowa ministerka za swójby dr. Franziska Giffey (SPD) a sakski kultusowy minister Christian Piwarz (CDU) podpisataj jutře w Drježdźanach dojednanje wo zakonju „Gute Kita“. Zwjazk přewostaja krajam mjez druhim za dalewuwiwanje kwality při kubłanju dźěći w lětach 2019 do 2022 něhdźe 5,5 milliardow eurow, Sakska dóstanje z toho 269 milionow eurow.
Wjele pjenjez za pomnikoškit
Krótkopowěsće (11.06.19)
Loni wjele mjenje rybow było
Kamjenc. Horcota a suchota stej plahowanje rybow w Sakskej loni jara poćežowałoj. Najwjetše problemy mějachu pstruhi a sajblinki, kaž statistiski krajny zarjad w Kamjencu zdźěla. Někotre akwakulturne zawody su samo dospołnu stratu poćerpjeli. 91 tonow módricy woznamjenja minus 40 procentow přirunajo z lětom 2017. Cyłkownje su loni 2 215 tonow jědźneje ryby naprodukowali.
Póńdźe wo škit před wulkej wodu
Frankenberg. Krajna zahrodna přehladka w Frankenbergu steji sobotu, 15. junija, w znamjenju škita před wulkej wodu. We wobłuku 2. tajkeho dnja hosćo zhonja, kak móža swoje domske přećiwo škodam wulkeje wody škitać. Tam předstaja wupokaz za prewenciju, na kotrejež zakładźe hodźi so wěstota twarjenjow nastupajo wulku wodu posudźować a polěpšić.
Češa lubuja „konjacy“ lěk
Krótkopowěsće (07.06.19)
Iniciatiwa Sakskeje a Bayerskeje
Berlin. Lěpšu podpěru ratarjam za žnjowe wupady klimy a wjedra dla stej Sakska a Bayerska dźensa w Zwjazkowej radźe nastorčiłoj. W rezoluciji wuprajatej so za lěpše móžnosće, zawěsćić so přećiwo škodam suchoty dla, kaž tež za dawkowe naprawy. Hnydomna pomoc kaž loni měła wuwzaće wostać. Pomoc nastupajo prewentiwne naprawy dyrbjała wobstatk rizikoweho managementa być.
Wo mobilitu z wodźikom šło
Choćebuz. Delegacija jednoho z wodźacych chinskich twarcow wodźikowych busow „Wanxiang“ je dźensa Choćebusku Industrijnu a wikowansku komoru wopytała. Mjez předewzaćelemi, slědźerjemi a wobchadnymi ekspertami su so chinscy hosćo wo techniskich prašenjach, dosahu, přizwolenskich procedurach a wo projektach nastupajo mobilitu z wodźikom wobhonili, kaž Choćebuska komora zdźěla.
Wołtawu turistisce zwičnić
Krótkopowěsće (06.06.19)
Měrliwu rewoluciju hódnoćił
Berlin. Zwjazkowy sejm je dźensa měrliwu rewoluciju w NDR před 30 lětami a tehdyšu zmužitosć hibanja za wobydlerske prawa hódnoćił. „Murja njeje so prosće zwjezła, ale ludźo su aktiwnje jednali, zo so sypnje“, rjekny społnomócnjeny za wuchod zwjazkoweho knježerstwa Christian Hirte (CDU) dźensa w plenumje. Wobydlerjo w NDR su sej swobodu a demokratiju sami wuwojowali.
Serbske potajnosće na statoku
Chrósćicy. Šćěpan Hanuš budźe fasadu Kralec statoka w Chrósćicach wuhotować. Tema maja serbske potajnosće być. Móžny je projekt dźakowano sakskemu statnemu ministerstwu za wobswět a ratarstwo, kotrež zběraše ideje za wjesne kónčiny, při čimž běchu kreatiwne namjety zhromadneho žiwjenja prašane. Přichodnu wutoru ma wuměłc oficialny nadawk za wuhotowanje fasady dóstać.
Wuběrk přiražku přizwolił
Krótkopowěsće (05.06.19)
Módroćišć kulturne herbstwo
Berlin. Wotnětka je módroćišć wobstatk imaterielneho kulturneho herbstwa. Wčera su reprezentanća UNESCO w Berlinje němskim zastupjerjam techniku nałožowacych dźěłarnjow wopisma přepodali. Na zhromadnu iniciatiwu Němskeje, Awstriskeje, Čěskeje a Słowakskeje bu rjemjesło do lisćiny přiwzate. Módroćišć je mjez druhim wažny element zhotowjenja serbskeje narodneje drasty.
Bańki runohódnje darić
Berlin. Wědomostnicy uniwersity Leopoldina w Halle nad Solawu a unije němskich akademijow wědomosćow su wčera zapósłancam zwjazkoweho sejma poručili, nowelěrować lěta 1990 schwaleny zakoń wo rozpłodźenskej medicinje, kotryž „wobstejnosćam 21. lětstotka hižo njewotpowěduje“. Na přikład měło so darjenje jejkowych bańkow dowolić.
Přewjeduja naprašowanje
Krótkopowěsće (04.06.19)
Chcedźa so lěpje zrozumić
Drježdźany. Poměr mjez sakskej policiju a medijemi ma so polěpšić. Zboka ekstremnych połoženjow měli sej policisća a žurnalisća dźěło tamneho zbližić móc, kaž sakske nutřkowne ministerstwo zdźěla. Němski zwjazk žurnalistow je ze zamołwitymi za wukubłanje nowy koncept zdźěłał, w kotrymž medijowe prawo sylnišo wobkedźbuja. Žurnalisća měli při tym z praksy powědać.
Kuzłarjej na jewišću
Budyšin. Pod hesłom „Magija intuicije“ chce znate duwo kuzłarjow Thomas & Vincent pjatk swój nowy program w Budyskim Dźiwadle na hrodźe pokazać. Zhromadnje z publikumom budźetaj mentalistaj, wobaj z łužiskimi korjenjemi, prašenje rozjimać, hač a w kotrej měrje „čitanje myslow“ z tak mjenowanym brjušnym začuwanjom zwisuje.
Zastanu tež při Serbskim muzeju
Krótkopowěsće (03.06.19)
Strowotniske zwjazkarstwo
Drježdźany. Ze sylnymi partnerami chce Sakska strowotniske zastaranje za přichod zawěsćić a předewšěm na wsach z modelemi nowe puće kročić. Za to wutworichu dźensa w Drježdźanach zwjazkarstwo, kotremuž přisłušeja nimo strowotniskeho ministerstwa Komora lěkarjow Sakskeje, kasowolěkarske zjednoćenstwo, Towaršnosć chorownjow Sakskeje a chorobna kasa AOK Plus.
Wjace wukrajnikow w Sakskej
Drježdźany. Dobre połoženje na dźěłowych wikach wujewja, zo dale a wjace wukrajnikow w Sakskej dźěła. Wjac hač 78 500 ludźi z wukraja wukonja tuchwilu w swobodnym staće k socialnemu zawěsćenju winowate dźěło. To je něhdźe 4,8 proc. cyłkowneho podźěla dźěławych a dotal najwjace. Před třomi lětami běštej 3,2 procentaj přistajenych z wukraja.
Schubert znowa njenastupi
Krótkopowěsće (31.05.19)
Skawća pućowali
Slepo. Serbske skawtske pućowanje su dźensa při Lěsnym haće pola Slepoho zakónčili. Na dwudnjowskim pućowanju Slepjanskeje ewangelskeje wosady wobdźěli so dźesać skawtow, kotřiž na Slepjanskej zakładnej šuli serbšćinu wuknu. Pod nawodom fararki Malinkoweje běchu zhromadnje po puću, su čołmikowali a stanowali. Při wječornym lěhwowym wohenju su tež serbske pěsnje spěwali.
Wo strukturnej změnje
Budyšin. Strukturna změna we Łužicy bě tema diskusijneho wječora srjedu w Budyskim Dźiwadle na hrodźe. Rozjimane bu prašenje, što přińdźe po brunicy. Wo tym je 25 zajimcow zdźěla chětro emocionalnje diskutowało. Jasne wuprajenje bě, zo jeničce inwesticije a spěchowanske programy za pozitiwnu změnu njedosahaja.
Do partnerskeho wokrjesa
