Krótkopowěsće (12.08.15)
Wjace pšeńcy plahowali
Kamjenc. Sakscy ratarjo su lětsa wjace pšeńcy plahowali hač loni. Kaž statistiski zarjad w Kamjencu zdźěli, je so podźěl nalětnjeje pšeńcy wo 28 procentow a nazymskeje wo 0,6 procentow powjetšił. Pšeńcu plahowali su lětsa na cyłkownje 196 800 hektarach. Wona je najwažniša družina žita před ječmjenjom na 119 200 hektarach. Sakscy ratarjo wobdźěłuja lětsa dohromady 709 000 ha role.
Hłodowy stawk
Wojerecy. Hižo třeći dźeń někotři požadowarjo azyla we Wojerecach stawkuja a ničo wjac njejědźa. Chcedźa ćišć na zarjady wukonjeć, zo jich próstwy wo azyl spěšnišo wobdźěłaja. Zamołwići běchu jim rozsud w běhu třoch měsacow připowědźli, mjeztym čakaja hižo dlěje hač lěto. Wokrjesny wukrajny zarjad chcyše dźensa wo próstwje rozsudźić.
Tež w Čěskej na łosy skedźbnjeć
Krótkopowěsće (11.08.15)
Nowa móžnosć kolesować
Zły Komorow. We łužiskej jězorinje so syć kolesowanskich šćežkow z nowej Młynskej čaru wot septembra dale rozšěri. Kaž zdźěli nam Kathrin Winklerowa, jednaćelka turistiskeho zwjazka Łužiska jězorina, je tam mjeztym dźesać tematiskich kolesowanskich šćežkow. Zajimcy móža tak mjez druhim na slědach Strittmattera abo Krabata na puć podać.
Hotel „mama“ mjenje prašany
Kamjenc. Dale a mjenje młodostnych w Sakskej bydli hišće pola staršeju. Loni bydleše něšto wjac hač třećina (36 procentow) młodych ludźi doma. Před dźesać lětami bě to hišće wjac hač połojca (56 procentow). Přewažnje młodźi mužojo nimaja chwatne, so wot staršeju dźělić, kaž statistiski krajny zarjad w Kamjencu informuje.
Utta Danella njeboha
Mnichow. Spisowaćelka woblubowanych romantiskich knihow, kotrež su tež husto předłoha filmow, Utta Danella je, kaž bu nětko znate, hižo w juliju w Mnichowje w starobje 95 lět zemrěła. Rodźena Lipšćanka, kotrejež knihi su so wjacore miliony razow předawali, bu w kruhu swójby pochowana.
Hru přetorhnyć dyrbjeli
Krótkopowěsće (10.08.15)
Wučerjo zeznaja Saksku
Drježdźany. 48 wučerjow z jědnaće narodow přebywa wot dźensnišeho dwě njedźeli w dalekubłanskim centrumje Sakskeho kubłanskeho instituta Mišno. Pedagogojo wuwučuja w swojich ródnych krajach němčinu jako cuzu rěč. W Sakskej dóstawaja nowe nastorki za žiwu a wotměnjawu wučbu w cuzej rěči.
Bój póńdźe dale
Budyšin. Tarifowy konflikt za njelěkarskich sobudźěłaćerjow klinikuma Hornjołužiski hórski kraj njeje hišće wustaty. Dźěłodawarjo nochcedźa lońše tarifowe zrěčenje polěpšić. Wone bu wot wjetšiny přistajenych wotpokazane. Nětko maja so nowe jednanja wjesć, termin wšak hišće žadyn znaty njeje.
Čechow w Němskej lěkować?
Aš. Najzapadniše město Čěskeje republiki Aš je mjenje hač dźesać kilometrow wot bayerskeho města Selba zdalene. W padźe strowotnych problemow pak dyrbja wobydlerjo Aša do nimale 30 km zdaleneho Cheba jězdźić. Dokelž je Selb w minjenych 15 lětach třećina wobydlerjow wopušćiła, trjebaja tam čěskich pacientow. Wokomiknje jednaja wo tym, zo směli jich tam lěkować.
Na bus třělił
Krótkopowěsće (07.08.15)
Nawrót hišće wotewrjeny
Drježdźany. Měšćanska rada sakskeje stolicy je wčera Annekatrin Klepsch (Lěwica) za kulturnu měšćanostku wuzwoliła. Wona ma tuž swój mandat w krajnym sejmje 1. nowembra złožić. Tak móhł so serbski politikar Lěwicy Hajko Kozel do krajneho sejma nawróćić. Byrnjež tójšto podpěry měł, chcył wón do doskónčneho rozsuda swójbne, powołanske a politiske aspekty wotwažować.
Najwyši schodźenk warnowanja
Budyšin/Zhorjelc. Hladajo na dale trajace suche a horce wjedro płaći wot dźensnišeho na sewjeru Budyskeho a Zhorjelskeho wokrjesa najwyši schodźenk warnowanja před lěsnymi wohenjemi. Po lěsnych pućikach njesmě so hižo jězdźić. Awta na kromach lěsow wotstajić je zakazane, krajnoradnej zarjadaj informujetej. Zamołwići chcedźa dodźerženje zakaza kontrolować.
Gerd Natschinski njeboh
Krótkopowěsće (06.08.15)
Duda spřisahany
Waršawa. Andrzej Duda, dobyćer pólskich prezidentskich wólbow, je wotnětka oficialnje w zastojnstwje. Narodnokonserwatiwneho politikarja su dźensa před woběmaj komoromaj parlamenta spřisahali. W swojej prěnjej narěči wón potwjerdźi, zo chcył so za sylnu Pólsku zasadźeć. Duda naslěduje Bronisława Komorowskeho, kiž bě jemu podležał.
Parniki hižo njejězdźa
Drježdźany. Přewšo niłkeje wody Łobja dla wot wčerawšeho wječora wulětniske łódźe w Drježdźanach hižo jejězdźa. Pegel rěki je nětko pod kritiskej hranicu 60 centimetrow. Dokelž su wuhlady na bórzomny dešć skerje špatne, dyrbjachu wšitke jězby najprjedy raz wotprajić. Tež parada parnikow 14. do 16. awgusta drje dyrbi wupadnyć, kaž z Drježdźan rěkaše.
Ponowja Semperowu operu
Drježdźany. Sławnu Semperowu operu w Drježdźanach 30 lět po jeje znowawotewrjenju ponowja. Hač dosrjedź septembra chcedźa wšitke nutřkowne rumnosće kompletnje ponowić. Potom ma dom wupadać kaž w lěće 1895. Kóšty wobličeja po informacijach Sakskeho imobilijoweho a twarskeho managementa na 1,1 milion eurow.
Krótkopowěsće (05.08.15)
Ewaluaciju móža zahajić
Lipsk. Braniborske ministerstwo za kubłanje, młodźinu a sport je ewaluaciju na zakładnych šulach z delnjoserbskim poskitkom přizwoliło. To zdźělichu wčera nawodnistwu projekta prof. dr. Edwardej Wornarjej, dr. Janje Šołćinej a dr. Michaelej Jacobsenej. W njewotwisnymaj posudkomaj bu zwěsćene, zo su podłožki dospołne a zo žane datoškitne wobmyslenja hižo njewobsteja.
Wjele wjelkow w Sakskej
Rěčicy. W Sakskej je tuchwilu dźesać wjelčich črjódow. To wozjewi Rěčičanski kontaktny běrow Wjelči region Łužica. Najwjetši dźěl wjelkow je žiwy we Łužicy, mjez druhim w Dubom, Kinsporku, Minakale, Niskej a Wochozach. Z pomocu fotowych pasli bě móžno, w šěsć črjódach młodźata zwěsćić. W Dubjanskej zličichu samo 13 młodźatow.
Pjenjezy za energijowu fabriku
Budyšin. Wokrjes Budyšin chce próstwu wo dalše spěchowanske pjenjezy za přetworjenje Energijoweje fabriki
Krótkopowěsće (04.08.15)
Po puću do Rumunskeje
Smjerdźaca. Cyłkownje 28 čłonow Smjerdźečanskeje rejwanskeje skupiny a skupiny Sprjewjan je so dźensa na puć do Rumunskeje nastajilo. Tam wobdźěla so na mjezynarodnym folklornym festiwalu w měsće Buzãu, kaž Smjerdźečenjo zdźěleja. Woni budu tam jedna z jědnaće ansamblow ze wšeho swěta.
Zeleni žadaja sej jasnosć
Drježdźany. Zeleni w Sakskim krajnym sejmje dwěluja na tym, zo krajne knježerstwo planowany twar nowych spušćadłow w čěskim Děčinje woprawdźe wotpokazuje. Dźensa woni knježerstwo namołwichu, tole „jasnje a zjawnje“ hišće raz potwjerdźić. Wobswětowe ministerstwo ma wobmyslenja Zelenych za njewoprawnjene a skedźbnja na koaliciske zrěčenje.
Čěsku armeju powjetšić
Praha. Čěski zakitowanski minister Martin Stropnický chcył armeju kraja přichodne lěta wuraznje powjetšić. Mjeztym zo ma wona wokomiknje 21 000 wojakow, měła jich ličba w běhu pjeć lět na 27 000 rozrosć. W tym zwisku jedna Stropnický hižo z financnym ministerstwom wo přidatnych srědkach, kaž medije rozprawjeja.
Čerwjene byki z remisom
Krótkopowěsće (03.08.15)
Planuja azylowe přijimanišćo
Lipsk. Tež w Lipsku planuja dom požadarjow azyla jako tak mjenowane prěnje přijimanišćo. W něhdyšim internaće wučomnikow ma městno za 510 wosobow nastać, kaž rěčnica krajneje direkcije dźensa zdźěli. Přichodny pjatk maja zajimcy składnosć sej areal wobhladać.
Pomocny skutk maltezow přijimuje
darjene drasty, kaž rěkaše.
„Hłodowy kamjeń“ widźomny
Děčín. Horceho sucheho wjedra dla je pegel Łobja w sewjernej Čěskej najniši wot lěta 1952. W gmejnje Těchlovice pola Děčína samo po dołhim času historiski „hłodowy kamjeń“ zaso z wody rěki saha. Fachowcy běchu z tym ličili, zo bu kamjeń při wutwarje Łobja zničeny. Hłodowe kamjenje pokazuja na wosebje suche a z hłodom zwjazane lěta.
Mjenje njezbožow na twarje
Berlin. Ličba dźěłowych njezbožow na twarnišćach Němskeje dale woteběra. Tole wuchadźa z rozprawy powołanskeho drustwa. Loni zličichu po wšej Němskej 104 000 dźěłowych njezbožow, 1,4 procenty mjenje hač 2013 a 16 procentow mjenje hač před dźesać lětami. Wosebje často znjezbožeja dźěłaćerjo přeco hišće na rěblach, róštach a třěchach.
Krótkopowěsće (31.07.15)
Olympia 2022 w Pekingu
Kuala Lumpur. Olympiske zymske hry 2022 wotměja so w Pekingu. To je Mjezynarodny olympiski komitej dźensa w Kuala Lumpuru rozsudźił. Chinska stolica je so přećiwo najwjetšemu městu Kazachskeje, Almaty, přesadźiła. Peking je tak prěnje město w olympiskich stawiznach, kotrež po lětnjej w lěće 2008 nětko tež zymsku olympiadu wuhotuje.
Ludmila Dvořáková njeboh
Praha. Operowa spěwarka Ludmila Dvořáková je njeboh. 92lětna zemrě wohenja w swojim bydlenju w Praze dla, powěsćernja ČTK dźensa rozprawja. Dvořáková bě swój čas Wagnerowe a Straussowe opery spěwała. Wona skutkowaše mjez druhim w Berlinje, Mnichowje, Londonje, New Yorku a Parisu. 1972 spožčichu jej Narodne myto NDR.
Nowa internetna terapija
Lipsk. Internetnu terapiju za přiwuznych suicidnych woporow chce Lipšćanska uniwersita poskićić. Kaž direktorka kliniki za psychosomatisku medicinu a psychoterapiju Anette Kersting zdźěla, ma internetne lěkowanje wosebje pomocne być, dokelž je anonymne. Program traje dwě lěće. Loni bě sej w Sakskej 664 ludźi žiwjenje wzało.
BVB zbožownje dobył
Krótkopowěsće (30.07.15)
Bjezdźěłnosć snadnje wjetša
Nürnberg. Lětnjeje přestawki w mnohich zawodach a mnohich šulskich wotchadnikow dla je so ličba bjezdźěłnych w Němskej w juliju wo 61 000 na nětko 2,773 milionow powjetšiła. To je přiwšěm 99 000 mjenje hač loni w juliju, kaž Zwjazkowa agentura za dźěło dźensa zdźěli. Kwota bjezdźěłnosće rozrosće wo 0,1 dypk na 6,3 procenty.
Łódź njemóže dale jěć
Drježdźany. Dale trajacy niski staw wody Łobja je dowolowu łódź „Clara Schumann“ w Mišnje zadźeržał. Łódź chcyše poprawom do čěskeho Mělníka jěć, kaž jeje kapitan zdźěli. Z Mišna pak dyrbjachu pasažěrojo z busami zaso domoj jěć. Łódź trjeba znajmjeńša 1,60 metrow wody pod sobu. Mišnjanski pegel pokazowaše dźensa rano runje 1,16 metrow.
Indianski hosćenc w Čěskej
Praha. Zastupnicy indianskeho splaha seminolow, pochadźacy z Floridy w USA, su tež w čěskej stolicy aktiwni. Hižo štyri lěta wobsteji w centrumje Prahi wot indianskich předewzaćelow nawjedowany hosćenc Hard Rock Cafe. Nětko chcył mějićel James Billie tam tež hišće hotel wotewrěć. Seminolojo su wot lěta 1979 w Čěskej jako hosćencarjo aktiwni.
