Krótkopowěsće (09.02.21)
Incidenca dale spaduje
Budyšin. Kónca tydźenja dla su w Budyskim wokrjesu wčera jenož štyri nowonatyknjenja z koronawirusom zwěsćili. Tuchwilu je 489 schorjenych (-63), z nich 87 (+1) w chorowni lěkuja. Wčerawša incidenca bě 119,3. Runje tak niska je ličba třoch nowoinfekcijow w Zhorjelskim wokrjesu. Tam přizjewichu wčera wosom smjertnych padow za dobu wot 21. do 28. januara. Tamniša incidenca je 121,87.
Safer Internet Day
Berlin. Strona Piratow zahaji składnostnje dźensnišeho Dnja wěsćišeho interneta (Safer Internet Day) akciski tydźeń přećiwo hidźe a cyber-mobbowanju w syći. W srjedźišću informaciskeje kampanje stejitej wujasnjenje a prewencija přećiwo šćuwańcy w interneće. Potrjecheni a zajimcy namakaja na stronje piratenpartei.de/gegen-hass-im-netz pomoc, informacije a narěčenskich partnerow.
Zakazanu chorhoj wupójsnyli
Krótkopowěsće (08.02.21)
Situacija so trochu polěpšiła
Budyšin. Incidenca w Budyskim wokrjesu je so na 123,33 znižiła. Aktualnje je 552 z koronawirusom natyknjenych wosobow, 65 wjace hač pjatk. Třinaće dalšich pacientow je kónc tydźenja zemrěło. Tež w Zhorjelskim wokrjesu je incidenca niša a wučinja tuchwilu 121,08. Cyłkownje je 479 inficěrowanych (+ 18), smjertne pady přez kónc tydźenja žane njezwěsćichu.
Mrětwa so dale wupřestrěwa
Zhorjelc. Na wuchodźe swobodneho stata su fachowcy dwanaće nowych padow afriskeje swinjaceje mrětwy zwěsćili, zdźěli zawčerawšim sakske strowotniske ministerstwo. Wšitke fakty pokazuja na aktiwne infekcije we wohroženej kónčinje, kotraž leži w Zhorjelskim wokrjesu. W přichodnych dnjach a tydźenjach liči ministerstwo tuž z dalšimi infekcijemi.
Za medijowe partnerstwa
Krótkopowěsće (05.02.21)
Tendency snadnje rozdźělnej
Budyšin. Ličba z koronawirusom natyknjenych je so w Budyskim wokrjesu wo 76 na dohromady 570 powjetšiła. Třo pacienća su zemrěli. W chorownjach lěkuja 151 wosobow (- 3), 26 z nich intensiwnje. Tudyša incidenca wučinja 133,33. W Zhorjelskim wokrjesu zwěsćichu 47 nowych infekcijow a sydom smjertnych padow. Incidenca zwyši so na 137,5.
„Krok přećiwo antisemitizmej“
Drježdźany. Społnomócnjeny sakskeho knježerstwa za židowske žiwjenje dr. Thomas Feist a generalna sekretarka Towarstwa 321 – 2021: 1 700 lět židowstwa w Němskej Sylvia Löhrmann staj kooperaciske zrěčenje podpisałoj. Za towarstwo jedna so wo „wuznamny krok zhromadneho boja přećiwo antisemitizmej a wažny přinošk za přichod židowstwa w Němskej“.
Kritizuja rozsud komisije EU
Krótkopowěsće (04.02.21)
Předsydstwo dźěłać započało
Chrósćicy. Nawodnicy dźěćacych dnjowych přebywanišćow w nošerstwje Serbskeho šulskeho towarstwa su wčera w Chróšćanskej „Jednoće“ nowe předsydstwo SŠT zeznali. Kubłarki a kubłarjo rozłožichu ramikowe wuměnjenja za skutkowanje kubłanišćow. Fachowa poradźowarka Kerstin Šołćina předstaji swój wobłuk, w kotrymž wot spočatka měsaca dźěła.
Niwow infekcijow spaduje
Budyšin. 69 koronanatyknjenjow zwěsćichu wčera w Budyskim wokrjesu. Dalšej pacientaj staj zemrěłoj. Kaž krajnoradny zarjad dale zdźěli, je wot 596 schorjenych wosobow (+3) 154 (-10) w chorowni. Tudyša incidenca wučinja 135,33. We wokrjesu Zhorjelc zličichu wčera 84 dalšich infekcijow a 17 smjertnych padow. Incidenca tam je 134,53.
Serbsce w sto sekundach
Krótkopowěsće (03.02.21)
Komunje bjez natyknjenych
Budyšin. W Budyskim wokrjesu su wčera 23 dalšich natyknjenjow a štyri smjertne pady w zwisku z koronawirusom zwěsćili. Wot 523 schorjenych (-29) je 164 (-4) w chorowni. Incidenca tu wučinja 154,33. Worklecy a Wachau stej komunje wokrjesa bjez pozitiwnje testowanych. W Zhorjelskim wokrjesu zličichu wčera 61 nowoinfekcijow. Tamniša incidenca je 141,26.
Jasny plan za nowe wučbnicy
Budyšin. Lětsa ma w Ludowym nakładnistwje Domowina wuńć 31 nowych wučbnicow a wučbnych srědkow za serbske a serbšćinu podawace šule. Na dokónčenju sobudźěłaćerjo Rěčneho centrum WITAJ w Budyšinje a Choćebuzu dźěłaja. Budźe to 24 hornjoserbskich a sydom delnjoserbskich titulow. Přidatnje k planej z LND předwidźi pedagogiski wotrjad RCW dźesać dalšich titulow.
Pomoc při digitalizaciji šule
Krótkopowěsće (02.02.21)
Mało nowych natyknjenjow
Budyšin. Kónca tydźenja dla je ličba zwěsćenych natyknjenjow z koronu hač do wčerawšeho wo 16 přiběrała, kaž krajnoradny zarjad zdźěli. Třo pacienća w starobje 69 do 92 lět su zemrěli. Wot 622 schorjenych (-70) lěkuja 168 (+9) w chorowni. Aktualna incidenca je 153,6. Wo jednej dalšej infekciji a sydom smjertnych padach informuje Zhorjelski wokrjes. Incidenca wučinja tam 140,86.
Krajny biskop přeprosył
Drježdźany/Hodźij. Ewangelski krajny biskop Tobias Bilz je serbskich křesćanow Hodźijskeje wosady kónc februara na wosobinsku rozmołwu do Drježdźan přeprosył. Tući běchu so na njeho kaž tež na synodu Ewangelsko-lutherskeje krajneje cyrkwje Sakskeje z próstwu wobroćili, podpěrać serbske zajimy při znapřećiwjenju wot krajneho cyrkwinskeho zarjada jednostronsce přetłóčenej strukturnej reformje.
Namjety hišće hač do pjatka
Krótkopowěsće (01.02.21)
Mutacija w Zhorjelskim wokrjesu
Budyšin. Mutaciju koronawirusa z Wulkeje Britaniskeje su w Zhorjelskim wokrjesu dopokazali, kaž bu kónc tydźenja znate. Tam mějachu wot pjatka 149 dalšich natyknjenjow, wčerawša incidenca bě 142,05. W Budyskim wokrjesu zwěsćichu w samsnym času 216 infekcijow a wosom smjertnych padow. Incidenca wučinješe tu 166,33.
„Mjeńšinopolitiski přełam“
Kiel. Sćelak NDR ma regionalne a mjeńšinowe rěče přichodnje lěpje wobkedźbować. Na to su so krajne knježerstwa Schleswigsko-Holsteinskeje, Mecklenburgsko-Předpomorskeje, Delnjeje Sakskeje a Hamburga w nowym rozhłosowym statnym zrěčenju NDR dorozumili. Danska mjeńšina a Frizojo běchu sej to wjele lět žadali. Nětko je rěč „wo mjeńšinopolitiskim přełamje“.
Dalša kritika komisiji EU
Krótkopowěsće (29.01.21)
Incidenca pod hódnotu 200
Budyšin. Prěni raz po oktobrje 2020 leži sydomdnjowska incidenca koronawirus nastupajo w Budyskim wokrjesu pod hódnotu 200. Tudyši krajnoradny zarjad mjenowaše wčera ličbu 177. Zdobom informowaše wo 82 dalšich natyknjenjach a štyrjoch smjertnych padach. Kaž zarjad dale zdźěli, postupi cyłkowna ličba w zwisku z koronu zemrětych na 500.
Wjace bjezdźěłnych sezony dla
Budyšin. We wuchodnej Sakskej je w januarje 19 708 bjezdźěłnych, 1 573 resp. 8,7 procentow wjace hač loni w decembrje. Bjezdźěłnostna kwota wučinja 7,1 procent. Kaž Budyska wotnožka dźěłoweje agentury dźensa informuje, zepěraja so zawody dale na pjenjezy za krótkodźěło, zo bychu zadźěłanych fachowcow dźerželi. Rozrost bjezdźěłnosće ma sezonalne přičiny.
Nawi přichoda wotprajeny
Krótkopowěsće (28.01.21)
Wuwiće do praweho směra
Budyšin. Natyknjenja z koronawirusom minjenych sydom dnjow na 100 000 wobydlerjow tež w Hornjej Łužicy dale woteběraja. W Budyskim wokrjesu spadny incidenca wčera na 219 (wutoru 239), w Zhorjelskim na 172,52 (do toho 188,35). W Budyskim wokrjesu zwěsćichu 126 dalšich infekcijow a štyri smjertne pady. W Zhorjelskim bě 101 nowonatyknjenje, 17 pacientow je zemrěło.
Serbska app dale woblubowana
Budyšin. Hornjoserbsku aplikaciju „Serbsce lochko“ je sej dotal 3 000 zajimcow, kotřiž chcedźa serbsku rěč słyšeć a ju wšědny dźeń nałožować, na swojim šmóratku instalowało. Něhdźe 900 ludźi po wšej Němskej app, zestajenu lěta 2014 w pedagogiskim wotrjedźe Rěčneho centruma WITAJ, aktiwnje wužiwa, zdźěli lektorat RCW. App je onlineowa wersija CDjow „Serbsce lochko“, kotrejž stej tež w Smolerjec kniharni na předań.
Wotškódnja swójbu zatřěleneho
Krótkopowěsće (27.01.21)
Hódnota incidency woteběra
Budyšin. Hač do wčerawšeje wutory su w Budyskim wokrjesu 21 dalšich natyknjenjow z koronawirusom zwěsćili, dalšich 13 pacientow zemrě. Aktualnje schorjene su 804 wosoby (-163), z kotrychž 104 (-38) w chorowni lěkuja. Incidenca bě 239,66. Wokrjes Zhorjelc rozprawješe wo 65 nowoinfekcijach a jednym smjertnym padźe. Incidenca tam bě 188,35. Wobaj krajnoradnej zarjadaj na to skedźbnjatej, zo płaća wot jutřišeho štwórtka přiměrjene prawidła w Sakskej.
Wopory přisprawnišo wopominać
Budyšin. Wopory wonkowneho lěhwa kaceta Hohnstein, Kopornika w Budyšinje, dyrbjało město skónčnje přisprawnišo wopominać. To žada sej składnostnje dźensnišeho dnja za wopory nacizma zapósłanča Lěwicy w zwjazkowym sejmje Caren Lay. Wot lěta 1933 běchu w Budyskim Koporniku wjace hač 700 politiskich jatych k dźěłu nućili. Hač do dźensnišeho dopomina město na to z jeničkej sadu na turistiskej tafli.
Přiwótřa naroki za čěšćinu
