Krótkopowěsće (30.04.21)
Posłužby zarjada wobmjezowane
Budyšin. Budyski krajnoradny zarjad na to skedźbnja, zo su wšelake jeho posłužby wobmjezowane, dokelž dyrbjachu personal do strowotniskeho zarjada delegować, zo by tam wupomhał. We wokrjesu zwěsćichu wčera 185 natyknjenjow z koronawirusom a dwaj smjertnej padaj. Po RKI wučinja incidenca tu dźensa 265,2. Wokrjes Zhorjelc wozjewi wčera 109 dalšich infekcijow, tři wosoby su w zwisku z koronu zemrěli. Po RKI je incidenca tam dźensa 214,9.
Antologija ze serbskim awtorom
Berlin. Dalša antologija politiskeje lyriki je w Berlinskim Nakładnistwje při parku pod titlom „Schlafende Hunde VII“ wušła. Mjez nimale 50 awtorkami a awtorami z cyłeje Němskeje je w zběrce, wudatej wot Thomasa Bachmanna z Lipska, Benedikt Dyrlich z třomi nowymi basnjemi w němskej rěči zastupjeny.
Jama Turów smě dale dźěłać
Krótkopowěsće (29.04.21)
Natyknjeni we wšěch komunach
Budyšin. W Budyskim wokrjesu njeje tuchwilu žaneje komuny bjez natyknjenych z koronawirusom. Wokrjes informowaše wčera wo 243 dalšich infekcijach, ličba smjertnych padow powjetši so wo štyri na 851. Tydźenska incidenca po RKI je tu dźensa 263,9. Wokrjes Zhorjelc zwěsći wčera 128 natyknjenjow, ličba zemrětych rozrosće wo jednoho na 1 058. Incidenca wučinja tam dźensa po RKI 215,6.
Filmowy festiwal přestorčili
Großhennersdorf. Aktualneho połoženja korony dla njehodźi so Nysowy filmowy festiwal kaž planowane wot 18. meje wotměć. Tohodla je so nawodnistwo rozsudźiło jón přestorčić. Filmy a dźěl wobłukoweho programa ma publikum nětko wot 16. do 19. septembra dožiwić. Potom chcedźa na dwaceći hrajnišćach w Němskej, Čěskej a Pólskej zarjadowanja přewjesć.
Zběhnu wobmjezowanja
Krótkopowěsće (28.04.21)
Po 30. juniju w praksach šćěpja
Budyšin. Šćěpjenskej centrumaj w Kamjencu a Lubiju runja dalšim we wokrjesach dźěłatej jenož hač do 30. junija. Potom maja praksy domjacych lěkarjow šćěpjenje pře koronawirus zaručić, kaž sakske socialne ministerstwo zdźěli. W Budyskim wokrjesu zwěsćichu wčera 72 natyknjenjow z koronu a dwaj smjertnej padaj. Incidenca po RKI je dźensa 227,9. We wokrjesu Zhorjelc mějachu 130 infekcijow a dwaj smjertnej padaj. Incidenca je tam dźensa po RKI 195,1.
Spěchuje socialne bydlenja
Drježdźany. Sakska wudawa wjace pjenjez za socialne bydlenja. Po wčera wot kabineta wobzamknjenej spěchowanskej směrnicy přewostaja lětsa a klětu po 74,3 milionach eurow, zo bychu tajke bydlenja twarili a saněrowali. Mějićeljo bydlenjow, kotřiž njemóža žanu modernizaciju financować, dóstanu spěchowanje, zo móhli nisku podruž dale zaručić.
Markus Pieper nowy jednaćel
Krótkopowěsće (27.04.21)
Mjeńšinowe myto Angeli Merkel
Heidelberg. Zwjazkowa kanclerka Angela Merkel (CDU) je lawreatka lětušeho Europskeho myta za wobydlerske prawa Sintow a Romow, kotrež Manfreda Lautenschlägerowa załožba a Centralna rada němskich Sintow a Romow jutře spožčitej. Kaž centralna rada zdźěli, kanclerku počesća, dokelž je so wona po nastupje zastojnstwa w lěće 2005 wosebje za to zasadźała, zo ludźo w Němskej a Europje po holocausće na Sintach a Romach prawa mjeńšiny a jeje wjace hač 600lětne stawizny wědomišo zaznawaja.
Pjaty najbóle potrjecheny wokrjes
Budyšin. Z incidencu 317,6 je Budyski wokrjes po RKI dźensa pjaty najbóle potrjecheny w Němskej. Wčera wozjewi wokrjes 14 natyknjenjow z koronu a 13 smjertnych padow, z nich bě šěsć w měrcu. Zhorjelski wokrjes měješe tři dalše infekcije. Štyri podate smjertne pady su z časa wot 15. do 18. apryla. Incidenca tam je po RKI dźensa 196,3.
W šulach 721 pozitiwnych testow
Krótkopowěsće (26.04.21)
Incidenca 300 jasnje překročena
Budyšin. Zwjazkowe nuzowe borzdźidło koronapandemije dla płaći wot předwčerawšeho tež w Hornjej Łužicy. W Budyskim wokrjesu zwěsćichu wot pjatka hač do njedźele 340 nowonatyknjenjow a tři smjertne pady. Tydźenska incidenca po RKI je dźensa 327,6. Tež w Zhorjelskim wokrjesu, hdźež rozprawjachu wčera wo 36 infekcijach, je incidenca wot pjatka přiběrała a je dźensa po RKI 248,9.
Ze žonomaj na čole
Drježdźany/Lipsk. Katja Kipping je kaž wočakowane načolna kandidatka sakskeje Lěwicy za wólby zwjazkoweho sejma 26. septembra. Wona dósta na sobotnym zjězdźe w Drježdźanach 75 procentow hłosow. Na třeće městno krajneje lisćiny wuzwolichu Budysku zapósłanču sejma Caren Lay. Tež sakscy Zeleni su z lěkarku Paulu Piechotta sobotu na zhromadźiznje w Lipsku žonje načolne městno krajneje lisćiny dowěrili.
Dalšej kamerje planowanej
Krótkopowěsće (23.04.21)
108 ludźi w chorownjach
Budyšin. Wo 165 dalšich natyknjenych z koronu informowaše wčera Budyski wokrjes. Incidenca je dźensa po RKI 238,5. Chorownje we wokrjesu lěkuja tuchwilu 108 koronapacientow, z nich 29 na intensiwnej staciji. Wokrjes Zhorjelc přizjewi wčera 111 nowoinfekcijow a dalše wosom smjertnych padow wot 7. do 14. apryla. Po RKI je tam incidenca dźensa 224,4.
Přihoty na „hłownu“ běža
Budyšin. Referent za hospodarstwo a infrastrukturu Domowiny Pětr Brězan budźe třěšny zwjazk w regionalnym wuběrku za přewod strukturneje změny w Sakskej zastupować. To je prezidij Zwjazkoweho předsydstwa Domowiny wčera na swojim onlinowym wuradźowanju wobzamknył. Dale přihotowali su čłonojo gremija mjez druhim tež Hłownu zhromadźiznu Domowiny w juniju w Slepom a přichodne posedźenje zwjazkoweho předsydstwa 7. meje.
Ležownosć sej wróćo žadaja
Krótkopowěsće (22.04.21)
Hotline dlěje docpějomna
Budyšin. W Budyskim wokrjesu zwěsćichu wčera 276 dalšich natyknjenjow z koronawirusom a šěsć smjertnych padow, z kotrychž su štyri hakle nětko do statistiki přiwzali. Wokrjes wot jutřišeho docpějomnosć korona-hotline wot póndźele do soboty časowje podlěša. Dźensniša incidenca je po RKI 211,5. W Zhorjelskim wokrjesu mjenowachu wčera 149 nowoinfekcijow. Incidenca wučinja tam dźensa po RKI 220,8.
Přihotuja zhromadny spis
Choćebuz/Podstupim. Zastupjerjo Rady za naležnosće Serbow su wčera z braniborskej kubłanskej ministerku Brittu Ernst (SPD) we widejokonferency njejasnosće z protokola wo januarskej zhromadnej rozmołwje rozjimali. Rada a fachowcy ministerstwa wopodstatnjeja nětko ze spisom trěbne rozrisanje Serbam wažnych temow, kotrež njejsu wobstatk noweho šulskeho postajenja.
Z chlěbom překwapjeni
Krótkopowěsće (21.04.21)
Incidenca woteběrała
Budyšin. W Budyskim wokrjesu informowachu wčera wo 15 dalšich natyknjenych z koronu. Wot tuchwilu 1 567 schorjenych lěkuja 88 w chorowni. Tudyša sydomdnjowska incidenca na 100 000 wobydlerjow je po RKI dźensa 171,5. Wo 136 infekcijach rozprawješe wokrjes Zhorjelc. Tam zwěsćichu wčera dźewjeć dalšich padow z britiskej mutantu wirusa. Po RKI je incidenca dźensa 216,4.
Muzejowe myto wuwołane
Drježdźany. Muzeje swobodneho stata móža so wotnětka wo Sakske muzejowe myto powabić. Ministerstwo za wědomosć, kulturu a turizm w Drježdźanach spožči wuznamjenjenje lětsa wosmy raz. Nimo hłowneho myta w hódnoće 20 000 eurow přizwoli wosebitej po 5 000 eurach. Myto dóstałoj stej dotal mjez druhim Muzej zapadneje Łužicy w Kamjencu a Muzej Budyšin.
Dóstanu dalše pjenjezy
Rakecy. Leaderowy region Hornjołužiska hola a haty dóstanje hač do klětušeho dalše 3,6 milionow eurow za spěchowanje projektow w kónčinje. Prěnju namołwu, srědki požadać, su zamołwići wčera wozjewili. Rakečanski regionalny management tuchwilu spěchowansku dobu 2014–2020 wuhódnoća a přihotuje strategiju za lěta 2023 do 2027.
Krótkopowěsće (20.04.21)
Změna nastupajo karantenu
Budyšin. We wokrjesu Budyšin płaći nowe rjadowanje karanteny za kontaktne wosoby. Štóž je dwójce přećiwo koronje šćěpjeny a štóž je so z někajkeje warianty wirusa wustrowił a bu jónu šćěpjeny, njetrjeba do karanteny, hdyž je bjez symptomow a imunje strowy. W Budyskim wokrjesu zwěsćichu wčera 30 nowonatyknjenjow, dźensniša incidenca po RKI je tu 258,2. Wokrjes Zhorjelc měješe wčera šěsć koronainfekcijow, incidenca po RKI wučinja dźensa 195,9.
Nowy intendant jasny
Zły Komorow. Daniel Ris naslěduje wot 1. septembra 2022 tuchwilneho intendanta Złokomorowskeho Noweho jewišća Manuela Soubeyranda. Komisija je 56lětneho z dohromady 31 požadarjow z tu- a wukraja wuzwoliła. Ris je wot lěta 2016 intendant Hrodowych swjedźenskich hrow w porynsko-pfalcskim Mayenje.
Rozšěrjeja digitalny poskitk
Krótkopowěsće (19.04.21)
Ličba natyknjenjow dale přiběra
Budyšin. W Budyskim wokrjesu informowachu wot pjatka hač do wčerawšeho wo 323 dalšich natyknjenjach z koronawirusom. Ličba smjertnych padow powjetši so wo tři na 823. Kaž sobotu rěkaše, su dotal we 80 testowanskich centrumach 40 000 spěšnotestow přewjedli. Incidenca wučinja po RKI dźensa 256,5. We wokrjesu Zhorjelc rozprawjachu wčera wo 28 dalšich koronainfekcijach. Tamniša incidenca je po RKI dźensa 248,1.
Testowanski centrum w NSLDź
Budyšin. 23. apryla wočinja w Budyskim NSLDź testowanski centruma. Słužić ma wón jako zakład za modelowy projekt w měsće. W socieće na Burskej hasy móža so wšitcy darmotnje na koronawirus testować dać, trěbna za to je chipowa kartka chorobneje kasy. Terminy su móžne na internetnej stronje . App „Schnelltest.click“ wo wuslědku testa informuje.
„Łužiskohórski spěšnik“ po puću
