Młodostnych paduchow lepili
Wojerecy. Sydom młodostnym w starobje 15 do 19 lět móžeše Wojerowska policija nětko nimale 30 deliktow dopokazać. Wot lońšeho junija hač do lětušeho januara běchu so woni we Wojerecach do zawodow, pěstowarnjow, praksow a předawanišćow zadobywali a z nich zwjetša pjenjezy, alkohol a cigarety kradnyli. Hódnota rubizny wučinja něhdźe 5 500 eurow, cyłkownje načinjena wěcna škoda pak 30 000 eurow.
Pokradnjenu móšnju namakał
Wojerecy. Hižo minjeny pjatk su njeznaći 39lětnej žonje we Wojerowskej lěkarskej praksy móšeń pokradnyli. W njej bě tójšto wosobinskich dokumentow, ale žane pjenjezy. Předwčerawšim zjewi so na Wojerowskim policajskim rewěrje muž, kiž bě móšeń na Budyskej dróze namakał. Na zbožo běchu w njej hišće wšitke dokumenty. Po wšěm zdaću běchu so paduši nadźijeli, zo pjenjezy w móšni namakaja. Dokelž tomu tak njebě, bě zbytk za nich njezajimawy, a tuž su móšnju prosće preč ćisnyli. Wobkradnjenej žonje móžachu jeje wobsydstwo zaso wróćić.
Z městnami njewjedro zachadźało
Dalicy. W někotrych kónčinach Budyskeho wokrjesa je wčera popołdnju njewjedro zachadźało a sej zasadźenje wohnjoweje wobory žadało. W Dalicach (Dahlowitz) pola Chwaćic nawali so błóto z wokolnych polow do wsy. Tak su wobornicy błóto rumowali, ale tež wjacore pincy wuklumpać dyrbjeli. W Małym Wjelkowje njemóžeše dešć na zwjazkowej dróze B 96 spěšnje dosć wotběžeć, tak zo tworjachu so wulke łuže, z kotrymiž mějachu někotři šoferojo problemy. K wjacorym zasadźenjam wołachu tohorunja wobornikow wokoło Biskopic. Tak je so we Weickersdorfje štom powróćił, tež w Počaplicach pola Čerwjenych Noslic dyrbjachu błóto z wjesneje dróhi rumować.
Pjenjezy kradnyli
Němcy. Do ratarskeho zawoda na Kulowskej dróze w Němcach su so njeznaći w nocy na štwórtk zadobyli. Namócnje wočinichu tam wjacore durje a přepytachu najwšelakoriše kamory. Skónčnje pokradnychu wjace hač tysac eurow. Nimo toho načinichu něhdźe 6 000 eurow wěcneje škody.
Swinjo do awta skočiło
Wojerecy. Na zwjazkowej dróze B 97 bě předwčerawšim wječor 61lětny muž ze swojim Toyotu po puću, jako jemu pola Wojerec blisko noweho kružneho wobchada njejapcy dźiwje swinjo do awta skoči. Šofer so snadnje zrani, je pak so lěkarskeho zastaranja wzdał. Na wosobowym awće nasta něhdźe 8 000 eurow škody.
Kontroluja před šulemi
Budyšin. Wot spočatka noweho šulskeho lěta policija přiběrajcy zaso před šulemi kontroluje. Předwčerawšim wupytachu sej Fichtowu zakładnu šulu w Budyšinje. Tam zwěsćichu dwě přeńdźeni. Jedyn ze šoferow njebě připasany, dalši bě dźěćace sydło zabył.
Drohe přeńdźenje
Wojerecy. Zo je z trochu wjace alkoholom w kreji hač dowolene z awtom jězdźił, dyrbi 53lětny we Wojerecach droho zapłaćić. Wón bu wutoru z 0,76 promilemi lepjeny. Za to ma nětko 500 eurow pokuty płaćić, dóstanje dwaj dypkaj w Flensburgu a dyrbi měsac nóžkować.
Cigarety kradnyli
Njeswačidło. Zo je kurjenje škódne, bě minjeny kónc tydźenja njeznatym w Njeswačidle najskerje dospołnje wšojedne. W kupnicy při tankowni dyrbjachu sobudźěłaćerjo póndźelu rano zwěsćić, zo bě so něchtó do twarjenja zadobył a so z tobakoweje polcy posłužował. Kelko cigaretow su paduši sobu wzali, njeje dokładnje znate. Jeničce wěcna škoda pak wučinja něhdźe 4 000 eurow.
Z kuchnje do jastwa
Zhorjelc. Dokelž bě 30lětny muž w Zhorjelcu w nocy na póndźelu na kachlach jědź přismudźić dał a w jeho bydlenju so mócnje kurješe, wočini wón nimo woknow tež bydlenske durje, zo móhł kur wotćahnyć. Tamni wobydlerjo wšak sej myslachu, zo so něhdźe pali, a wołachu policiju. Byrnjež žana škoda njenastała, njeje 30lětny hižo wróćo do swojeje kuchnje a bydlenja směł. Přećiwo njemu předležeše mjenujcy přikaz zajeća, dokelž njebě pokutu zapłaćił. Tak dowjezechu jeho hnydom do jastwa.
Připowěšak pokradnyli
Kubšicy. Poměrnje drohi připowěšak, z kotrymž hodźa so jězdźidła transportować, bě sobotu cil dotal njeznatych paduchow w Kubšicach. Něhdźe 9 000 eurow drohi připowěšak pokradnychu skućićeljo z terena firmy.
Stajnje wjace pjenjez chcył
Budyšin. Hnydom wjacore razy je so 76lětna žona z Budyskeho wokrjesa minjeny měsac z woporom wobšudnika stała. Při telefonje bě jej cuzy napowědał, zo je 145 000 eurow dobyła, zo pak dyrbi za to 5 000 eurow na wěste konto přepokazać, štož wona sčini. Něšto dnjow pozdźišo žadaše sej njeznaty dalše 15 000 eurow a po wospjetnych telefonatach hišće raz 21 000 eurow – a dósta je tež. Cuzemu to přeco hišće dosć njebě, tak zo žona swojej bance nadawk da dalše 42 000 eurow přepokazać. Dokelž jednaše so wo firmowe pjenjezy, trjebaše banka přizwolenje syna 76lětneje. Tón wobšudnistwo spózna a informowaše policiju.
Muža z Nysy wućahnyli
Krušwica. Policiju a wohnjowu woboru wołachu předwčerawšim k namjeznemu mostej w Krušwicy. Tam dyrbjachu wochłódnjeneho muža bjez wědomja z Nysy wućahnyć. Sanitetarjo dowjezechu jeho do chorownje. Na pólskej stronje rěki namakachu policisća drastu muža, ale žane dokumenty wo jeho identiće. W chorowni so pozdźišo wukopa, zo jedna so při wuchowanym wo 85lětneho pólskeho staćana, za kotrymž policija hižo pytaše.