Liboń. 54lětny wodźer motorskeho typa Yamaha z pobóčnym wozom je so sobotu popołdnju w lěwicy pola Libonja přećisnył. Wón so při tym ćežko zrani.
Šešow. Minjeny pjatk popołdnju je so na dwěmaj hektaromaj přeworaneho pola blisko Šešowa paliło. 36 wohnjowych wobornikow z Njeswačidła, Łuha, Zarěča a Rakec měješe woheń na zbožo spěšnje pod kontrolu a płomjenja zhaša.
Hamor. Na statnej dróze 131 pola Hamora sta so wčera wječor z dotal njeznateje přičiny tragiske wobchadne njezbožo. Něhdźe w 19.30 hodź. poča so mjez Krynhelecami a Hamorom VW Golf-kabriolej w lěwej křiwicy suwać, zajědźe z dróhi a prasny na to do štoma. Byrnjež wuchowanscy sanitetarjo spěšnje na městnje byli, njemóžachu woni hižo pomhać. 27lětny wodźer awta hišće na městnje njezboža zemrě. Wobdźěłanje njezboža a rumowanje traještej něhdźe hač do 23 hodź. Kaž policija zdźěli, nasta wěcna škoda w pjećcyfrowym wobłuku. Wobchadna njezbožowa słužba Zhorjelskeje policajskeje direkcije nětko přepytuje, kak je k njezbožu dóšło.
Budyšin. Na swětłym dnju chcyše wčera rano muž w Budyšinje awto listonoša pokradnyć. Tón bě jězdźidło we 8.30 hodź. na Niemöllerowej wopušćił a klučik tčacy wostajił. Tónle wokomik skućićel wuži, zalěze do awta a chcyše wotjěć. Přewjele jězbneje praksy wšak wón njeměješe a zajědźe z VWjom runu smuhu do kerka. Na to so pěši zminy, listonoš pak zawoła policiju. Zastojnicy 41lětneho paducha dosahnychu. Wón steješe pod wliwom drogow.
Konjecy. W pódlanskim twarjenju w Konjecach je so wčera popołdnju z dotal njeznateje přičiny křesło zapaliło. Žnjencarjo na susodnym polu běchu płomjenja wuhladali a informowachu wohnjowu woboru a wobydlerjow. Wobornicy wšitko zhašachu, zranił so nichtó njeje.
Halštrow.Wobchadne njezbožo z třomi wobdźělenymi jězdźidłami sta so wčera wječor na statnej dróze S 94 mjez Rušicu a Halštrowom. Wodźerka Nissana chcyše před njej jěducy Audi přesćahnyć. Jeho šofer pak to přewidźa, wujědźe tohorunja k přesćehnjenju a šmórny so Nissana. Tón storči na to do dalšeho awta, VWja. Při njezbožu bu młoda žona snadnje zranjena, njetrjebaše pak do chorownje. Wobornicy městno zrumowachu.
Kamjenc. Wohnjowych wobornikow z Kamjenca, Jěžowa, Lückersdorfa, Gelenauwa a Bambrucha wołachu sobotu wječor k zasadźenju do Jěžowa, zo bychu tam woheń we wulkim konjencu hašeli. Konje wšak w nim na zbožo njeběchu, dokelž su w lěću na pastwje. Město toho wužiwa konjacy wikowar Bernd Lichthorn halu tuchwilu jako skład za mašiny. Mjeztym zo móžachu někotre z nich wuchować, so tam składowane walčki syna a słomy spalichu. Tež solarna připrawa na třěše hale so dospołnje zniči. Dokelž w bliskosći hydrant pobrachowaše, dyrbjachu wodu za hašenje z rěki klumpać. Kelko škody je při wohenju nastało, njehodźi so hišće rjec, rozměr pak je po słowach wobsedźerja imensny.
Budyšin. Njeznaći su w nocy na štwórtk na Budyskej Friedricha Lisztowej šulske twarjenje z hokatymaj křižomaj pomórali. Bydlenske drustwo, kotrež dom wobhospodarja, je jeju hnydomne wotstronjenje postajiło. Decernat statneho škita njeskutk přepytuje.
Budestecy. Policija je w běhu dweju tydźenjow ćežke rubježnistwo wujasniła, kotrež bě so 16. julija w Budestecach stało. Tehdy njeznaty bě so do domu wuměnkarki zadobył, ju sputał a jej z nožom hrozył. Pokradnył je něšto mało pjenjez a ec-kartku žony, z kotrejž spyta bjez wuspěcha pjenjezy wotzběhnyć. 26lětny z Lubijskeje kónčiny je nětko zajaty.
Załom. Patrulja Habrachčanskeje (Ebersbach) policajskeje inspekcije je wčera popołdnju w Załomju transporter typa VW kontrolowała. Z nim po puću bě 49lětny němski staćan. Jako zastojnicy awto přepytachu, namakachu tak mjenowany butterflyjowy nóž, kotryž měješe šofer při sebi. Mjenowany nóž słuša k zakazanym brónjam. Tajki sej kupić a wobsedźeć njeje tuž dowolene. Dokelž muž wobkrući, zo nóž jemu słuša, dyrbi wón nětko z wotpowědnym chłostanjom ličić.
Brunow. K tragiskemu njezbožu dóšło je wčera popołdnju na statnej dróze S 100 za Brunowom do směra na Kinspork. Z Kamjenca přijěducy Opel zajědźe z njeznateje přičiny z jězdnje a zrazy do štoma. Awto so při tym dospołnje skóncowa. Wohnjowi wobornicy dyrbjachu šofera z awta wućahnyć. Najebać to, zo bě nuzowy lěkar hnydom na městnje a ćežkozranjeneho zastara, njemóžeše jemu hižo pomhać. Šofer hišće na městnje njezboža wudycha.
Šćeńca. Na Sprjewinej w Šćeńcy je wčera popołdnju traktor do awta zrazył. Wodźer awta so při tym zrani.
Biskopicy. Dźensa w nocy su so njeznaći do insolwentneho kulturneho domu w Biskopicach zadobyli. Přeryli su tam wjacore rumnosće, z kotrychž pokradnychu techniske nastroje a alkoholiske napoje. Nimo toho wohnjohašak sobu wzachu. Dokładne informacije k rozměrej škody njepředleža, kriminalna policija slědźi.
Šumborn. Z dotal njewujasnjeneje přičiny je wčera připołdnju šoferka BMWja mjez Porchowom a Šumbornom (Schönbrunn) z jězdnje zajěła a do mosta zrazyła. Wohnjowi wobornicy z wokoliny dyrbjachu ju ćežko zranjenu z awta wuswobodźić.