HZ Ralbicy/Marijina hwězda II –

Jednota Kamjenc 1:2 (1:0)

Zestawa domjacych: J. Bjeńš – Hantsch, Kobalc, Jakubaš, Hübner (75. L. Hoge), Materna, Kunze, Ladewig, Čornak, Kurjat (10. Kral), Žur (70. Zimmermann)

Kaž kóždy tydźeń dyrbješe hrajne zjednoćenstwo rezerwow z Ralbic a Pančic-Kukowa zestawu zaso mócnje změnić. Poprawom hižo wotzjewjenaj Markus Kobalc a Jurij Bjeńš na přikład wupomhaštaj a stajni hrajerjo kaž Handrij Jakubaš njehrajachu na zwučenych pozicijach, ale tam wupomhachu, hdźež bě trjeba. Dewiza domjaceho mustwa rěkaše tuž přećiwo faworitej z Lessingoweho města dołho nulu dźeržeć a spytać z pomocu konterow k wuspěchej dóńć.

W prěnim połčasu so tole tež wulkotnje poradźi. Defensiwa hosćićela steješe jara wěsće a Jednota bě jenož z třělwow zwonka šěsnatki strašna. Tola stoprocentna šansa při tym njewuskoči. Z ničeho domjacy potom nawjedowachu. Tomaš Čornak sflankowa z lěweho křidła do šěsnatki, hdźež přiwza škitar z Kamjenca bul njezbožownje z ruku. Jasnu jědnatku Jakubaš z niskej třělwu pře­twori a tak dźěchu domjacy z nawjedowanjom do kabiny.