We wobłuku Wiesenbeats-festiwala su Sulšečenjo mjeztym hižo 10. raz turněr w třělenju jědnatkow na nohi stajili. Hłowny organizator Stefan Prucha bě hižo do zahajenja cyle napjaty a motiwowany. „Mějachmy tu hižo 24 mustwow, lětsa pak prěni raz 32 a z tym smy tež doskónčnu ličbu mustwow docpěli. Sym hižo nětko chětro hordy a so njesměrnje na turněr wjeselu“, tak Sulšečan při witanju wšěch mustwow. Hakle jónu poradźi so jednomu teamej, mjenujcy Salowčanam, tute wubědźowanje dwójce dobyć. Hewak steješe na prěnim městnje stajnje něchtó druhi. Tak tež lětsa.