Hladajo na trenarsku situaciju bě zašła sezona pola Sokoła Ralbicy/Hórki trochu chaotiska. Nětko steji hižo někotre měsacy dołho 35lětny Krystof Gloxyn při liniji. Hižo wot lěta 2019 – 2023 bě Gloxyn trenar prěnjeho mustwa Sokoła. Jurjej Bjeńšej je rodźeny Ralbičan a nětko w Bretnigu-Hauswalde bydlacy Gloxyn mjez druhim přeradźił, hač je w Ralbicach zaso trochu měra zaćahnyło.

Krystofje, po tym, zo sy staflowy kij trenarja w zymje 2023 Tomašej Henčelej přepodał, sy jón nimale lěto pozdźišo zaso wróćo dóstał. Móžeš skrótka zaso podać, kak je k tomu přišło?

K. Gloxyn: Kaž wšak je wšěm znate, je Tomaš Henčel spočatk lěta trochu překwapjace swój trenarski nadawk w Ralbicach złožił. Na zbožo je potom spěšnje Thomas Schulz ze Spal mustwo přewzał. Tola po někotrych tydźenjach bě pytnyć, zo chemija mjez trenarjom a mustwom njetrjechi. To je Schulz tež sam pytnył a wotstupił. Jako mje potom prezident Dierk Šewc narěča, hač nochcu mustwo znajmjeńša hač do kónca sezony přewzać, připrajich po někotrych přemyslowanjach. Běch tehdy tak a tak zranjeny a z tym bě to wutrobita naležnosć, Sokołej pomhać.