Wojerowski klinikum hižo wjele lět hladarjow chorych wukubłuje
Wojerecy (SN/mwe). 23 holcow a štyrjo hólcy w starobje 16 do 26 lět maja přichodne tři lěta swoje teoretiske wukubłanje na medicinskej powołanskej fachowej šuli a praktiske wukubłanje we Wojerowskim jězorinowym klinikumje kaž tež pola strowotniskich partnerow regiona złožić.
„Z wulkim angažementom za wukubłanje naš klinikum rozsudnje k tomu přinošuje, zo njeby k njedostatkej fachoweho personala dóšło“, hladanska direktorka Sylvia Dürlich wujasnja. „Naši požadarjo su zwjetša z regiona, a smy přeco na tym zajimowani atraktiwitu wukubłanja zwyšić.“
Třilětne kwalifikowane powołanske wukubłanje ze statnje připóznatym wotzamknjenjom je za wšěch tych něšto, kotřiž maja „socialnu žiłku“, měni Heike Kalkbrenner, nawodnica medicinskopowołanskeje šule Wojerowskeje chorownje. „Docpěty schodźenk móže zakład dalšeje kwalifikacije abo studija być. Z powołanskim wukubłanjom wotwěra so tójšto perspektiwow“, wona dodawa.