Tysacy šulerjo Sakskeje so znowa na „genialne-socialne“ přihotuja
Smochćicy (SN/mwe). Byrnjež so akciski dźeń „Genialne-socialne – twoje dźěło přećiwo chudobje“ hakle krótko do lětnich prózdnin wotměł, so na njón tež šulerjo w Hornjej Lužicy hižo nětko přihotuja. Po tym zo je so něhdźe 100 dwanaće- do 20lětnych z cyłeje Sakskeje w januaru w Smochčanskim Domje biskopa Bena na tak mjenowane „juryjowe wuradźowanje“ zetkało, tysacy holcow a hólcow tele dny rozmysluja, hdźe budu we wobłuku akcije dźěłać a pjenjezy za potrěbnych zběrać.
Kaž programowa wjednica „genialne-socialne“ Lydia Haferkorn ze sakskeje młodźinskeje załožby wčera Serbskim Nowinam zdźěli, su šulerjo za lěto 2017 na Smochčanskim zetkanju ze šěsć zapodatych projektow we wobłuku wólbow tři projektowe předewzaća wuzwolili. K nim słuša twar šulskeho a wukubłanskeho centruma w Komrabaiju w Sierra Leone.
