Sobuiniciator dr. Jörg Heidig rozłoži, kak móhł přichodny Łužiski monitor serbskej specifice regiona lěpje wotpowědować
Łužiski monitor ma wid ludnosće na strukturnu změnu w tudyšim brunicowym rewěrje zwobraznić. Po wozjewjenju prěnich wuslědkow lětušeho druheho naprašowanja bě najwjetši čas, so znajmjeńša z jednym jeho dweju iniciatorow rozmołwjeć. Při tym nochcyše Axel Arlt wot dr. Jörga Heidiga jenož pozadki zhonić, kak je k tajkemu projektej dóšło, ale předewšěm tež, kotry móžny wuznam přicpěwataj wón a wědomostny partner Stefan Bischoff Serbam za přichodne tajke naprašowanja.
Knježe dr. Heidig, z kotreje perspektiwy hladataj Steffen Bischoff a Wy na Łužicu?
dr. J. Heidig: Na Łužicu hladam jako tajki, kotryž je tule doma a prawje wjele wo regionje, jeho wuwiću w minjenych lětdźesatkach a wo přichodźe rozmysluje. Stefan Bischoff hlada skerje přez nawoči eksperty za naprašowanja. Wobaj pochadźamoj ze Žitawy a přewjedujemoj přepytowanja w nadawku třećich, štož su zwjetša naprašowanja sobudźěłaćerjow w předewzaćach.
