Pandemija hornjołužiske zwěrjatownje lědma wobwliwuje
Budyšin/Zhorjelc (SN/bn). Składnostnje wosebiteho dnja „Lubuj swój skót“, kotryž so stajnje 20. februara wotměwa – pozadki drje z USA pochadźaceho swjatka su dosć młowojte –, je dalokostudijna Wysoka šula SRH – The Mobile University ze sydłom w badensko-württembergskim Riedlingenje statistiski artikl wozjewiła, wobswětlacy pozitiwny wliw domjaceho skota na čłowjeka. Mjez druhim tam rěka, zo je za mějićelow psow „riziko schorjenja wutrobno-wobtokoweho systema jasnje mjeńše hač w přerězku“, zo wuskutkuje majkanje zwěrjatow „mjenje stresoweho hormona kortizona a stopnjuje produkciju derjeměću tyjaceho oksytocina. Nimo toho móže skót w času krizy pobrachowace socialne kontakty zdźěla narunać.“
Po podaću Centralneho zwjazka coologiskich fachowych zawodow Němskeje je branša w zwisku z koronapandemiju „wobrot loni jasnje na něhdźe 5,5 miliardow eurow stopnjowała“. Najwoblubowaniše su kóčki a psy, kotrež „dwě třećinje dohromady wjace hač 35 milionow tudyšich domjacych zwěrjatow wučinja“.