W Budyšinje maja dwě nowej staciji, na kotrymajž darićelow witaja

Budyšin (SN/MiR). Darić krej je dźeń a wažniše. „Tež w lěću, na horcych dnjach, njeje to wobćežnišo hač hewak“, zdźěli na naprašowanje rěčnica Krej darićelskeje słužby sewjerowuchod Němskeho čerwjeneho křiža (DRK) Ina Mirtschin, „trjebamy darićelow kreje za zastaranje pacientow.“ Tuž je institucija tež w Budyšinje po puću a wabi darićelow a darićelki. Nažel njehodźa so preparaty kreje předołho składować, tuž je wobstajny angažement darićelow trěbny. Runje w lěću a předewšěm hdyž horcota traje, skorži tež darićelska słužba DRK Sewjero-wuchod pomjeńšowacych so dnjowych składow dla. Tež ličba darićelow woteběra. To pak móže wjesć ke kritiskim situacijam při zastaranju ludźi, kotřiž krej trjebaja. Bernd Szwirblatt je tajku situaciju dožiwił. Jeho na rak schorjeny nan bě w chorowni zemrěł, dokelž njemějachu dosć konserwow kreje. Te­hdy bě wulka horcota a jenož mało ludźi bě krej dariło. „Běch so tehdy sebje samoho prašał, što sam činju, zo njeby so tajke něšto stało.