„Posłuchaj lěkarja, prjed hač jeho ­trjebaš!“, serbske přisłowo namołwja.

Tuž wěnuje so student mediciny ­Pětr Dźisławk znatym a mjenje znatym chorosćam, zo by je ­čitarjam trochu ­bliže rozłožował (21).

Přimńće sej raz kedźbliwje za šiju na wysokosći kyrka. Tutón nadeńdźeće tam, hdźež maja mužojo mjenje abo bóle prominentnje so jewjacy wohryzk. Kyrk při póžěranju tež horje a dele pućuje. Hnydom pod kyrkom čujeće mjechki organ, kiž je za mnoho procesow čłowječeho ćěła wažny, husto pak nažel tež zawinowar chorosćow: tarčowu žałzu. Wona produkuje hormony, kiž postajeja rytmus přeměny maćiznow w ćěle. Bjez tarčoweje žałzy by runowaha tychle procesow mylena była.