Klinika Łužiska jězorina podwoji wukubłanske městna za hladanje

Budyšin (SN/ VaŽ). Mjeztym zo powšitkowny přirost personala w sakskim strowotnistwje wočiwidnje popušća a hladanska branša demografiskeje změny dla před wulkimi wužadanjemi steji, je tež pozitiwnych wuwićow: We Wojerecach zwěsća chorownja Łužiska jězorina nahladny postup požadarjow. Hdyž wukubłanje w septembru zahaja, změja tam z 50 wukubłacymi dwójce telko kaž dotal. Minjene lěta su wukubłacych zaměrnje wabić dyrbjeli, zo bychu swoje 25 městnow pjelnili. Lětsa pak mějachu hižo spočatk apryla dosć požadanjow za wobě rjadowni. Tuž móžeja sej samo najlěpšich šulerjow wupytać. Přičiny za stupacy zajim su mnohostronske: angažowana powołanska orientacija na šulach, zaměrne zjawnostne dźěło a modernizowana powołanska šula za hladanje, kotraž nazymu swoje durje we Wojerowskej chorowni wotewri.