Je tak daloko. W 3. koparskej lize Němskeje započnje so, kaž we wšěch druhich, tak mjenowana rozsudna faza. Su to poslednje hrajne dny, w kotrychž dźe wo postup, zestup abo kwalifikaciju za pokalne koło Němskeho koparskeho zwjazka DFB. 15 dypkow w pjeć hrach je maksimalnje docpějomnych. Dynamo Drježdźany steja po 33. hrajnym dnju z jednym dypkom předskoka před Arminiju z Bielefelda na 1. městnje w tabulce. Team trenarja Thomasa Stamma ma jasny cil: Postup. To aktualnje derje wupada. Přiwšěm pak njesmědźa popušćić, dokelž je tabulka jara wuska.

W krajnej stolicy su sej přiwšěm wěsći, zo zmylki minjenych dweju lět njewo­spjetuja. Dwójce skomdźichu snadnje postup, dwójce hrubych zmylkow dla. Nowy trenar, nowe mustwo, samsne zmylki? Naposledk wudobychu sej čorno-žołći w zašłych třoch hrach „jenož“ štyri z móžnych dźewjeć dypkow.

Posledni přećiwnicy za Dynamo Drježdźany: Saarbrücken, Sandhausen, Bielefeld, Mannheim a Unterhaching.

Theodor Wajdlich

SJ Wołbramecy –

SJ Chrósćicy II 2:1 (0:0)

Zestawa hosći: Mark – M. Donat, F. Zahrodnik, T. Donat, Handrik, Budar (72. Wowčer), Sćapan, J. Donat, G. Zahrodnik, M. Zahrodnik (78. Klemenc), Kř. Zahrodnik (67. Pöpel)

We Wołbramecach (Steinigtwolmsdorf) bě druhe koparske mustwo SJ Chrósćicy k dypkowej hrě nastupiło. Po dźělenju dypkow w serbskim derbyju dyrbjachu dalše dypki sćěhować.

Na małym hrajnišću wuwi so wot spočatka sem napjata hra. Domjacy cyłk měješe bul dlěše fazy pod kontrolu a jewješe so tež něšto króć před wrotami Chróšćanow. Tola třělwy wrota misnychu. W 20. min. pak bě po flance z praweje strony hrajer před wrotami swobodny. Tón sej bul hišće raz doprědka połoži. Z tym zamó wrotar Matej Mark třělcej napřećo hić a třělwu wotwobarać. Chróšćenjo sami spytachu na přećiwnika wulki ćišć wukonjeć, sej bule zdobyć a spěšnje před wrota přińć. To so jim tež hdys a hdys poradźi, tola tak wuhrate třělwy běchu njedokładne a wrota misnychu. Tak dźěštej mustwje bjez wrotow do połčasa.

Póst Germania Budyšin –

Sokoł Ralbicy/Hórki 1:1 (1:0)

Zestawa hosći: Schöne, B. Heidorn, Rachela (80. Domaška), Wałda, Woko (64. Hicka), Rawš, Gloxyn, Mikławšk (46. Korjenk), Mjechela, Bejma, Šnajder (72. Bejmak)

Na domjacu hru w prěnjej połseriji přećiwo Budyšanam so Sokoljo rady dopominaja, dokelž poradźi so jim prěnje domjace dobyće. Mjeztym pak bě so přećiwnik na pjate městno tabulki polěpšił. Z tym bě faworit w tutej hrě.

Trenar Christoph Gloxyn wupraji młodemu cyłkej swoju dowěru a wostaji nazhonitych zajacow kaž Fabiana Korjenka, Pětra Domašku a Křesćana Bejmaka najprjedy raz na ławce.

HZ ST Hodźij 04/ST Huska –

ST Marijina hwězda 0:2 (0:2)

Zestawa hosći: D. Matik - Luk. Hoge, J. Zelnak, E. Bulank, T. Jurš, Fe. Langer, A. Eldor, Fl. Bulank, F. Zelnak (20. J. Ladewig), J. Pakoßnik (84. R. Wende), F. Kreuz (46. R. Cyž)

Razantnje bě so sobotniša hra za klóšterskich koparjow w Hodźiju započinała. Po třoch mjeńšinach mějachu woni mjenujcy přez Floriana Kreuza a Feliksa Langera hižo dwě šansy na zažne nawjedowanje.