TSV Wachau –

SJ Chrósćicy 3:0 (1:0)

Zestawa hosći: Škoda – Mark (53. Hawš), F. Cyž, Zynda, B. Cyž (68. L. Zahrodnik), Handrik (65. Graf), Wornar (53. Matik), M. Zahrodnik, Bogusz, Młynk (53. Rätze)

Tydźenja dojědźechu sej Chróšćenjo do Wachauwa. Po dobrym starće do sezony chcychu hosćo dalše dypki hromadźić a z tym zwisk k prědnim městnam tabulki dźeržeć. Zo njebudźe to lochka hra, bě wot spočatka widźeć.

Domjacy hibachu so hłuboko w swójskej połojcy. Tak běchu rumy za SJC chětro małke. Hosćo wot spočatka hru kontrolowachu a mějachu hnydom móžnosć k nawjedowanju. Třělwa Bosćija Cyža z kromy šěsnatki pak padny z łaty zaso do hrajnišća. Hrajerjo SJC dale w ofensiwje za rumami pytachu. Ale derje organizowany škit domjacych jim wjele njeskićeše. Jednotliwe třělwy z distancy wulce strach za wrotarja njewubudźichu. W tamnych ofensiwnych akcijach falowaše prawa ideja abo spěšnosć. Na druhej stronje spytachu domjacy přeco zaso konterować abo přez standarty k móžnosćam přińć. Hdys a hdys so tak tež strašnje před wrotami Jakuba Škody jewjachu. Krótko do połčasa pak wuhrachu sej domjacy konter a docpěchu w 43. min. 1:0.