Za tydźeń wulki jubilej
Sernjany. Hižo wjele měsacow přihotuja w Sernjanach 600. róčnicu prěnjeho naspomnjenja wsy. Za tydźeń wotměje so nětko wulki jubilejny wjesny swjedźeń. Po dźaknej Božej mši wutoru we 18.30 hodź. w Ralbicach započnje so hołk a tołk pjatk z natočenjom piwa a z wubědźowanjom wohnjowych woborow. W 21.30 hodź. přeprošuja na swjedźenišću při Klóšterskej wodźe na kinowe předstajenje. Sobotu wot 14 hodź. přewjedu soccerowy turněr a tak mjenowane meli-zetkanje Tři Hwězdy. Wječor budu reje z kapału „nAund“. Po njedźelnym rańšim piwku móža wopytowarjo dožiwić, kak Serbski rozhłós live ze Sernjan wusyła. Mjez druhim zaklinči nowa serbska pop-hudźba. Dalši wjeršk budu wot 14 hodź. historiske wustajeńcy na wjacorych statokach wsy. Wječor wuklinči z diskoteku. Sernjanski wjesny klub wšitkich na wulki jubilej přeprošuje a skedźbnja tohorunja na to, zo budźe wo ćělne derjeměće ze wšěm trěbnym postarane.
Nowa wustajeńca
Swobodne dźěłowe městno
Smječkecy. Za hladanje a spěchowanje ludźi ze zbrašenjemi pytaja w Smječkečanskim Domje swjateho Jana fachowu móc w hladanskej słužbje. Městno z dźěłowym časom 30 hodźin wob tydźeń ma so 1. septembra 2019 wobsadźić. Nadrobniše informacije k žadanjam na městno, k dźěłowemu wobłukej a tarifowym postajenjam namakaja zajimcy internetnje na stronje www.christliches-sozialwerk-ggmbh.de.
Poradźuja tež w prózdninach
Budyšin. Powołanski informaciski centrum Budyskeje agentury za dźěło skedźbnja na to, zo tam tež za čas prózdnin wo wukubłanskich a studijnych móžnosćach poradźuja. Wšelake informaciske poskitki móža zajimcy bjez přizjewjenja wužiwać. Najwšelakoriše podłožki, informaciske mapy a filmy posrědkuja dohlad do wukubłanskich a studijnych móžnosćow. Sobudźěłaćerjo rady dale pomhaja. Informaciski centrum na Nowosólskej je přistupny wot póndźele do srjedy stajnje wot 8 do 16 hodź., štwórtk wot 8 do 18 hodź. a pjatk wot 8 do 12 hodź.
Z dypkami molować
Połoža zakładny kamjeń
Kulow. Na sportnišću Kulowskeho sportoweho towarstwa DJK połoža přichodnu wutoru, 23. julija, zakładny kamjeń za nowe socialne twarjenje, kotrež ma dotalne narunać. W starym běchu nuzniki skóncowane, tepjenje často wupadny a cyły dom bě dodźeržany. Nětko stworja porjadne poměry za hrajerjow kaž tež za přihladowarjow, rjekny twarski nawoda Udo Popjela.
Na folklorny festiwal
Hórki. Jánošíkove dny w Terchovje přićahuja kóždolětnje zajimcow słowakskeje a mjezynarodneje folklory. Tež bus ze Serbow pojědźe wot 2. do 4. awgusta na mjezynarodny folklorny festiwal do Słowakskeje. W nocy na pjatk bus wotjědźe. Po puću sej historisku drohoćinku Słowakskeje wobhladaja. Po krótkim přebytku w hotelu w Žilinje pojědu na festiwalnišćo. A tež sobotu chcedźa tam přebywać. Někotre městna w busu su hišće swobodne. Štóž chce sobu jěć, njech přizjewi so pola Šołćicow w Hórkach pod telefonowym čisłom 035796 /95012.
Z kajakom po Sprjewi
Do wowčernje pohladnyć
Kobjelń. Na wosebity prózdninski poskitk přeproša zarjadnistwo biosferoweho rezerwata Hornjołužiska hola a haty přichodnu wutoru do Kobjelnja (Göbeln) pola Klukša. Na tamnišim Sprjewinym dworje Iny Schmidt dóstanu zajimcy wot 10 do 12 hodź. dohlad do dźěła wowčernje, do plahowanja wowcow a jich strowoty a móža ratarstwo cyle zbliska dožiwić. Wobdźělenje płaći dwaj euraj na wosobu. Zajimcy njech zazwonja pod čisłom 0172/352 76 42.
Swjedźenska brošurka wušła
Wojerecy. Składnostnje 60lětneho wobstaća Wojerowskeho zwěrjenca je minjene dny swjedźenska brošurka wušła, kotraž je mjez druhim w zwěrjencu, w hrodźe a w turistiskej informaciji na předań. Na 60 stronach skićeja dohlad do časa započatkow, sposrědkuja zajimawe stawiznički, předstaja sobudźěłaćerjow a jich wšědny dźěłowy dźeń a powědaja najrjeńše zwěrječe podawizny.
Za wubědźowanje molować
Kandidatow namjetować
Wojerecy. Město Wojerecy spožča kóžde druhe lěto Čestnu jehłu Güntera Petersa za wosebity čestnohamtski angažement. Wobydlerjo města kaž tež towarstwa a zwjazki móža hač do 12. septembra namjetować, štó měł lětuše myto dóstać. Namjetować móža jednotliwcow abo organizacije. Myto přepodadźa 5. decembra na Mjezynarodnym dnju čestnohamtskeho dźěła. Zapodać maja so namjety z krótkim wopodstatnjenjom w běrowje wyšeho měšćanosty na Frentzelowej 1.
Pytaja dobrowólnych
Smochćicy. Dobrowólne socialne lěto móža zajimcy tež w Smochčanskim Domje biskopa Bena wukonjeć. Na to skedźbnja kubłanišćo DrježdźanskoMišnjanskeho biskopstwa w nowinskej zdźělence. W pastoralnym dobrowólnym lěće dóstanu zajimcy dohlad za kulisy cyrkwinskeho domu, zeznaja mnohich ludźi a móža swójske projekty zwoprawdźić. Dalše informacije podawa referent Ansgar Hoffmann pod telefonowym čisłom 03 59 35 / 2 23 17.
Přihotuja festiwal
Sami ručnu klanku twarić
Budyšin. „Kašpor Pětr Nohajca a Marta Lute Wóčko“ rěka prózdninski program Budyskeho Serbskeho muzeja, kotryž poskića prěni raz zajutřišim, štwórtk, wot 13 do 14.30 hodź. Wobdźělnicy móža z dźěrateje nohajcy abo rukajcy sami mału ručnu klanku spaslić a sej tak kaž w starym času sami swoje hrajki zhotowić. K tomu sej tež hrajki zašłeho časa w muzeju wobhladaja. Štóž ma, njech sej stare nohajcy a podobne sobu přinjese. Dalše terminy su 18. a 25. julij kaž tež 15. awgust. Zajimcy njech přizjewja so pod telefonowym čisłom 0 35 91 / 2 70 87 00.
Tajny code namakać
Kamjenc. W lětnich prózdninach móža dźěći w Kamjenskim Muzeju zapadneje Łužicy wosebity tajny code pytać. Jich nadawk je wosebity fosil wuslědźić, štož scyła tak jednore njeje. Tak mjenowany miraculum traje něhdźe hodźinu a je w zastupje inkluziwny.
W prózdninach do muzeja
Budyšin. „Wobrazy krajiny“ rěka prózdninski program, kotryž Budyski Serbski muzeju přichodne tydźenje wjacekróć poskića. Wobdźělnicy zbliža sej wosebitu wustajeńcu a zhonja, čehodla je so naša domizna změniła, što je brunica a za čo so wužiwa. Skónčnje budu sami z wuhlom wobraz rysować. Prěni termin je wutoru, 9. julija, wot 13 do 14.30 hodź. Muzej prosy wo přizjewjenje pod telefonowym čisłom 03591/ 270 87 00.
Z wyšim měšćanostu rěčeć
Mały Wjelkow. Wobydlerski forum za Wulki Wjelkow, Mały Wjelkow, Zajdow, Ćemjercy a Lubochow wotměje so wutoru, 9. julija, w 19 hodź. w Małowjelkowskej hladarni Dora Schmitt. Wyši měšćanosta Budyšina Alexander Ahrens a zastupjerjo policije a mobilneho młodźinskeho dźěła budu na prašenja wotmołwjeć.
