Adwentny chór z premjeru
Hórki. Hórčanske wjesne towarstwo „Při skale“ přeprošuje na adwentne wiki njedźelu, 22. hodownika, wot 16 hodź. při gratowni wohnjoweje wobory w Hórkach. Dźěći móža tam paslić a tež rumpodich je wopyt připowědźił. Nowosć wočakuje wopytowarjow něhdźe w 17.30 hodź., hdyž wustupi prěni raz Hórčanski adwentny chór. Poskićuja tam horce wino wot winicarja, langoš, pražene kołbaski a dalše překwapjenki.
Hodowny nyšpor z Lipu
Róžant. Chór Lipa wuhotuje sobotu, 28. hodownika, w 17 hodź. tradicionelny nyšpor w swětle swěčkow w Róžeńčanskej swjatnicy. Zastup je darmotny. Zběrka po koncerće je lětsa za dźěćacu hospicnu słužbu, kotruž Zhorjelska Křesćanska hospicna słužba organizuje.
Zwukowa instalacija přistupna
Rakecy. Spirituelnu zwukowu instalaciju wo psalmje 23 móža wopytowarjo w Rakečanskej ewangelskej cyrkwi dožiwić. Wona je hač do njedźele, 2. februara, přistupna. Psalm wo dobrym pastyrju předstajeja w modernym wobdźěłanju a ze efektami swěcy. Wopytowarjo smědźa so, na hudźbu słuchajo, po cyrkwi pohibować. Boži dom je wšědnje wot 9 do 20 hodź. přistupny.
Parada jandźelow po měsće
Wiolinowy koncert w Kulowje
Kulow. Wobydlerske towarstwo za Kulow přeprošuje pjatk, 20. decembra, w 19.30 hodź. na wiolinowy koncert w Kulowskej Křižnej cyrkwi. Zarjadowanje wuhotuje Duo Lua – to stej sotře Aida a Lucía López Borrego ze španiskeho města Sevilla. W programje matej barokne twórby Bacha, Mozarta, Herranda a Chedevilla. Nimo toho zahrajetej sławny hodowny koncert „Fatto per la notte di Natale“ komponista Arcangela Corellisa kaž tež znate hodowne spěwy. Zastup je darmotny. Towarstwo prosy wo dary.
Fabrika zawrjena
Hórnikecy. Štóž planuje, hodowne swjate dny Hórnikečansku energijowu fabriku wopytać, dyrbi sej hinaši cil wupytać. Kaž turistiske zarjadnišćo zdźěli, wostanje wone wot njedźele, 22. decembra, hač do štwórtka, 26. decembra, za wopytowarjow zawrjene. Wot 27. decembra je fabrika zaso wotewrjena.
Wotewru 20. durčka
Z knjenju Móškowej paslić
Lěska. Štwórty adwentny kónc tydźenja su dźěći na zhromadne paslenje do historiskeje kładźiteje bróžnje w Lěskej pola Wjelceje přeprošene. W starodawnym twarjenju wita małych wopytowarjow Cornelia Šnipowa jako knjeni Móškowa. Sobotu a njedźelu stajnje wot 10 do 17 hodź. móža dźěći swoju fantaziju wužiwać a snano hišće posledni hodowny dari spaslić. Nimo toho w poskitku budu tam jězby z konjacym zapřahom kaž tež łužiske kulinariske speciality. Zarjadowanje organizuje Cornelia Šnipowa hromadźe z Grodkowskim towarstwom „Kicks & Olbern“. Tohorunja sobotu a njedźelu su w Lěskej stajnje wot 14 hodź. małe adwentne wiki wotewrjene, hdźež so tohorunja nad bohatym wopytom wjesela.
Radźićeljo wuradźuja
Chrósćicy. Chróšćanski wjesnjanosta Marko Kliman (CDU) přeprošuje wšitkich zajimcow na zjawnu zhromadźiznu gmejnskeje rady. Wona wotměje so štwórtk, 19. decembra, w 19 hodź. w gmejnskim a kulturnym centrumje „Łužica“. Na dnjowym porjedźe stejitej mjez druhim schwalenje wustawkow wo psyčim dawku kaž tež wudospołnjacych wustawkow projekta „Chrósćicy–Wićežny puć“.
Předstaji pomocny projekt
Chrósćicy. Sobotu, 14. decembra, w 19.45 hodź rozprawja Ulrike Flämigowa z Berlina w Chróšćanskej putniskej hospodźe wo swojim dźěle w projekće „Tent of Nations“ (Stan narodow) južnje Bethlehema a wo aktualnej situaciji palestinskich křesćanow w regionje Westbank. Hladajo na podawki lońšeho 7. oktobra předstaji wona tež swójbu Nassar, kotraž słuša ke křesćanskej mjeńšinje a kotraž wobhospodarja hižo dlěje hač sto lět winicu blisko Betlehema. Zastup je darmotny. Wo pjenježny dar za pomocny projekt so prosy.
W klóštrje wuhotuja wiki
Škotowy turněr zakónčili
Budyšin. W Budyskej rezidency seniorow su serbscy škotowarjo-seniorojo wutoru swój lětuši 12. turněr zakónčili. Dohromady 28 škotowarjow a jedna škotowarka běchu na poslednje zarjadowanje přichwatali. Cyłkowny dobyćer turněra je Manfred Hörauf z 3 045 dypkami před Eberhardom Kroschkom z 2 981 a Wolfgangom Kühnom z 2 934 dypkami. Před mytowanjom su so škotowarjo organizatoram turněra Soni Krječmarjowej, Siegfriedej Rawej und Wolfgangej Kühnej z małym prezentom podźakowali.
Adwentny koncert we Łazu
Łaz. W ewangelskej cyrkwi we Łazu wuhotuje wokalny ansambl Amici della musica sobotu, 14. decembra, we 18 hodź. adwentny koncert. Hižo 23 lět eksistowacy chór pod wuměłskim nawodom Kerstin Lieder ma jara mnohostronski repertoire spřihotowany: Wot madrigale starych mištrow, wobdźěłanych ludowych abo modernych spěwow hač k naročnej chórowej literaturje dźensnišeho časa. Wšitcy přećeljo kultury a hudźby su wutrobnje na koncert witani. Zastup je darmotny. Pjenježny dar je witany.
Pućujetaj po serbskej hudźbje
Budyšin. Pod hesłom „Pućowanja po hudźbnym swěće Serbow“ wuhotujetaj huslerjej Malte Hübner a Holm Birkholz sobotu, 14. decembra, w 19 hodź. koncert na žurli Budyskeho Serbskeho muzeja. W programje su „twórby klasiskich/romantiskich serbskich komponistow kaž tež jich „naslědnikow“ a swójske přinoški Hübnera, Birkholza a Petera Manfreda Wolfa.
Kantina přećehnje
Wojerecy. Kantina na Wojerowskim industrijnišću poskićuje zajutřišim posledni raz snědań a wobjed. Potom přećehnje na nowu městnosć do Łužiskeje kupjele. Wot 6. januara 2025 potom tam hłódnych hosći wita.
Sinfoniski koncert ansambla
Seniorojo škotuja
Budyšin. Posledni lětuši škotowy turněr serbskich seniorow wotměje so jutře, wutoru, w Budyskej rezidency seniorow. Tam zwěsća cyłkowneho dobyćerja lětušich měsačnych zetkanjow. Započatk budźe w 14 hodź. Prěni turněr 2025 wotměje so 28. januara w Lejnjanskim Kubicec hosćencu.
Serbski wječor w geoparku
Mały Kólsk. UNESCO-geopark Mužakowski zahork přeprošuje srjedu, 11. decembra w 17 hodź. na serbski filmowy a kulturny wječor. W historiskim ambienće Stareje cyhelnicy w Małym Kólsku (Klein Kölzig) předstaja serbske hodowne filmy kaž tež serbske pěsnje. Nimo toho podawaja organizatorojo regionalne jědźe a napoje. Dokelž je ličba wobdźělnikow wobmjezowana, proša wo přizjewjenje a to pod tel. čo. 035600 365607 abo z mejlku na . Wopytowarjo maja tež składnosć, sej aktualnu wuměłstwowu wustajeńcu w domje wobhladać.
Awtorka čita
Přednošuje wo Sawdi-Arabskej
Chrósćicach. We wobłuku 13. kulturneje zymy putniskeje hospody Chrósćicy přednošuje tam jutře, sobotu, wot 19.45 hodź. Beno Bělk wo Sawdi-Arabskej. Hač do 2019 bě Sawdi-Arabska za wukrajnych wopytowarjow kruće zawrjeny kraj. Po koronje tam hakle w lońšej nazymje zaso prěni cuzy do kraja přijědźechu. Beno Bělk je tam lětsa w januaru měsac dołho po cyłym kraju jěł. Wosebje jeho zajimowaše, kak so žonam w kraju wjedźe. Dale je wopytał Medinu a Mekku – za muslimow swjatej měsće, za njewěriwych pak wostanjetej zawrjenej. Kak je so jemu poradźiło měsće tola wopytać a što je tam dožiwił, budźe dźěl rozprawy. Hižo w 16 hodź. pokazuja za najmjeńšich dźěćace kino.
Wječork na nowym městnje
