Dróha zawrjena
Bolborcy. Dróhotwarskich dźěłow dla je wot dźensnišeho hač do 12. meje wokrjesna dróha wot Tellerec zawoda w Bolborcach hač ke křižowanišću statneje dróhi S 106 w Słonej Boršći dospołnje zawrjena. Tak kaž tamny dźěl dróhi do směra na Haslow ma tež jězdnja do směra na Słonu Boršć nowu asfaltowu worštu dóstać. Wjacore wokołopuće su wupisane a wjedu po wokrjesnych a statnych dróhach.
Zahroda w přewodniku
Pančicy-Kukow. W nalětnim wudaću po cyłej Němskej wuchadźaceho magacina „Der Pilger“ je nětko zelowy a zežiwjenski centrum klóštra Marijineje hwězdy w Pančicach-Kukowje sobu zapřijaty. Sobudźěłaćerka Křesćansko-socialneho kubłanskeho skutka Lisa Wuttig je so za magacin na kołopuć po klóšterskej zahrodźe z jeje 500 rostlinami podała. Nadrobnje rozłožuje wona zwisk mjez wědu rjadniskich sotrow a modernej zahrodniskej techniku. Na te wašnje chcedźa putnikow a dalšich zajimcow pohnuć, zo sej zahrodu wobhladaja.
Kćenjowy běh wirtuelnje
Film wo misionje
Chrósćicy. Film wo zakónčacym nyšporje Chróšćanskeho wosadneho misiona w lěće 2001 je w interneće přistupny. Lětsa je tomu dwaceći lět, zo su misionarojo z rjadu oblatow bjezhrěšneje knježny Marije prěni raz mision we Łužicy přewjedli. Franc Šołta bě něhdźe poł hodźiny trajacy film zestajał. Link na njón je pod www.posol.de wozjewjeny.
Za lěpšu a spěšnišu pomoc
Kamjenc. Nowu techniku je Kamjenska skupina Techniskeho pomocneho skutka dóstała. Jeje čłonojo přewzachu nakładne awto kaž tež transportne jězdźidło za wosom wosobow. Tak móža nětko přidatne nadawki spjelnić, za čož wutworichu skupinu nuzoweho zastaranja. Mjez druhim móža w katastrofowym padźe nuzowe kwartěry za wjetšu ličbu ludźi natwarić.
Lisćiki nětko na předań
Pytaja hišće rěčnikow
Budyšin. Cyłkownje 250 wulkich a małych lubowarjow serbskeho filma wopyta po zašłych pjatkach wirtuelnu kinowu žurlu a wobhlada sej synchronizowane swójbne filmy. Nastali běchu wone w kooperaciji Rěčneho centruma WITAJ, SAEK Budyšin a Załožby za serbski lud. Za aktualnu synchronizaciju pytaja hišće někotrych rěčnikow. Zajimcy njech so prošu w RCW přizjewja.
Na awtodróze zaso twarja
Porchow. Wot póndźele hač do pjatka přichodneho tydźenja saněruja na awtodróze A 4 mjez wotbóčkomaj Porchow a Ohorn do směra na Drježdźany prawu jězdnju, zo bychu tam zymske škody wotstronili. Čara je dohromady 2,5 kilometrow dołha. Za čas twarskich dźěłow wostanu prawej jězdni kaž tež Porchowska wotbóčka zawrjene. Awtodróhowa tzwr šoferow prosy, wotpowědnje kedźbliwje jězdźić.
Spominaja na zběžk
Radźićeljo so schadźuja
Ralbicy. We wobłuku zarjadniskeho zwjazka Při Klóšterskej wodźe změja zajutřišim, štwórtk, hnydom tři gmejnske rady swoje posedźenje. We 18.30 hodź. schadźuja so radźićeljo Ralbic-Róžanta w Ralbičanskej sportowej hali. Na jich dnjowym porjedźe steji mjez druhim wobhospodarjenje wodźiznow druheho rjadu přez firmu Stowasser. Nimo toho chcedźa wutworić poradźowanski gremij za nakup komunalneje techniki.
Pančicy-Kukow. Poł hodźiny pozdźišo, w 19 hodź., započnje so posedźenje gmejnskeje rady Pančic-Kukowa, a to znowa na Wotrowskej starej šuli. Jedna z hłownych temow budźe dalše saněrowanje Pančičanskeje Šule Ćišinskeho. Za to chcedźa twarske nadawki w dohromady šěsć wšelakich losach rozdawać, mjez druhim za sanitarnu instalaciju, milinu a woclotwar.
Poskićeja spěšnotesty
Kamjenc/Wojerecy. Strowotniski zarjad Budyskeho wokrjesa poskića nětko tež w Kamjencu (Garnizonowe naměsto 9) a we Wojerecach (Vis-à-vis, Hrodowske naměsto 2) darmotne spěšnotesty na koronu. W Kamjencu móža sej zajimcy terminy za jutře popołdnju a štwórtk dopołdnja skazać, we Wojerecach za srjedu cyły dźeń. Terminy rezerwować je na slědowacych stronach móžno: https://lkbz.de/testcenterbautzen (za terminy w Budyšinje, Tuchorska 23), https://lkbz.de/testcenterhoyerswerda (za terminy we Wojerecach) a https://lkbz.de/testcenterkamenz (za terminy w Kamjencu).
Wirtuelnje do muzeja
Kamjenc. Hišće hač do 11. apryla pokazuje Kamjenski Muzej zapadneje Łužicy wosebitu wustajeńcu wo kóncu lodoweje doby we Łužicy. Štwórtk, 18. měrca, w 19 hodź. poskića tam wirtuelne wodźenje po přehladce z kuratorku a archeologowku Jasmin Kaiser. Zajimcy njech přizjewja so najpozdźišo hodźinu do spočatka wodźenja pod .
Serbsce po japanskim wašnju
Wojerecy. Župa „Handrij Zejler“ Wojerecy wabi dale za swoje kamishibai-wubědźowanje za dźěći, šulerjow a dorosćenych. Wurisanje je dźěl projekta „Žiwa kuzłarska křinja serbskich bajkow“ we wobłuku fondsa „Čiń sobu!“ a běži hač do 14. apryla. Tematiski zakład přinoškow měli serbske bajki a powěsće być. Wobšěrnje wobhonić móža so zajimcy internetnje pod www.domowina.de. Kamishibai je wosebita, z Japanskeje pochadźaca forma dźiwadła z papjerjanymi figurami na jewišću, kotrež ma formu kašćika.
Pytaja aktiwneju młodostneju
Budyšin. Domowina pyta politisce zajimowaneju młodostneju jako posołow serbskeho ludu w zwjazkowej politice. Wonaj mataj w poradźowacym wuběrku za prašenja serbskeho ludu při zwjazkowym ministerstwje nutřkowneho na přikład wo serbskim młodźinskim dźěle rozprawjeć. Namołwa měri so na zajimcow w starobje 16 do 27 lět. Prezidij Domowiny chce na swojim přichodnym posedźenju 24. měrca wo młodymaj wotpósłancomaj serbskeho ludu rozsudźić.
Molowanska akcija
Jejka lětsa njedebja
Njebjelčicy. Tak kaž so lětsa žane jutrowne wiki njewotměja, dyrbja tež debjenje jutrownych jejkow wotprajić, kotrež su hewak na mnohich městnach přewjedowali. K tomu słuša tež wóskowanje jejkow z Marju Šefrichowej w Njebjelčicach. Kaž tamniše gmejnske zarjadnistwo zdźěli, stanje so tele zetkanje z woporom koronoweje pandemije. Wšitkim, kotřiž chcedźa so přiwšěm sami w debjenju jutrownych jejkow pospytać, poručeja sej w Njebjelčanskim wjesnym wobchodźe za to trěbne utensilije wobstarać.
Wupožčowanje dale móžne
Budyšin. Lockdowna dla je Budyska měšćanska biblioteka drje dale zawrjena, přiwšěm móža sej tam zajimcy dale knihi, filmy, CDje, časopisy a dalše medije wupožčować. Na internetnej stronje biblioteki, hdźež je wšón bohaty poskitk widźeć, hodźi so kniha, zynkonošak atd. telefonisce abo e-mailnje skazać a k dojednanemu terminej wotewzać. Kak to wšo funguje, zhonja zajimcy pod www.stadtbibliothek-bautzen.de.
Serbski sejm so zetka
Budyšin. 22. posedźenje Serbskeho sejma budźe sobotu, 13. měrca w 11 hodź. Na zakładźe situacije poruča prezidij wobdźělenje přez livestream. Za to zarjaduja dwě rumnosći. Štóž ma techniske problemy, so njech prošu hodźinu do posedźenja pod telefonowym čisłom 01 78 / 1 40 16 94 (Hagen Domaška) přizjewi. Za zawolenje z telefonom budźe PIN na posedźenskim dnju wot 10 hodź. k dispoziciji a hodźi so pola Hagena Domaški naprašować. Posedźenje je zjawne. Kóždy hósć móže tam swoje naležnosće a nastorki zdźělić. Rumnosć za posedźenja nańdu zajimcy pod http://posejzenje.serbskisejm.de, rumnosć z přełožkom pod http://pselozk.serbskisejm.de.
Nominuja kandidata
Wojerecy. Za wólby zwjazkoweho sejma we wólbnym wokrjesu 156 Budyšin I nominuje CDU swojeho kandidata pjatk, 12. měrca, we 18 hodź. we Wojerowskej Łužiskej hali. Na to su wšitcy wólbokmani čłonojo CDU přeprošeni. Wuměnjenje je, zo su 18. žiwjenske lěto zakónčili a zo w mjenowanym wólbnym wokrjesu bydla. Hižo w 17 hodź. wotměje so na samsnym městnje wokrjesny stronski zjězd křesćanskich demokratow.
Instalacija dlěje słyšeć
Smolerjec kniharnja wočinjena
Budyšin. Wot dźensnišeho je Budyska Smolerjec kniharnja zaso přistupna. Wot 10 do 18 hodź. móža sej tam zajimcy wudźěłki z bohateho poskitka serbskeje literatury wupytać. Kaž nawodnica kniharnje Annett Šołćic wobkrući, njetrjebaja so kupcy do toho přizjewić.
Nowa nawodnica pěstowarnje
Dźěwin. Pěstowarnja „Ptače hnězdo“ w Dźěwinje ma wot 1. měrca nowu nawodnicu. Wjesnjanosta Helmut Krautz je 25lětnej Nadine Pötschke přepodał zamołwitosć. Jeje předchadnica Sigrid Baatz poda so wuměnk. Pötschke chce za dwě lěće dalokostudij socialneho dźěła wotzamknyć.
