Cyłkownje 94 płuwarkow a płuwarjow z Němskeje a Čěskeje je so zawčerawšim, sobotu, na marathonowym płuwanju w Bjerwałdskim jězoru wobdźěliło. Čary běchu mjez 1,5 a 7,5 kilometrami dołhe. Rene Blümel (naprawo) bě jedyn z pomocnikow, kotřiž płuwarjow z čołmom přewodźachu. Do starta rozłoži wón jim wšelake optiske signale. Foto: Joachim Rjela

Najebać měnjate wjedro bě minjeny kónc tydźenja 30. diskoteka kuntworow w Salowje derje wopytana. Wjacore kapały a DJjojo, kaž Die Atzen, Marv, Küche 80, Deist & Brandenburg, DeeJay Romano, DJ Charity a DJ Ballerbarth, starachu so na dwěmaj wječoromaj wo prawu hudźbu. Hinak hač loni běchu jewišćo a wótřerěčaki do směra na zapad wusměrjene. Foto: Gernot Menzel

Wjace pjenjez wokrjesej

póndźela, 15. julija 2019 spisane wot:

Worklečanska gmejnska rada lětuši hospodarski plan schwaliła

Worklecy (SN/MWj). Poměrnje pozdźe drje, ale přeco hišće zašo hač loni je Worklečanska gmejnska rada na swojim zašłym posedźenju minjeny štwórtk hospodarski plan za tele lěto wobzamknyła. W nim wotbłyšćuje so spagat, na jednym boku wobydlerjow přidatnje njepoćežować a runočasnje wšitke winowatostne nadawki spjelnić móc.

Kaž wjesnjanosta Franc Brusk (CDU) rozłoži, ma lětuši etat wobjim 2,4 milionow eurow. Dokelž dyrbja tež wotpisanja wuzbytkować, zwostanje po planje deficit nimale 150 000 eurow. Přiwšěm so na sadźbach za ležownostnej dawkaj A a B ničo njezměni. Za to pak dyrbja něhdźe 409 000 eurow wokrjesneho wotedawka płaćić. Na financowanju zarjadniskeho zwjazka Při Klóšterskej wodźe wobdźěli so gmejna Worklecy z něhdźe 195 000 eurami. Wobě sumje stej tójšto wjetšej hač před lětom. Kónc lěta 2019 budźe komuna ze 438 eurami na wobydlerja zadołžena. To je přeco hišće daloko pod hranicu, kotraž je gmejnam w Swobodnym staće Sakskej jako hornja hranica poručena. Ta leži pola­ 850 eurow.

Šěsć intensiwnych dnjow na dobro wsy

póndźela, 15. julija 2019 spisane wot:

Brězowka (AK/SN). Mjeztym hižo 33. raz wotměje so přichodny kónc tydźenja Neptunowy swjedźeń při Brězowskim (Halbendorf) jězoru. „Je to na tradicije najbohatši a najwjetši wodowy swjedźeń Łužicy. Běchmy prěni, kotřiž su tajki organizowali“, wuzběhnje předsyda kulturneho towarstwa Brězowski jězor Sebastian Bertko. „Za nas jako zarjadowarja je to hromadźe z natwarom a wottwarom šěsć intensiwnych dnjow za cyłu našu wjes.“

W Domje swj. Jana tež pčołarjeja

póndźela, 15. julija 2019 spisane wot:
Zapósłanc Sakskeho krajneho sejma Alojs Mikławšk je minjeny pjatk statnu sekretarku w sakskim ministerstwje za socialne a škit přetrjebarjow Reginu Kraushaar (wobaj CDU) do swojeho wólbneho wokrjesa přeprosył. Wonaj a jednaćel Křesćanskeho socialneho skutka Peter Leuwer wopytachu Smječkečanski Dom swjateho Jana, hdźež jim nawoda Marko Kliman a wjesnjanosta Franc Brusk (CDU, wotprawa) wosebitosće domu rozłožištaj. Tak mjez druhim zhonichu, zo poskićuja wobydlerjam jako zaběru tohorunja pčołarjenje. Za to maja dwaj ludaj pčołkow, wot kotrejuž su lětsa hižo sto kilogramow mjedu za swójsku potrjebu žnjeli. W 3 200 kwadratnych metrow wulkej zahrodźe plahuja najwšelakorišu zeleninu. Foto: Feliks Haza

Krótkopowěsće (15.07.19)

póndźela, 15. julija 2019 spisane wot:

Předmjena nětko online

Budyšin. Na internetnej stronje soblex.de­ su nětko předmjena z knižki Tima­ Meškanka „Serbske předmjena“ zapři­jate. Kaž zdźěli Serbski institut, su jeho­ sobudźěłaćerjo wjac hač 1 200 předmjenow do internetoweho słownika za­dźě­łali. Za kóžde pokazaja tam tež ta­bulku ze wšěmi gramatiskimi formami. Podate su tež pokiwy k dźělenju. Podpěrał je naprawu Rěčny centrum WITAJ.

Nowa taflička na A 4

Budyšin. Na Silbermannowe pišćele w Chróstawje ma přichodnje tafla na awtodróze A 4 skedźbnjeć. Nimo přiražki wuchodoněmskeho zwjazka lutowarnjow su předewšěm priwatnicy přede­wzaće spěchowali. Gottfried Silbermann bě najwuznamniši twarc pišćelow baroka. W Sakskej je hišće 30 pišćelow wot njeho. Přichodny tydźeń tafličku na A 4 do směra na Zhorjelc připrawja.

Začinja „Łužisku chorownju“?

Policija (15.07.19)

póndźela, 15. julija 2019 spisane wot:

Paduchow w měsće lepili

Budyšin. Mužej w starobje 32 a 36 lět sej sobotu dopołdnja w kupnicy na Lubijskej w Budyšinje wjacore bleše palenca do swojeho nachribjetnika tyknyštaj, zo byštaj je kradnyłoj. Jako chcyše sobudźěłaćerka jeju zadźeržeć, storči jedyn z njeju žonu na bok a wobaj skućićelej ćeknyštaj. Policija pak jeju pozdźišo w měsće lepi a nachwilnje zaja. Hódnota rubizny wučinja 125 eurow.

Do wowčernje pohladnyć

póndźela, 15. julija 2019 spisane wot:

Kobjelń. Na wosebity prózdninski poskitk přeproša zarjadnistwo biosferoweho rezerwata Hornjołužiska hola a haty přichodnu wutoru do Kobjelnja (Göbeln) pola Klukša. Na tamnišim Sprjewinym dworje Iny Schmidt dóstanu zajimcy wot 10 do 12 hodź. dohlad do dźěła wowčernje, do plahowanja wowcow a jich strowoty a móža ratarstwo cyle zbliska dožiwić. Wobdźělenje płaći dwaj euraj na wosobu. Zajimcy njech zazwonja pod čisłom 0172/352 76 42.

Swjedźenska brošurka wušła

Wojerecy. Składnostnje 60lětneho wobstaća Wojerowskeho zwěrjenca je minjene dny swjedźenska brošurka wušła, kotraž je mjez druhim w zwěrjencu, w hrodźe a w turistiskej informaciji na předań. Na 60 stronach skićeja dohlad do časa započatkow, sposrědkuja zajimawe stawiznički, předstaja sobudźěłaćerjow a jich wšědny dźěłowy dźeń a powědaja najrjeńše zwěrječe podawizny.

Prěnje nadawki přepodate

pjatk, 12. julija 2019 spisane wot:

Gmejnska rada Ralbicy-Róžant zelenu swěcu za nowu pěstowarnju dała

Ralbicy (JK/SN). Jara napjata bě situacija wčera wječor w Ralbičanskim sportowym domje, hdźež je gmejnska rada Ralbicy-Róžant swoje poslednje posedźenje wólbneje doby přewjedła. Radźićeljo mějachu wažne wobzamknjenja před sobu, ale wupadaše spočatnje tak, zo njebudu wobzamknjenjakmani. Nimo schorje­neho wjesnjanosty Hubertusa Ryćerja (CDU), kotrehož Michał Šołta (SWZ Delany) zastupowaše, pobrachowachu wjacori dalši radźićeljo chorosće a dowola dla. Na zbožo pak bě naposledk telko čłonow přitomnych, zo móžachu wobzamknjenja za nowu pěstowarnju zwoprawdźić.

Wjeselo a wužadanje

pjatk, 12. julija 2019 spisane wot:
Dźensniši dźeń chcyć twarski projekt zmištrować je zwjetša zwažliwa wěc. To móžeš dokładnje planować, kaž chceš, na kóncu dyrbiš tola wjace pjenjez wudać, hač sy zwoprědka předwidźane měł. Dokónčeny přetwar bywšeje Chróšćanskeje srjedźneje šule na kulturny a gmejnski centrum je najlěpši přikład za to. 65 000 eurow wjace hač planowane za tajki projekt wudać žno je šwarna suma. Komuna drje ma často hišće móžnosće, w swojim etaće srědki trochu tam a sem suwać. Za priwatneho twarskeho knjeza, kiž moje­dla stary dom na nowy bydlenski přetwarja, by to katastrofa była. Wězo, stara twarska substanca móže stajnje překwapjenki w sebi chować, wo kotrychž do toho nichtó ničo wědźał njeje. Ale tež rjemjeslniske firmy móža sej dźensa dowolić, trochu wulkomyslnišo kalkulować. Wšako je twarskich nadawkow dosć a nadosć. Štož je potajkim wjeselo jednoho, je druhemu wužadanje. Marian Wjeńka

nawěšk

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.

nowostki LND