Chorownja swój spektrum diagnostiki rozšěriła

štwórtk, 13. decembera 2018 spisane wot:

We Wojerowskim jězorinowym klinikumje móža nětko z nowej metodu zažneje­ diagnostiki samodruhe žony přepytować a jim sčasom jasnosć wo strowoće jich dźěsća dać.

Wojerecy (SN/JaW). Łužiski jězorinowy klinikum rozšěrja swoje móžnosće diagnostiki w klinice za gynekologiju a porodowu pomoc. To zdźěla nowinski rěčnik klinikuma Gernot Schweitzer w nowinskej zdźělence. To je móžno, dokelž maja tam z dr. Robertom Lachmannom wot oktobra noweho wyšeho lěkarja. Wón poskića w jězorinowym klinikumje wotnětka tež ultrazwukowy screening wot 12. tydźenja samodruhosće. Jednaćel klinikuma Jörg Scharfenberg wopisuje jeho jako „absolutnu koryfeju“. „Dr. Lachmann wuwi ultrazwukowy screening, z kotrymž je něhdźe 90 procentow wšitkich móžnych njenormalnosćow hižo wot 12. tydźenja samodruhosće spóznajomnych. Tak móžemy tajke sčasom wuzamknyć abo je samo wotwobarać. Wjeselu so, zo móžemy tak ze specielnymi rěčnymi hodźinami a intensiwnym poradźowanjom přichodnym maćerjam hižo po 3. měsacu samodruhosće jasnosć wo strowoće jich dźěsća dać“, Scharfenberg wuswětla.

Choćebuskej tafli dary přepodali

štwórtk, 13. decembera 2018 spisane wot:
Podpěrani wot pilnych pomocnikow koparskeho ligista FC Energija Choćebuz su wčera tafli w delnjołužiskej metropoli dary přepodali. Při tym jednaše so zwjetša wo žiwidła, kotrež su dlěje wužiwajomne, ale tež hrajki běchu pódla. Sćelak Radijo Choćebuz bě w oktobru z podpěru patrona tafle Rolanda Kaisera mjeztym hižo druhi­ króć wobydlerjow namołwjał, dary přinošować. Na to njeběchu so jeno słucharjo sćelaka přizjewili, ale tež předewzaćeljo a fanojo koparskeho kluba, kotryž je akciju wuraznje podpěrał. Nětko trjebachu štyri transportery, zo bychu dary při­wjezli. Kai Noack (naprawo), nawoda Alberta Schweitzeroweho swójbneho skutka, bě jara wjesoły. Foto: Michael Helbig

Krótkopowěsće (13.12.18)

štwórtk, 13. decembera 2018 spisane wot:

Nowa CD Serbskeho rozhłosa

Budyšin. „Hej, Łužica“ rěka nowa CD z popularnymi serbskimi pěsnjemi. Projekt je Serbski rozhłós MDR z podpěru Załožby za serbski lud zwoprawdźił a dźensa­ wudał. Słyšeć móžeće tam mjez druhim Theju Čórlichec, Gabriela Mommera a Danielu Hazec. Cejdejka je w Serbskej kulturnej informaciji a w Smolerjec kniharni na předań. Spočatk noweho lěta ma tohorunja w syći přistupna być.

Podpěra tež łužiskim ratarjam

Drježdźany. Zarunansku přiražku 15,7 milionow eurow płaća tele dny něhdźe 2 900 ratarskim zawodam we wróćostajenych kónčinach Sakskeje, mjez druhim w Hornjołužiskej krajinje hole a hatow. Pjenjezy su z europskeho ratarskeho fondsa k wuwiću wjesneho ruma, zhromadneho nadawka „polěpšenje agrarneje struktury a škita přibrjohow“ a z dawkow, kaž přisłušne ministerstwo zdźěla.

Kosmetika z kawiara

Policija (13.12.18)

štwórtk, 13. decembera 2018 spisane wot:

Ćežka zražka na S 101

Jědlica. Ćežke njezbožo sta so wčera popołdnju na S 101 mjez Hornim Wujězdom a Zejicami. Tam stej VW a Ford do so zrazyłoj. Wohnjowa wobora dyrbješe šofera Forda z pomocu hydrawliskich nožicow wuswobodźić. Dwě ćežko zranjenej wosebje dowjezechu do chorownje. Tež helikopter bě na městnje. Dróha bě dlěje hač hodźinu dospołnje zawrjena.

Zjebać so njedali

Radwor. Wobšudnicy su tón tydźeń w Radworju a wokolinje spytali telefo­nisce wobydlerjam pjenjezy wulišćić. Wudawachu so jako přiwuzni, kotřiž pjenjezy­ trjebaja. Zawołani pak njedachu so zjebać a informowachu policiju.

Jedna lipa, jedna gmejna, jedyn zaměr

srjeda, 12. decembera 2018 spisane wot:

Sakskemu krajnemu knježerstwu leži wosebje wuwiće a skrućenje strukturow a bytostnych znamjenjow wjesnych kónčin na wutrobje. Njeje jenož politisce a demokratisce trjeba, žiwjenje na wsach runje tak derje rjadować kaž w městach. Je to skerje wužadanje, zachować kulturne namrěwstwo wjesneho žiwjenja ze wšěmi jeho wosebitosćemi a jónkrótnosćemi.

Dźěći z horta Budyskeje Serbskeje zakładneje šule překwapichu wopytowarjow Budyskich Wjacławskich wikow wčera ze sepju serbskich a němskich adwentnych a hodownych spěwow. K tomu hudźachu na huslach a na trompeće. Tež rumpodicha je program­ zawjeselił, a tak přepoda jim rady małe dary z Krječmarjec kniharnje. Foto: SN/Maćij Bulank

Klětu w meji cyrkej zaróštuja

srjeda, 12. decembera 2018 spisane wot:

Chrósćicy (SN/JaW). Chróšćanska wosada hotuje so na chětro wulku twarsku naprawu. Klětu chcedźa tam mjenujcy třěchu wosadneje cyrkwje ponowić.

Kaž farar Měrćin Deleńk našemu wječornikej na naprašowanje wobkrući, je financny plan twarskeho předewzaća schwaleny. Tak dóstanje wosada za ponowjenje třěchi cyłkownje 148 000 eurow spěchowanja z programa Leader. „Cyrkej steji pod škitom pomnikow, a naša kónčina a z njej Chrósćicy přisłušeja tak mjenowanej Leaderowej kónčinje“, wosadny farar rozłoži. Kaž wón Serbskim Nowinam dale zdźěli, je mjenowana suma tuchwilu najwyša móžna přiražka ze stron Leader. „Hornc za aktualnu spěchowansku dobu wobsahowaše jenož hišće 148 000 eurow. Te su nam přizwolili“, je Měrćin Deleńk zbožowny.

Drježdźansko-Mišnjanske biskopstwo přida twarskemu projektej 192 000 eurow. Zbytk cyłkownych kóštow, kotrež wučinjeja dohromady 650 000 eurow, dyrbi wosada sama zwjesć. Dźěl trěbneje sumy je wona po informacijach Chróšćanskeho wosadneho fararja hižo nazběrała a za swoje hoberske twarske předewzaće składowała. Klětu w meji chcedźa cyrkej zaróštować.

Pyramidy a swěčkowy wobłuk

srjeda, 12. decembera 2018 spisane wot:

Njeswačidło (ML/SN). Hodownu pychu – wjace hač 50 pyramidow z rudnohór­skimi postawami a małymi božimi narodkami kaž tež palčikami, jandźelemi a hórnikami – pokazuje 40. wosebita wustajeńca Njeswačanskeho domizniskeho muzeja. Budyšan Peter Baaske, zběraćel adwentnych a hodownych ludowuměłskich wudźěłkow, předewšěm pyramidow a postawow wot rudnohórskich rězbarjow z časa NDR, je 49 požčonkow za přehladku přewostajił.

Pawšalu za gmejnski dorost

srjeda, 12. decembera 2018 spisane wot:

Njeplanowane wudawki z přidatnymi pjenjezami wurunaja

Njeswačidło (JK/SN). Na swojim poslednim lětušim posedźenju wěnowaše so Njeswačanska gmejnska rada wčera wječor tomu, rozdźělić lětuši podźěl pawšale sakskeho knježerstwa za spěchowanje wjesneho ruma we wobjimje 70 000 eurow. To wuwoła wočakowanu čiłu a kontrowersnu diskusiju. Namjetej wjesnjanosty Gerda Schustera (CDU), pjenjezy za přidatne a njeplanowane wudawki we wobłuku lětušeho hospodarskeho plana zasadźić, njemóžachu so wšitcy radźićeljo přizamknyć. Dwaj sej skerje žadaštaj, rozdźělić pjenjezy gmejnskim towarstwam za dalše spomóžne dźěło. Wjesnjanosta pak wobkrući swój namjet prajo, zo měješe a ma gmejna přidatne a wyše wudawki, zo bychu dźěći w žłobiku a pěstowarni zastarane byli. Tuchwilu zarjaduje gmejna dalše dnjowe zastaranje dźěći na Šešowskej dróze, kotrež chcedźa spočatk lěta zahajić. To je z tójšto wudawkami zwjazane. Dalša pozicija su wudawki za nakup jězdźidła, kotrež su dotal wotnajeli a za kotrež financowanje lětsa wuběži.

Chcedźa nałožk dale pěstować

srjeda, 12. decembera 2018 spisane wot:
Tež lětušu seniorsku adwentničku w Miłorazu minjenu sobotu je tamniše dźěćetko wopytało. Kóždemu z 38 přitomnych wuměnkarjow spožči wone, kaž je nałožk, žohnowanje a zbožopřeća. Po měnjenju mnohich měło tomu dale tak wostać, dołhož wjes na kromje wuhloweje jamy hišće wobsteji. Za to so mjez druhim tež předsyda kulturneho a sportoweho towarstwa Ernst-Gerd Paufler z dalšimi 52 podpěra­ćelemi zasadźa. Jako překwapjenku wobdarichu wšitkich ze samozhotowjenymi paslenkami.­ Foto: Martina Arlt

nawěšk

  • Minjenu sobotu, 24. nowembra, wotmě so Budyskim NSLDź lětuša Schadźowanka. Tule namakaće někotre fotowe impresije.
Das alljährliche Treffen der sorbischen Studierenden, Absolventen und Gymnasiasten Schadźowanka fand am Samstag, den 24. November, zum

nowostki LND