Rakecy (UM/SN). Rozsud wo saněrowanju fasady młodźinskeho a towarstwoweho domu w Rakecach je tamniša gmejnska rada wotstorčiła. Hižo w měrcu 2022 běchu dźěła prěni raz wupisali a šěsć firmow wo poskitk prosyli. Dóšoł pak je tehdy jenož jenički poskitk, tak zo njejsu žadyn nadawk přepodali.

Kaž Martina Nytsch-Menzel z twarskeho zarjada gmejny praji, je so fasada mjeztym dale pohubjeńšiła. Tuž je so financny wuběrk komuny loni w meji znowa z temu zaběrał. Wuběrk poruči, saněrowanje fasady wospjet wupisać. Financować chcychu to ze srědkow inwestiwnych klučowych připokazanjow. Najlěpši poskitk we wobjimje nimale 31 500 eurow je twarske předewzaće z Łaza zapodało. „Při dokładnym wobhladanju twarjenja pak nas fachowcy na to skedźbnichu, zo móhło so při tak starym twarjenju stać, zo so po saněrowanju wobmjetka samsne škody znowa jewja“, Rakečanski wjesnjanosta Swen Nowotny (CDU) rozłoži. Tónle pokiw bě tež wobstatk poskitka za ponowjenje fasady. Łazowska firma njemóže garantować, zo je dołhodobna kwalita noweho wobmjetka zaručena.

Choćebuz (SN/MiP). „Hač na mały wot­rězk ‚Tranitzhaff‘ na juhowuchodźe je Liškowski jězor (Ostsee) prěni raz nimale scyła z wodu pokryty“, to wozjewi tydźenja energijowy koncern LEAG na swojej internetnej stronje. Tuchwilny staw wody jězora je 60,2 metrow nad nulu a cyłkowny wolumen wody je z tym na 130 milionow kubiknych metrow rozrostł. Start zapławjenskich dźěłow běše w aprylu 2019. Wot lońšeho oktobra sem je LEAG dohromady něhdźe 30 milionow kubiknych metrow wody ze Sprjewje do jězora pušćiła. Po doskónčnym napjelnjenju změje Liškowski jězor cyłkownje 256 milionow kubiknych metrow wody.

Dr. Thomas Koch, nawoda wotrjada za geotechniku w koncernje, je z wuwićom něhdyšeje wuhloweje jamy w sewjeru Choćebuza jara spokojom: „Dospołnje z wodu pokryty Liškowski jězor je wažny měznik w krajinowym a infrastrukturnym projekće, kotryž ma tež wulki wuznam za region“. Přiwšěm wšak budu hišće někotre zapławjenske fazy hač k planowanemu doskónčnemu stawej wody we wysokosći 62,5 metrow nad nulu trěbne. „Krok po kroku pak wuwiwa so projekt k jězorej, na kotryž mnozy hižo žadosćiwje čakaja“, wón podšmórnje.

Hornjołužiska komornohudźbna akademija rěka format, z kotrymž chce Hornjołužiski komornohudźbny festiwal „kowarnju talentow za wulce wobdarjenych młodych wuměłcow“ wutworić a tak w dwulětnym rytmusu muzikaliski dorost regiona spěchować. Wčera je druhi raz wuhotowana akademija z 15 wobdźělnikami na Hrodźišćanskim hrodźe zaběžała.

Zhorjelc/Hrodźišćo (SN/bn). „Wjeselu so, zo móžemy w našej lětušej akademiji prěni raz smyčkarjow, drjewjanych a blachowych dujerjow jenak wobkedźbować. Johan Wolfgang von Goethe je rjekł: ‚Hudźba je najrjeńša a zdobom jenička rěč, kotraž so wšudźe na tymle swěće zrozumi.‘ Wjeselu so tuž zdobom, zo móža so akademisća nětkle najrjeńšej uniwersalnej rěči wěnować, kotraž budźe jich něhdy po cyłym žiwjenskim puću přewodźeć“, festiwalowy intendant dr. Hagen W. Lippe-Weißenfeld wuzběhny.