Jězoraj ležitej jemu na wutrobje
Kaž w mnohich druhich komunach wola tež w Dźěwinskej gmejnje 12. junija noweho wjesnjanostu. Nimo tuchwilneho Helmuta Krawca (SPD) nastupi tohorunja njewotwisny kandidat.
Brězowka (AK/SN). 20 hłosow wobydlerjow trjebaše Sebastian Bertko, zo móhł jako kandidat za wólby wjesnjanosty w Dźěwinskej gmejnje nastupić. Dóstał je 45. „Zo dóstach hłosy z Brězowki a z Dźěwina je mje wosebje zwjeseliło a mje zesylniło“, praji 39lětny njewotwisny kandidat z Brězowki. Wón dźěła jako wěstotny inženjer pola energijoweho koncerna LEAG.
Hižo dołho so wón tam w domizniskim towarstwje angažuje. Mjeztym dwě lěće přisłuša tež gmejnskej radźe. „Na tele dźěło chcu nawjazać. Z wotewrjenosću, transparencu a sprawnosću chcu gmejnu dale wuwiwać a čestnohamtske skutkowanje zesylnić. Wažne dale je, zo dóstanje gmejna zaso domjaceho lěkarja“, měni Bertko.
Krótkopowěsće (09.05.22)
Dóstanu wjace mzdy
Choćebuz. Po dwanaće hodźin trajacym jednanju stej so dźěłarnistwo za chemiju, hórnistwo a energiju (IG BCE) a Choćebuski koncern Łužiska energija a milinarnje (LEAG) skónčnje dojednałoj. Přistajeni předewzaća dóstanu štyri procenty wjace mzdy a jónkrótnu sumu we wysokosći 600 eurow. Pjatk popołdnju stej stronje dojednanje podpisałoj.
Start za tydźenje šulskeho kina
Budyšin. Po dwulětnej přestawce su organizatorojo šulskich kinowych tydźenjow přijeli dotal 22 000 přizjewjenjow w 46 kinach Sakskeje. Wot 9. do 20. meje wotewru kina šulskim rjadownjam wšitkich starobnych skupin swoje žurle. Zo by so we wučbje poradźiło wo filmje, kotryž su sej šulerjo wobhladali, rěčeć, předleži wšitkim filmam přewodny pedagogiski material. Zdobom poskićuja kina husto tež rozmołwy k jednotliwym filmam.
Žane nowe pady přizjewili
Spěwace ptački popadnyć a přepytować započeli
Holešow (SN/MWj). Cilpcalp, mały rokotak (Teichrohrsänger) a mnišk (Mönchsgrasmücke) běchu mjez družinami ptačkow, kotrež su fachowcy spočatk tydźenja při lětušim prěnim monitoringu populacije spěwacych ptačkow při Holešowskim haće popadnyli. 3. meje su dohromady 40 ptačkow naličili. Z toho dósta 31 prěni raz rynku wokoło nóžki. Dźewjeć ptačkow su znowa popadnyli, zdźěli Cornelia Kobalz z přirodoweje centrale Budyskeho wokrjesa.
Za tule akciju wupołoža na płoninje třoch hektarow 14 sakow na zemju a powěsnu dwaj dowysoka. Wot schadźenja słónca při šěsć kontrolnych přechodach ptački ze sakow wozmu a dokładnje přepytuja. Na to dóstanu rynku a móža zaso do swobody. Popadnu-li tele ptački na hinašim abo samsnym městnje znowa, dóstanu ornitologojo z tym informacije wo wuwiću wobstatka, wo jich rozmnoženju a šansach přežiwjenja. Hač do kónca awgusta na dohromady dwanaće terminach při Holešowskim haće saki wupołoža respektiwnje nastajeja, kaž w nowinskim zdźělenju rěka.
Policija (06.05.22)
Tójšto pjenjez zhubiła
Brězyna. Z wopačnymi powěsćemi přez Whatsapp su njeznaći 60lětnu žonu w Brězynje (Brösa) pola Malešec wobšudźili. Pozdatna dźowka pisaše, zo ma nowe telefonowe čisło, dokelž je handy skóncowany. Tohodla pječa tež swoje zličbowanki zapłaćić njemóže. Tuž prošeše „dźowka“ wo něhdźe 8 000 eurow. Žona tule sumu přepokaza. Pozdźišo so w rozmołwje z woprawdźitej dźowku wukopa, zo ta žadyn nowy handy nima a tež žane zličbowanki zapłaćić njetrjeba. 60lětna móžeše hišće połojcu pjenjez na bance storněrować, tamna połojca je fuk.
Europa w srjedźišću
Serbske popołdnjo tež lětsa
Wochozy. Po lońšim wuspěšnym serbskim popołdnju we Wochožanskim parku błudźenkow chcedźa tam tajke zarjadowanje lětsa znowa přewjesć. Wone wotměje so njedźelu, 8. meje, wot 14 hodź. Za to je Smjerdźečanska rejwanska skupina nowy program nazwučowała, kotryž nałožk mejemjetanja předstaji. Kaž organizatorojo zdźěla, pojěcha mejski kral z kralownu na konju po parku.
Wotewru přehladku
Wojerecy. Nowu wosebitu wustajeńcu „Manfred Vollmert – metalowy design“ wotewru njedźelu, 8. meje, w 10.30 hodź. w kaminowej stwě Wojerowskeho hrodu. W přehladce prezentuja dźěła Židźinskeho wuměłca z jeho dlěje hač 50 lět trajaceho kreatiwneho tworjenja. Twórby Manfreda Vollmerta su kruty wobstatk wuměłskeho wobraza Wojerec, regiona a mnohich dalšich městow. Dale widźeć budu jeho plastiki a nadawkowe dźěła za sakralne rumnosće.
Poradźuje darmotnje
Ludźi a jich ideje zapřijeć
Za město Kulow a přisłušne wsy zdźěłaja gmejnski wuwićowy koncept
Kulow (AK/SN). Za město a přisłušne wsy zdźěłaja w Kulowje gmejnski wuwićowy koncept. Wón wopřijima wšitke wobłuki zjawneho žiwjenja. Paleta temow saha wot bydlenja a wobchada přez turizm a wikowanje hač k sportej a wobswětoškitej. „Smy so wobydlerjow intensiwnje naprašowali. To běchu jara konstruktiwne rozmołwy, při kotrychž bu woprawdźe doprědka myslene“, wuzběhny Martin Neumann z měšćanskeje wuwićoweje towaršnosće (STEG) předwčerawšim na posedźenju Kulowskeje měšćanskeje rady. W nadawku města ma STEG wuwićowy koncept zdźěłać a při tym wobydlerjow kaž tež jich ideje a předstawy sobu zapřijeć.
Krótkopowěsće (06.05.22)
Wuspěšna němska premjera
Berlin. Serbska wirtuozowka na tereminje Carolina Eyckec je z wupředatym koncertom wčera w Berlinskim Zeissowym wulkoplanetariju němsku premjeru swojeje noweje tačele „Thetis 2086“ swjećiła. Dźensa slěduje dalša prezentacija nowostki na samsnym městnje. Za čas redakciskeho kónca běchu nimale wšitke zastupne lisćiki hižo předate.
Snadne wotpinanje pandemije
Budyšin/Zhorjelc. Roberta Kochowemu institutej buchu z Budyskeho wokrjesa 174 nowonatyknjenjow z koronawirusom a dwaj smjertnej padaj w zwisku z infekciju přizjewjene. Incidenca tu wučinja aktualnje 322,1. We wokrjesu Zhorjelc zwěsćichu 99 nowownatyknjenjow, dwaj schorjenej pacientaj staj zemrěłoj. Incidenca tam je so snadnje na 249,4 znižiła.
Tramwajkowu čaru ponowjeja
Policija (05.05.22)
Móraka lepili
Budyšin. W nocy na srjedu je policija w Budyšinje móraka lepiła. Z komplicu bě wón runje sćěnu domskeho Při měšćanskim nasypje pomórał, jako jeho swědk wuhlada a policiju zazwoni. Blisko Třělnišća jeju zastojnicy wuhladachu. Młodaj mužej ćisnyštaj nachribjetnik preč a chcyštaj ćeknyć. Jednoho z njeju zastojnicy dosahnychu. 19lětny měješe hišće samsnu barbu na rukomaj a na kabaće, kaž bě wona w nachribjetniku.
