Z podpěru towarstwa dale spěchować
Běła Woda (AK/SN). Koncern Łužiska energija a milinarnje (LEAG) podpěruje towarstwa w Běłej Wodźe kaž tež kulturne projekty lětsa z dohromady 70 000 eurami. Wotpowědne partnerske dojednanje wo zhromadnym dźěle z lěta 2011 – tehdy běchu je hišće zastupnicy Vattenfalla a města Běłeje Wody podpisali – energijowe předewzaće wo lěto podlěši. Wčera su so tohorunja Běłowodźanscy měšćanscy radźićeljo k tomu wznali. Jednohłósnje je gremij podlěšenje zrěčenja kaž tež dźěłowy plan za lěto 2022 wobzamknył. W nim maja 60 000 eurow předwidźane za podpěru towarstwam a 10 000 eurow za spěchowanje projektow w kulturnym wobłuku města.
Tak su měšćanscy radźićeljo poručenje hłowneho a socialneho wuběrka města sćěhowali. „Podpěra LEAG je wažny zakład, towarstwa w měsće spěchować. Z njej móžachmy w minjenych lětach tójšto zeskutkownić“, podšmórny wyši měšćanosta Torsten Pötzsch (Klartext). „Předewšěm wobłuki sport, kultura a socialne mějachu z toho swoje lěpšiny.“
Krótkopowěsće (01.03.22)
Serbski hiphop z nowinkami
Chasow. Hiphopowa skupina Nowa Doba chce tele dny nowy spěw „Serbska lyrika“ na wjacorych hudźbnych platformach, kaž stej to na přikład Spotify abo Apple Music, wozjewić. Titul je zdobom prěnja pokazka na přichodnje digitalnje wuchadźacu EP „Budyski Bounce“, wopřijacu dalše tři, po zdźělenju wuměłcow subžanru trap přisłušace pěsnje.
Incidenca woteběrała
Budyšin. Wo 1 064 natyknjenjach z koronawirusom a dwěmaj zemrětymaj pacientomaj wot minjeneho pjatka informowaše wčera Budyski wokrjes. W samsnym času zwěsćichu we wokrjesu Zhorjelc 778 infekcijow a pjeć dalšich smjertnych padow za dobu wot 14. do 22. februara. Po RKI je incidenca zaso woteběrała, wona wučinja 1 215,4 w Budyskim wokrjesu a 876,4 w Zhorjelskim.
Wolyńscy Češa wohroženi
Wupadnjene wječory online trochu narunali
Kulow (SN/MWj). Wupadnjenych lětušich póstniskich zarjadowanjow dla je so Kulowske karnewalowe towarstwo rozsudźiło, póstnisku zabawu minjeny pjatk online ze swojeho towarstwoweho domu wusyłać. Za nje móžeše so hač do tysac zajimcow přizjewić. Wo techniskej kwaliće pak běchu přihladowarjo přesłapjeni, kaž prezident karnewaloweho towarstwa Mathias Glaab hišće samsny wječor přizna. Tohodla skićachu hižo kónc tydźenja składnosć, sej produkciju po cyłej dołhosći hišće raz wobhladać.
Wulcy a mali po wsy camprowali
Póstniska nalada na torhošću
Tež bjez žonjaceho ćaha w Kulowje sobotu karnewal knježił
Kulow (aha/SN). Wot lěta 1988 haja w Kulowje tradiciju, zo wuhotuja žony a holcy stajnje wot póstniskeje soboty do róžoweje póndźele swój karnewal z wulkim a pisanym ćahom. Před pjeć lětami, we wobłuku 30. žonjacych póstnic, bě tam dokładnje 89 wobrazow z 1 500 wobdźělnikami widźeć. Tež před lětomaj starachu so tam žony na něhdźe 2,5 kilometrow dołhej čarje w jednej z najwjetšich karnewalowych metropolow Sakskeje ze swojim mócnym „helaw“ wo wulkotnu naladu. To pak bě tehdy poslednje tajke wulkozarjadowanje, dokelž bě loni koronapandemije dla wšitko wotprajene. A zwjetša su póstniscy norojo tele postajenja w dalokej měrje akceptowali. Tež lětsa bě žonjacy karnewalowy ćah wotprajeny. Přiwšěm knježeše předwčerawšim w městačku nad Čornym Halštrowom póstniska nalada, móhłrjec pod dodźerženjom płaćiwych postajenjow. Něhdźe 400 Kulowčanow čakaše na torhošću před radnicu na póstniski ćah žonow. Tón drje njebě oficialnje připowědźeny, zaćichim jón přiwšěm wočakowachu.
Policija (28.02.22)
Bijeńca na narodninach
Sprjejcy. Narodninski swjedźeń trochu hinašeho razu je sobotu 67lětny muž w Sprjejcach dožiwił. Jako wón susodej gratulowaše, jemu dalši hósć bjez přičiny z pjasću mjezwoči dyri. Přećiwo 49lětnemu bičkej zahajichu jednanje zranjenja ćěła dla.
137 idejow za město a wsy
Wojerecy (AK/SN). Tež za lěto 2022 zdźěłuje město Wojerecy tak mjenowany wobydlerski etat. Za njón su wobydlerjo dohromady 137 namjetow zapodali. Z nich je 68 za město same a 69 za wjesne dźěle. Dźěłowa skupina je so tele dny z idejemi za město zaběrała. „Wobydlerjow takrjec dwójce zapřijimamy, jónu při namjetach a jónu při wothłosowanju“, rozłoži sobudźěłaćerka města Korina Janßen.
Jedyn z namjetow je, wodźenski system města z nowymi tafličkami wuhotować. Tuchwilne běchu składnostnje Dnja Saksow 1998 připrawili. Dalša ideja předwidźi, park skulpturow w bydlenskim kompleksu 7 znowa wuhotować a tam překasancam tyjace rostliny sadźeć. Přepruwować tohorunja móhli, hač je dosć tak mjenowanych psyčich nuznikow w měsće. Nimo toho wobydlerjo namjetowachu, w Parku narodow wjetšu kastaniju sadźić a tak wobstatk štomow wudospołnić kaž tež fasadu sportownje Foucaultoweho gymnazija z nowymi grafitijemi wuhotować. Tajki projekt hodźał so po měnjenju dźěłoweje skupiny tohorunja z wobydlerskeho etata zwoprawdźić.
Hłownu dróhu tři štwórć lěta zawru
W minjenych měsacach a lětach bě zwjazkowa dróha B 96 stajnje zaso raz twarnišćo a staraše so wo poćeženja wobchada. Nětko su dalše dźěła připowědźene, zwjazane z wulkomyslnej wobjězdku.
Wulke Ždźary (AK/SN). Twarskich naprawow za wopłóčki a pitnu wodu dla budźe zwjazkowa dróha B 96 we Wulkich Ždźarach lětsa wot apryla hač do decembra dospołnje zawrjena. „Twarske dźěła su planowane wot 4. apryla hač do 16. decembra. W tychle 37 tydźenjach budźe w štyrjoch wotrězkach twarjene“, rozłoži Łazowski wjesnjanosta Thomas Leberecht (CDU) minjene dny něhdźe 30 wopytowarjam zjawneje rěčneje hodźiny w awli Wulkoždźarowskeje zakładneje šule. Wokołopuć do Wojerowskeho kaž tež do Budyskeho směra powjedźe po statnej dróze S 108 a po zwjazkowej dróze B 156 přez Łaz a Delni Wujězd. Byrnjež dróha zawrjena była, budu wobydlerjo hač k swojim ležownosćam jěć móc.
Nadpadnjemu ludej poboku
Krótkopowěsće (28.02.22)
Incidenca zaso přiběraca
Budyšin. Po mjeńšej incidency minjeny tydźeń je hódnota po Roberta Kochowym instituće zaso přiběraca, w Budyskim wokrjesu wučinja wona dźensa 1 309,7 a w Zhorjelskim 1 025,7. Minjeny pjatk rozprawješe wokrjes Budyšin wo 624 zwěsćenych natyknjenjach z koronawirusom, wokrjes Zhorjelc poda 556 infekcijow. Kaž hornjołužiskej wokrjesaj dale zdźělištej, lěkuja dohromady 141 na koronu schorjenych w chorownjach.
Lózy hólcy w „homeofficu“
Nuknica. Lózy hólcy su dźensa swój najnowši spěw „Homeoffice“ na platformje YouTube wozjewili. Wosebity hósć a hłowny wokalist je rapper Krazy Kocor. Ze šibałym widejom, kotryž je sej dwě hodźinje po prěnjej prezentaciji hižo wjace hač sto zajimcow wobhladało, Lózy hólcy wšědny dźeń w pandemiji satirisce rozjimuja. Pytajće na mjenowanej internetnej stronje pod mjenom skupiny.
Jězbne plany znowa změnili
