Dubrawa (JoS/SN). Na štwórtu lěsnu ekskursiju je tele dny Grodkowski lěsnistwowy zawod do lěsa podłu Sprjewineho kolesowanskeho puća pola Dubrawy (Trattendorf) blisko Grodka přeprosył. Tójšto zajimcow ma tónle termin hižo dołho zapisany, wšako móžeš tež po oficialnym zarjadowanju z lěsnistwowymi fachowcami hišće wjele zajimaweho zhonić a sej z druhimi wo tym abo tamnym wuměnjeć.

Rewěrowaj hajnikaj Sylvio Raschick a Peter Noack wobdźělnikow z nowymi dopóznaćemi kołowokoło wobhospodarjenja lěsa zeznajomištaj. Něštožkuli při tym scyła tak jednore njeje. Tak su nowe próstwy wo spěchowanske srědki hač do 19 stronow wobšěrne. Samo fachowcy maja z nimi problemy. Tohodla wobsedźerjam lěsa w tym zwisku pomoc poskićeja. Dale zaběrachu so podłu Sprjewineho kolesowanskeho puća z prašenjemi zalěsnjenja z měšanym lěsom a ze zaručenjom wobchadneje wěstoty. To drje je winowatosć kóždeho wobsedźerja lěsa. Woni pak móža tež spěchowanje dóstać, hdyž na přikład wěste mnóstwo sucheho drjewa pušća.

Šunow. Adwentnička za wuměnkarjow gmejny Ralbicy-Róžant, kotraž so hižo wjele lět w Šunowskej Fabrikskej hospodźe wotměwa, tež lětsa płaćiwych koronapostajenjow za zarjadowanja dla njepřewjedu. Tole zdźěli wjesnjanosta Hubertus Ryćer (CDU) w najnowšim wudaću gmejnskeje nowiny. Wón prosy po­trjechenych wo zrozumjenje. „Nadźijamy so, zo móžemy klětu zaso na zwučene wašnje hromadźe swjećić“, rěka we wozjewjenju dale.

Renft hraje w dźiwadle

Kamjenc. Legendarna kapała Renft koncertuje sobotu, 6. nowembra, w Kamjenskim měšćanskim dźiwadle na Połčničanskej dróze. Koncert započnje so w 19.30 hodź., zastup je wot 19 hodź. Po tym zo je šěsć něhdyšich čłonow kapały zemrěło a dalšej strowotnych přičin dla hižo hrać njemóžetaj, je Thomas „Monster“ Schoppe posledni z bywšeje originalneje wobsadki. Renft bě za čas NDR jedna z prěnich beatowych skupinow, kotraž je němsce spěwała. Swojich kritiskich spěwow dla bu skupina 1975 zakazana.

Smyčkarjo w kubłanišću

Wjacezaměrowy twar móža zaso zjawnje a priwatnje wužiwać

Rowno (CK/SN). Štóž chce Rownjansku wjacezaměrowu halu wužiwać, ma za 24 hodźin 185 eurow zapłaćić. Za dwaj dnjej je to 200 eurow, tři dny płaća 300 eurow. Tole je Slepjanska gmejnska rada na swojim posedźenju předwčerawšim z jednym hłosom wzdaća wobzamknyła. Po nazhonjenjach zašłych lět sej wobydlerjo zwjetša dwaj dnjej přeja, praji nawodnica hłowneho zarjada Marion Mudra. Skazać móžeš halu jedyn abo wjacore dny, ale tež hodźinsce. Jednej hodźinje wužiwanja přiliča dalše poł hodźiny, zo bychu ludźo štwórć hodźiny přihotowanskeho časa měli a runje telko za rumowanje a rjedźenje. Woboje je w popłatku 15 eurow zapřijate. Přizjewić maja so zajimcy w Slepjanskim gmejnskim zarjedźe, a to z formularom, kiž nadeńdu na internetnej stronje gmejny.

Łaz (AK/SN). Změrča je wotewrjena, fairna, neutralna a zamjelčana. „Dyrbiš derje připosłuchać móc a wěcowny wostać. Sudźić njeje naš nadawk, ale wujednać“, měni Silke Rudolf. 55lětna z Běłeho Chołmca je wot oktobra změrča Łazowskeje gmejny. Dwě lěće bě tele městno njewobsadźene.

„Dźěłam rady z ludźimi. Móžu derje posrědkować a ludźi wujednać.“ To je jeje motiwacija, so w gmejnje a we wsy čestnohamtsce angažować. Tak je wona před nimale dźesać lětami w Běłym Chołmcu towarstwo „Pjeć počasow“ sobu załožiła. Nimo toho přisłuša sportowemu to­warstwu a wobwodnemu předsydstwu dźěłarnistwa hórnistwo, chemija a energija. Diplomowa inženjerka za geodesiju a kartografiju dźěła hižo stajnje w hórnistwje. Dźensa je wona hłownohamtska předsydka zawodneje rady za Wocho­žansku a Rychwałdsku brunicowu jamu a zastupuje zajimy něhdźe 800 dźěławych. „Ja so žanomu konfliktej njewuwinu, ale spytam stajnje rozrisanje namakać. Wšako čłowjek ze swojimi nadawkami rosće.“