Policija (01.11.21)
Wulka škoda lisća dla
Manjow. Zasadźenje dobrowólnych wohnjowych wobornikow a wulka wěcna škoda běštej wuslědk ideje, kotruž měješe sobotu popołdnju muž w Manjowje (Mönau) pola Delnjeho Wujězda. Wón chcyše na swojej ležownosći lisćo spalić. Jako so krótki čas wot wohenja wotsali, přeskočichu płomjenja wětřika dla na fasadu pódlanskeho twarjenja. Ta bu na to sylnje wobškodźena. K hašenju přijědźe nimale 60 kameradow wokolnych wohnjowych woborow. Kelko škody je dokładnje nastało, njejsu fachowcy hišće wobličili, trochuja pak ju na wjacore 10 000 eurow.
Wopity z awtom jěł
Lejno. Dobry čuch mějachu sobotu popołdnju policisća w Lejnje, jako tam nimojěducych šoferow zadźeržachu a kontrolowachu. Mjez druhim dyrbješe 57lětny wodźer Peugeota zastać. Jako jeho zastojnicy narěčachu, jim napadny, zo muž chětro za alkoholom wonješe. Při alkoholowym tesće naměrichu pola njeho 1,14 promilow alkohola w kreji. Na to policisća přikazachu, zo ma muž krej wotedać, zo móhli dokładnje zwěsćić, kelko bě wón pił. Jeho jězbnu dowolnosć zastojnicy wězo sćazachu.
Jutře žana woda
Radwor. Dokelž jutře, wutoru, w Boranecach hłowny wodowód ponowja, we wjacorych wsach Radworskeje gmejny domjacnosće w času wot 8 do 17 hodź. žanu wodu njezměja. Mjez druhim potrjechi to Radwor samy, ale tež Kamjenej, Haj, Bronjo, Łupoj, Lutobč, Chasow, Měrkow, Miłkecy a dalše wsy. To samsne płaći w Njeswačanskej gmejnje za Łahow, Zarěč, Łupjansku Dubrawku a Łuh. Wobydlerjo měli sej za jutře trěbnu wodu do bowow pjelnić. Hdyž budźe nowy wodowód přizamknjeny, móže krótkodobnje k zamućenju wody dóńć.
Z techniku wobchadźeć wuknyć
Zabawa tež bjez wětřika
Młodźinski klub Pančicy-Kukow prěni raz na pušćenje zmijow přeprosył
Pančicy-Kukow (SN/MWj). Prjedy hač je so po nazymskich prózdninach dźensa w Sakskej zaso šula započała, mějachu dźěći w Pančicach-Kukowje a jich starši wčera popołdnju rjany termin we wsy. Tamniši młodźinski klub bě prěni raz na zhromadne pušćenje zmijow přeprosył. „Před tójšto lětami je hižo raz pěstowarnja na tajke zarjadowanje přeprosyła, ale jako młodźinski klub bě to za nas premjera“, praji Jonas Pjetaš, kiž so w klubje sobu wo organizatoriske prašenje stara. Zaměr bě, wjesne žiwjenje dale wožiwić. A w nazymje so pušćenje zmijow za to wulkotnje hodźi.
Po dołho trajacych prócowanjach nětko historiski pućnik při puću ...
Krótkopowěsće (01.11.21)
Incidenca dźensa jasnje nad 300
Budyšin. Natyknjenja z koronawirusom sylnje přiběraja. Za Budyski wokrjes je Roberta Kochowy institut dźensa incidencu 341,6 podał (minjeny pjatk bě ta 280,9), za Zhorjelski 376,8. Njejapkeho rozrosta infekcijow z koronawirusom dla je Budyski krajnoradny zarjad minjeny pjatk 60 přistajenych z druhich wobłukow přerjadował, zo bychu kontakty z koronu inficěrowanych sobu zwěsćili.
Z hosćom w „Studiosession“
Halle. Ze swojim debitnym albumom w němskej rěči „Riech an Blumen (und merk dir ihre Namen)“, bě Milan Grojlich alias Rokotak předwčerawšim z hosćom we wusyłanju „Studiosession“ sćelaka MDR kultura. W rozmołwje z Janom Kubonom powědaše 46lětny wo swojim hudźbnym tworjenju a rozłoži woznam serbskeho ptačeho mjena rokotak, kotrež bě sej jako pseudonym wuzwolił.
Mlokowa produkcija wuběži
Předstaja statistiku Serbow
Stróža. Na knižne předstajenje němskorěčneje publikacije „Statistik der Lausitzer Sorben“ Arnošta Muki přeprošujetej Ludowe nakładnistwo Domowina a zarjadnistwo biosferoweho rezerwata Hornjołužiska hola a haty srjedu, 3. nowembra, w 19 hodź. do Stróžanskeho Domu tysac hatow. Wudawaćel a přełožer Robert Lorenz předstaji tute fascinowace dźěło łužiskeje a serbskeje ludowědy. Zastup za dorosćenych płaći dwaj euraj, potuńšene jedyn euro. Wopytowarjo njech wobkedźbuja płaćiwe prawidło 3G a měli wotpowědny dopokaz a wupokaz w originalu sobu měć.
Pytaja hladarku
Chrósćicy. Dom swjateje Ludmile w Chrósćicach poskića dźěłowe městno za chorobnu sotru abo hladarku starych ludźi. Mužojo smědźa so runje tak požadać, kotrež hodźi so hnydom wobsadźić. Mzda płaći so po tarifowych rjadowanjach Carity. Požadanja přijimuja z póštu, Zejlerjowa 4 w 01920 Chrósćicach, abo z majlku na . Nadrobniše informacije poda nawodnica Mónika Wenclowa pod telefonowym čisłom 03 57 96 / 94 73 30.
Hromadźa staru papjeru
Policija (29.10.21)
Něchtó na bus třělił
Wulke Ždźary. Njemało stróžił je so předwčerawšim wječor něhdźe w 20 hodź. wodźer busa na Kobličanskej dróze we Wulkich Ždźarach. Wosrjedź jězby zasłyša 59lětny wutřěl pistole a samsny wokomik so jedne z woknow jeho busa rozbi. Přiwołana policija namaka w škleńcy wokna zatřělowu dźěru, kotruž kriminalni technikarjo bliže přepytowachu. Hač su tež projektil namakali, z policajskeje rozprawy njewuchadźa. Wěcna škoda wučinja něhdźe 2 000 eurow. Tónle pad přepytuje policija nětko přećiwo njeznatej wosobje pospytneho strašneho zranjenja ćěła dla.
Rady koncertuje w ródnym měsće
Budyšin (CRM/SN). Byrnjež wón hižo dawno w swojim ródnym měsće Budyšinje njebydlił, wostanje wón jemu dale swěrny: Solowy spěwar Ronald Hein. Do dosć znateje hudźbneje swójby w lěće 1974 so narodźiwši, dósta wón tu tež swoje dobre zakładne hudźbne wukubłanje a přeńdźe potom na studij do Drježdźan. Jako tenorowy bariton je přez lěta tež někotryžkuli serbski koncert wuspěšnje sobu wuhotował, a to wosebje z pianistku Lianu Bertók.
Mjeztym zwonka Łužicy bydlo, zarjaduje Ronald Hein kóždolětnje swójski komorny koncert jako interpret klasiskeho němskeho spěwa z klawěrnym přewodom na žurli Serbskeho muzeja. Tak wěnuje wón z wulkej swěru dale darmotnu hudźbnu hodźinu na wysokim niwowje kruhej swojich starych přećelow a dalšich zajimcow. Z nim spřećeleny Michał Cyž tute koncerty nahrawa.
Lokalne onlinewiki su dobytk
Domjacych přemysłownikow móža ludźo tež internetnje podpěrać
Wojerecy (AK/SN). Zhromadnje z městom Wojerecy je předewzaće eBay w Němskej lokalne onlinewikowanišćo za Wojerecy zarjadowało. Na to skedźbnjataj Belinda Grellmann a Frank Graumüller z měšćanskeho managementa. Pod internetnej adresu www.ebay-deine-stadt.de/hoyerswerda nadeńdu zajimcy poskitki wjace hač 35 Wojerowskich přemysłowych wikowarjow. Mnozy z nich maja hižo dlěši čas wobchod w měsće. Z wužiwanjom platformy móža wobydlerjo lokalnych drobnowikowarjow podpěrać.
Dobre lěto skónča ze swjedźenjom
Štož je za ratarjow kermuša, su za łužiskich hatarjow rybarske swjedźenje. Jedne z lětsa rědkich zarjadowanjow wotměje so zajutřišim, njedźelu, w hatarstwje Armina Kittnera w Hóznicy.
Hóznica (JoS/SN). Armin Kittner je lětsa dosć spokojom. „Mějachmy dobre rybjace lěto, štož wo zašłymaj lětomaj abo tež třoch rjec njemóžu. Tehdy je nam předewšěm suchota klubu činiła. Lětsa na zbožo scyła žane problemy z wodu njemějachmy“, nazhonity hatar z Hóznicy (Petershain) w gmejnje Kwětanecy (Quitzdorf) rozłoži. Po jeho słowach mějachu w hatach idealne wuměnjenja za plahowanje. Za wusadźenje w nalěću mějachu dosć samoplahowanych małych rybičkow. Tež chorosće so žane jewili njejsu a z wotbytkom rybow přez cyłe lěto je Armin Kittner tohorunja spokojom.
