W přiradźe za serbske naležnosće města Wojerecy skutkowaše dotal dźesać wosobow. Nětko su gremij na jědnaće wosobow rozšěrili. Tole je měšćanska rada wčera wobzamknyła.
Wojerecy (AK/SN). Marcel Fröschl (AfD) Wojerowsku měšćansku radu wopušći. Jeho próstwje su radźićeljo na swojim wčerawšim posedźenju přihłosowali. Na jeho městno we frakciji AfD přińdźe Hans-Jürgen Wald. Wón přewozmje nadawki swojeho předchadnika w jednotliwych wuběrkach. Tomu słuša tež přirada za serbske naležnosće. Nimo Walda skutkuja w nim dale radźićeljo Christoph Wowtscherk (CDU), Dirk Nazdala (Swobodni Wolerjo) a Jan Kregelin (SPD). Jako wěcywustojni wobydlerjo dźěłaja we wuběrku sobu Evelin Grafowa z Wojerec, Gabriela Korchowa z Němcow, Birgit Zahrodnikowa z Ćiska, Brigita Šramina z Wojerec, Karl-Heinz Schütze z Wojerec a Gabriela Linakowa z Ćiska. Evelin Grafowa je předsydka serbskeje přirady města.
83 koronapadow w klinikach
Budyšin. W hornjołužiskich chorownjach lěkuja tuchwilu 83 na koronu schorjenych. Incidenca je po Roberta Kochowym instituće dźensa w Budyskim wokrjesu 234,9 a w Zhorjelskim 215,5. Wokrjes Budyšin je wčera wo 220 dalšich natyknjenjach z koronawirusom informował. We wokrjesu Zhorjelc rozprawjachu samsny dźeń wo 173 infekcijach.
Myto přichoda do Njebjelčic
Drježdźany. Projekt „Wnučkokmane energijowe hospodarstwo za gmejnu Njebjelčicy“ wuznamjeni sakske ministerstwo za energiju, škit klimy, wobswět a ratarstwo z Mytom přichoda 2021 w kategoriji eku. Z tym zwjazany je mytowanski pjenjez 10 000 eurow, kaž projektowy team eku Njebjelčanskeho wjesnjanostu Tomaša Čornaka tele dny informowaše.
Yücel na čole PEN-centruma
Katalyzator pokradnyłoj
Běła Woda. Dźeń a časćišo so paduši na katalyzatory wosobowych awtow měrja. Najnowši tajki pad sta so předwčerawšim w Běłej Wodźe. Tam su njeznaći wot Mercedesa katalyzator a wot Audija wobě čisle pokradnyli. Hnydom alarmowana wobsadka policajskeho awta wuslědźi na to muži w starobje 25 a 31 lět. Při jeju Audiju A6 běštej spakosćenej čisle přičinjenej. W awće samym namakachu zastojnicy pokradnjeny katalyzator kaž tež wotpowědny grat. Policisća wšitko sćazachu a wzachu paduchow sobu na policajski rewěr. Tam jich z fotami a porstowymi wotćišćemi kriminalistisce registrowachu. Pad nětko dale přepytuja.
Smochčanske kubłanišćo swjateho Bena je tele dny nowy program za nazymske a zymske měsacy 2021/2022 wudało. W nim je tójšto znatych zarjadowanjow zapřijatych, maja pak tež někotre nowe poskitki přihotowane.
Smochćicy (SN/MWj). Dohromady wjace hač 70 zarjadowanjow ma Smochčanske kubłanišćo swjateho Bena w přichodnych tydźenjach a měsacach planowane. To wuchadźa z noweho programa za nazymske a zymske měsacy 2021/2022, kotrež je kubłanske zarjadnišćo Drježdźansko-Mišnjanskeho biskopstwa nětko předpołožiło. Předwidźane maja w přichodnych měsacach, mjez druhim wjele poskitkow za nabožne, kulturne, ekologiske a politiske kubłanje. „Chcemy być městno, hdźež so ludźo zetkawaja a do rozmołwy přińdu. Stejimy w našim kraju, našej zhromadnosći a tež w našej cyrkwi wosrjedź přewróta časoweje doby. W tutym času je wažniše hač hdy prjedy, zo so mjez sobu znajemy, sej připosłuchamy a so tež wuměnjamy. Z našimi zarjadowanjemi chcemy za to impulsy a tež rum skićić“, praji rektor Sebastian Kieslich.
Budyšin. „Stop a stup“ rěka nowostka Měrany Cušcyneje, kotraž změje štwórtk, 28. oktobra, w 19 hodź. z hudźbu Jana Cyža w Budyskej Smolerjec kniharni premjeru. Awtorka wjedźe čitarja do Budyšina, powěda wo skurilnych podawkach, rozmysluje wo dźiwnosćach serbskeje rěče a česćuje basnikow a rjekow wšědneho dnja. Zajimcy njech přizjewja so pod telefonowym čisłom 0 35 91 / 57 72 88. Płaći prawidło 3G.
W prózdninach do muzeja
Budyšin. Paslenske popołdnjo přewjedu jutře, srjedu, wot 14 hodź. w Budyskim Serbskim muzeju. We wobłuku prózdninskeho poskitka móža wobdźělnicy swoje kreatiwne ideje zwoprawdźić. Zajimcy njech přizjewja so pod abo pod telefonowym čisłom 0 35 91 / 27 08 70 -0.
Budyšin (SN/pdź). Po lońšej přestawce wotměje so lětsa zaso nakupowanska nóc Romantica w Budyšinje. Sobotu, 6. nowembra, změja w nutřkownym měsće něhdźe 120 wobchodow podlěšene wotewrjenske časy a přeprošuja zajimcow na romantiski wječorny respektiwnje nócny nakup. Něhdźe połojca tutych wobchodow je w nakupowanskim centeru na Žitnych wikach zaměstnjena. Přizjewjenja su hišće móžne.
Dźensniši dźeń ma nimale kóždy młodźinski klub instagramowu stronu. Tak tež młodźinske cyłki na serbskich wsach. Tam wabja za swoje projekty, zdźěla dwurěčnje, zdźěla jenož němsce.
Radwor/Njebjelčicy (SN/pdź). W socialnych syćach, wosebje na stronje Instagram, wotměwa so wulki dźěl digitalneho młodźinskeho žiwjenja. Tu móža młodostni informacije wo swjedźenjach, projektach abo wo priwatnym žiwjenju jednorje a njekomplikowane šěrić. Tuž wužiwaja tež łužiske młodźinske kluby platformu, zo bychu wo swojich činitosćach informowali. Serbskosć hraje při tym na wotpowědnych accountach klubow zdźěla wažnu, zdźěla njewažnu rólu.
Natyknjenja sylnje přiběraja
Budyšin. Ličba z koronawirusom natyknjenych wosobow w Hornjej Łužicy dale sylnje přiběra. Za dobu kónca tydźenja je Budyski wokrjes wčera wo 235 padach informował, wot 1 273 schorjenych tam 41 w klinice lěkuja. Wokrjes Zhorjelc za samsnu dobu wo 177 infekcijach rozprawješe, tam maja 40 korona-pacientow w klinice. Techniskeho njedostatka dla njeje RKI hač do připołdnja dźensniše incidency wozjewił.
Matthias Kießling zemrěł
Žylow. Znaty Choćebuski folkowy hudźbnik, komponist a producent Matthias Kießling je minjenu njedźelu, dnja 24. oktobra, njejapcy w starobje 65 lět w swojim domje w Žylowje zemrěł. Lětdźesatki je wón nowe spěwy za delnjo- a hornjoserbski rozhłós produkował. Wosebje ze spisowaćelom Jurjom Kochom je wón zhromadnje dźěłał.
Šćedriwy dar coowej
Granatu namakali
Chrósćicy. Dźěći, kotrež sej sobotu připołdnju w Chrósćicach hrajkachu, namakachu na Puću měra jim njeznaty nastroj. Dokelž so jim metalowy objekt dźiwny zdaše, dowěrichu so wone na zbožo swojim staršim. Ći informowachu hnydom policiju. Najprjedy přijědźe wobsadka policajskeho awta, kotraž na to fachowcow za wotstronjene rozbuchadłow přiwoła. Eksperća wzachu 30 centimetrow dołhu granatu sobu.