W Bórkhamoru hižo wjele lět zhromadnje campruja. Kóždolětny wobraz wšitkich sobuskutkowacych pak njejsu tónraz w swojej Jantarowej arenje „třělili“, ale prěni raz před nowym pomnikom za historisku hamorownju. Wulkeje ličby wobdźělnikow dla je pomnik na wobrazu trochu zakryty. Ćim bóle so wupłaći, přichodnje we wsy raz pozastać a sej pomnik woměrje wobhladać. Wobdźělnicy so znajmjeńša ­wjeselachu, zo je jich fotograf takrjec na historiskim wobrazu zwěčnił. Po fotowym terminje nóžkowachu wobdźělnicy camprowanja wot statoka k statokej a sej pje­njezy, jeja abo słódnu kapku wuprosychu. Foto: Jost Schmidtchen

Projekt za nowy wotrězk kolesowanskeje šćežki podłu S 100 předstajili

Njebjelčicy (JK/SN). Podłu statneje dróhi S 100 mjez Budyšinom a Kamjencom eksistuja kolesowanske šćežki jenož na někotrych wotrězkach. Tutón staw njespokoja ani gmejny podłu wažneje dróhi ani wobydlerjow a scyła nic turistow abo hosći. Tomu ma so wotpomhać. Tak je so fachowa firma LISt GmbH, kotraž so w Sakskej wosebje z planowanjom kolesowanskich šćežkow zaběra, rozsudźiła, na teritoriju Njebjelčanskeje gmejny, podłu S 100 wot zastanišća pola Miłoćic do směra na Pančicy-Kukow naćisnyć projekt za kolesowansku šćežku. Tón su na minjenym posedźenju Njebjelčanskeje gmejnskeje rady předstajili.

Lejno. Nowy slěd škotowych turněrow serbskich seniorow w lěće 2024 su wutoru w Lejnjanskim Kubicec hosćencu zahajili. Wobdźěliło je so škotowarka a 30 škotowarjow. Mjez nimi witachu pjeć nowačkow, kaž hłowny organizator Měrćin Nowak zdźěli. Prěni turněr lěta doby Herbert Krječmar z přemóžacymi 3 127 dypkami před Erhardom Kroschkom (2 656) a Měrkom Šmitom (2 475). Přichodny škotowy turněr wotměje so 27. februara w 14 hodź. w Karstenowej Piwowej stwičce w Pančicach-Kukowje.

Stróža (SN/MWj). Po kóždolětnej ­přestawce za hladanje a wudźeržowanje wopytowarski centrum Dom tysac ­hatow biosferoweho rezerwata Hornjołužiska hola a haty w Stróži pola Hućiny wot februara zaso swoje durje za wopy­towarki a wopytowarjow wočini. Kaž ­zamołwita za zjawnostne dźěło Meike ­Biskop w nowinskim wozjewjenju zdźěli, wabja lětsa znowa z wulkej paletu za­rjadowanjow.

W Stróži njeje jenož zaso multimedialna trajna wustajeńca widźeć, kotraž wo biosferowym rezerwaće ze swojej zwěrinu a rostlinami kaž tež wo tradicionalnym hatarstwje informuje. W běhu lěta chcedźa nimo toho tři wosebite přehladki zestajić a planuja wjace hač 50 zjawnych zarjadowanjow, mjez druhim přednoški, akciske dny a poskitki za swójby. Wšitkim, kotřiž chcedźa wobstajnje wustajeńcy abo wječorne zarjadowanja w Stróži wopytać, poručeja, sej zastupny ­lisćik za cyłe lěto kupić. Jón dóstanu ­zajimcy za 15 eurow, potuńšene za dźesać eurow.