W bydlenju pjenjezy kradnyła
Běła Woda. Z woporom padušnicy sta so minjeny pjatk rentnarka w Běłej Wodźe, jako wona bluzu kupi. Pola njeje doma bě njeznata žona zaklinkała a jej drastu na předań poskićiła. 86lětna do toho zwoli a dźěše z cuzej do bydlenja. Z witriny wza wona 35 eurow. We wokomiku njekedźbnosće pak sej tamna žona dalše 40 eurow hrabny a so zminy.
Ptačecy (SiR/SN). Z pisanym swjedźenjom su minjeny kónc tydźenja w Ptačecach (Tätzschwitz) pola Wojerec 20lětne wobstaće tamnišeje šulskeje a domizniskeje stwy woswjećili. Při tej składnosći njepřewjedźechu jeno swjedźenski ćah po wsy, w kotrymž je wjele žonow w serbskej narodnej drasće sobu kročiło. Při měrowym dubje wotkrychu tež nowu serbsko-němsku infotaflu, z kotrejž předewšěm na šulsku a domiznisku stwu a jeje wosebitosće skedźbnjeja.
Korony dla je so loni lědma někajke zjawne zarjadowanje wotměć hodźało. Ćim bóle so minjeny kónc tydźenja w Slepom wjeselachu, zo móžachu kermušne wiki přewjesć.
Slepo (JoS/SN). Tajku kermušu Serbski kulturny centrum Slepo hižo dołho wjace dožiwił njeje. Při najrjeńšim nazymskim wjedrje bě 20 wikowarjow přijěło, zo bychu swoje twory poskićili. Mjez nimi běchu mnozy, kotřiž tam zašłe lěta hižo běchu, dalši přijědźechu prěni raz. Andrea a Rüdiger Budek z Lěšćow pola Grodka prěni raz pěc z drjewom zapyrichu, zo bychu tam chlěb pjekli a jón čerstwy předawali. Nowe bě tohorunja stejnišćo pólskeje kuchnje. Jeje poskitki nańdźechu mjez wopytowarjemi dobry wothłós a wočiwidnje wšitkim słodźachu. Po wšěm zdaću je tale ideja pólskich partnerow na łužiskich wikach dźeń a woblubowaniša.
Serbski institut (SI) je so wčera ze zjawnym listom přećiwo wobzamknjenju hłowneho wuběrka Budyskeje měšćanskeje rady wuprajił, zo chcedźa na Čornoboze tam 1950 zničeny pomnik Otta von Bismarcka znowa natwarić.
Budyšin (SN/CoR). „Nastróženi a z njerozumjenjom smy wobzamknjenje na wědomje brali“, rěka w lisće, kotryž staj direktor SI dr. Hauke Bartels a wotrjadnik kulturnych wědomosćow, historikar dr. Friedrich Pollack, podpisałoj. „Jako w Budyšinje zaměstnjene slědźenišćo z mnohimi kooperacijemi w tu- a wukraju distancujemy so wuraznje wot tohole rozsuda, kotryž swědči z našeho wida wo jónkrótnym zabyću stawiznow“, w spisu SI dale steji. Historiska wosobina Bismarck „so jako pozitiwna figura za wopomnjensku kulturu demokratiskeje, solidariskeje a swětej wotewrjeneje towaršnosće docyła njehodźi. Za komunu, kotraž so k lětstotki trajacej zhromadnosći Němcow a Serbow (...) wuznawa, je tajki rozsud dospołnje škódny.“
Incidenca zaso woteběrała
Budyšin. Wo 97 natyknjenjach z koronawirusom a jednym smjertnym padźe wot minjeneho pjatka je Budyski wokrjes wčera informował. Najebać to wozjewi Roberta Kochowy institut dźensa ze 97,3 nišu incidencu. Podobna je tendenca we wokrjesu Zhorjelc, tam podawa RKI dźensa hódnotu 90,2. Přez kónc tydźenja bě w Zhorjelskim wokrjesu 71 infekcijow.
Planuja wulkoinwesticiju
Gubin. Kanadiske surowiznowe předewzaće Rock Tech Lithium planuje w delnjołužiskim Gubinje připrawu za produkciju litiumoweho hydroksyda, kotryž hodźi so za twar baterijow za elektroawta. Kaž předewzaće wčera zdźěli, chce nimale 470 milionow eurow inwestować. Start produkcije je za lěto 2024 předwidźany. Rozsud wo inwesticiji mjez druhim hišće wot rozmołwow wo spěchowanskich srědkach wotwisuje.
Herntier dale měšćanostka
Bóšicy (SN/MiR). Aktualnej, na zhromadnosć wusměrjenej projektaj we Wětrowje žnějetej dobry wothłós. To wuzběhny Bóščanski wjesnjanosta Stanij Ryćer (Bóšćanske rjemjesło) na zašłym posedźenju gmejnskeje rady. We Wětrowskej bibliotece wotmě so prěnje čitanje. Zajim za dalše, kotrež chcedźa 28. oktobra přewjesć, je tak wulki, zo dyrbja zarjadowanje na žurli zetkawanišća wotměć. Tež jězbu jónu wob tydźeń z Wětrowa do Njeswačidła k nakupowanju a trěbne wobstaranja starši wjesnjenjo mjeztym dosć derje wužiwaja. „Tuchwilu je pjeć zajimcow, kotřiž kóždy pjatk rano na transport čakaja“, wotmołwi Ryćer na prašenje SN. „A su dalši, kotřiž chcedźa so přidružić.“
Dale zaběrachu so Bóščanscy radźićeljo z přepodaćom nadawka za kónclětne wotličenje 2013, za čož ma gmejna 4 046 eurow nałožić. Přichodnje chce sej poskitk wjacorych, po móžnosći třoch předewzaćow, kotrež smědźa hospodarski plan pruwować, wobstarać – a to hnydom na wjacore lěta. Po słowach wjesnjanosty dyrbja pruwowanje na kóždy pad přewjesć. „Bjez pruwowanja njeje móžno stajić próstwu na zjawne spěchowanske srědki.“
Wulku škodu zawostajili
Malešecy. Nimale 20 000 eurow škody načinichu njeznaći w nocy na minjeny pjatk w Malešecach, jako so do lakěrowanskeje firmy zadobychu. Z njeje su skowanskej nastrojej kaž tež wjacore wobruče nakładneho awta w hódnoće 10 000 eurow sobu wzali. Wěcna škoda wučinja wjace hač 8 000 eurow.