Incidenca dale nad 100
Budyšin. Incidenca po Roberta Kochowym instituće je dźensa w Budyskim wokrjesu z hódnotu 102,7 zaso trochu woteběrała. Najebać to informowachu tam wčera wo 83 dalšich natyknjenjach z koronawirusom. W Zhorjelskim wokrjesu zwěsćichu 68 nowoinfekcijow. Tamniša incidenca je stupaca, RKI je dźensa hódnotu 88,6 podał.
Maja klětu wolić
Bóšicy. Wólby Bóščanskeho wjesnjanosty budu klětu 16. januara. Na to su so wčera wječor gmejnscy radźićeljo Bóšic na swojim rjadnym posedźenju dojednali. Budźe-li druhi termin trěbny, ma so tón 6. februara wotměć. Za lětuši nowember předwidźane wólby dyrbjachu prawniskich přičin dla přestorčić. Aktualna wólbna perioda traje hač do 20. februara 2022.
Z baterijemi ćěrjene ćahi
Budyšin (SN/MWj). Powětrowa wuchowanska słužba (DRF) přewostaja nětko wot oktobra dwaj ze swojich helikopterow za zasadźenje w katastrofowym padźe. Nimo mašiny w badensko-württembergskim Rheinmünsteru jedna so wo helikopter Budyskeho zepěranišća na Lětońskim lětanišću. „Na woběmaj městnomaj smy optimalnje wuhotowani, zo móhli w katastrofowym padźe swoju pomoc poskićeć, mjez druhim z wukubłanymi sobudźěłaćerjemi“, praji nawoda předsydstwa DRF Krystian Pracz w nowinskej zdźělence.
Wobaj helikopteraj alarmuja přez centralu DRF. Je-li katastrofowy pad po płaćiwych zakonjach wuwołany, móža přisłušne zarjadnistwa k dispoziciji stejacy helikopter wo pomoc prosyć. „Zaměr je, wobydlerjam w nuzowym padźe hišće lěpše zastaranje zmóžnić“, Krystian Pracz wuswětla.
Zakazane znamjenja mórali
Budyšin. Marje-Marćinu cyrkej na Budyskim Bebelowym naměsće běchu sej njeznaći minjene dny za zakazane móranja wupytali. Kaž Zhorjelska policajska direkcija rozprawja, su tam skućićeljo z čornej barbu přećiwo wustawje měrjace so symbole we wulkosći něhdźe pjeć do dźesać centimetrow namórali. Swědcy to minjenu sobotu dopołdnja wuhladachu a informowachu policiju. Kaž wona při prěnich přepytowanjach zwěsći, bě so njeskutk najskerje w času wot minjeneho štwórtka hač do soboty stał. Wěcnu škodu trochuja na něhdźe sto eurow. Statny škit pad přepytuje.
Slepo (AK/SN). Nowu gratownju Slepjanskeje dobrowólneje wohnjoweje wobory móža twarić započeć. To wuzběhny twarski nawoda zarjadniskeho zjednoćenstwa Slepo Steffen Seidlich na wčerawšim posedźenju tamnišeje gmejnskeje rady. Oficialny start budźe přichodnu póndźelu, hdyž so zastupjerjo gmejny a twarskeje firmy k prěnjemu wuradźowanju zetkaja. Potom ma twarnišćo tež z wodu a milinu zastarane być. Hišće lětsa, tak Steffen Seidlich potwjerdźi, ma na twarnišću widźeć być, zo nowa gratownja rosće.
Bart. Malešanska gmejna tuchwilu z toho wuchadźa, zo so lětuše adwentne wiki w Barće zaso wotměja. Tuž móža so wikowarjo a towarstwa nětko za nje přizjewić a sej stejnišća rezerwować. Móžno je to e-mailnje pod adresu sekretariat @malschwitz.de abo pod telefonowym čisłom 03 59 32 / 37 70. Wikowarjow, kotřiž běchu so do korony stajnje na wikach wobdźělili, chcedźa tohorunja informować, rěka w najnowšim wudaću gmejnskeje nowiny.
Informuja tež serbsce
Wojerecy/Lejno. Sakski krajny kuratorij za wjesny rum přewjedźe přichodny tydźeń informaciskej zarjadowani, na kotrymajž móža so zajimcy wo sakskim wubědźowanju simul+ wobhonić. Wone podpěruje projekty, kotrež towaršnostnu zhromadnosć kruća, žiwjenske wuměnjenja polěpšeja a tak k strukturnemu wuwiću w Sakskej přinošuja. Prěnje zarjadowanje wotměje so póndźelu, 11. oktobra, w 17 hodź. na Wojerowskej dźěćacej a młodźinskej farmje. Dalše budźe w serbskej rěči, a to 14. oktobra w 17 hodź. w Lejnjanskim hosćencu „K Lipje“. Přizjewić so trjeba njeje. Škitne postajenja korony dla pak maja zajimcy wobkedźbować.
Lisćiki za jewišćowy bal
Lětsa žane dobre jabłukowe lěto njebě. Přiwšěm su minjeny kónc tydźenja w Mužakowskej oranžeriji wopytowarjam tójšto družin jabłukow a krušwow předstajili.
Mužakow (JoS/SN). Srjedźoeuropske dny pomologow wotměchu so minjeny kónc tydźenja w Mužakowje. Hižo štwórtk natwarichu w tamnišej oranžeriji přehladku z 355 družinami jabłukow a 27 družinami krušwow. Pjatk a sobotu slědowachu fachowe přednoški. Njedźelu pak bě přehladka zjawnje přistupna. Zajim bě wulki. Wopytowarjo chcychu wjele wědźeć, mjez druhim, kak měli stare družiny sadowcow prawje hladać a kotre družiny so na kotre městna najlěpje hodźa. Na prašenja wotmołwjałoj staj Klaus Schwartz z Lubija a Ralf Frenzel z Turjeja (Tauer), nětko w Drježdźanach bydlacy.
Debrikecy (UM/SN). Budyski wokrjes je dom za njepřewodźanych njepołnolětnych ćěkancow w Budyskim měšćanskim dźělu Debrikecy zawrěł, kaž rěčnica krajnoradneho zarjada na naprašowanje wobkrući. Naposledk bydleše tam jenož hišće dźewjeć młodych ćěkancow. „Po zawrjenju Debrikečanskeho domu njeje w Budyskim wokrjesu hižo žanoho tajkeho zarjadnišća. Aktualnu potrjebu zamóžemy z wobstejacymi domami za pomoc młodostnym zawěsćić, štož tuchwilneje małeje ličby padow žadyn problem njeje. Tež indiwiduelna podpěra potrjechenym je zaručena.“ Při tym hraje šulska a powołanska perspektiwa runje tajku rólu kaž perspektiwa, zo smědźa młodostni tu wostać.
Wjace natyknjenjow
Budyšin. We wokrjesu Budyšin su wčera wo 68 natyknjenjach z koronawirusom informowali. Wot 548 schorjenych lěkuja wosmjoch w chorowni. Incidencna hódnota je tu po Roberta Kochowym instituće dźensa na 108,1 a we wokrjesu Zhorjelc na 79,4 postupiła. W Zhorjelskim wokrjesu rozprawjachu wčera wo 69 dalšich infekcijach.
Namjetaj za koaliciske jednanja
Budyšin/Berlin. Rada štyrjoch awtochtonych narodnych mjeńšin je na wčerawšim digitalnym posedźenju wólby zwjazkoweho sejma skrótka wuhódnoćiła, rozjimajo temy, z kotrymiž chce so na nowe frakcije wobroćić. Gremij so wo to prócuje, zo strony namjetaj – mjeńšiny w Zakładnym zakonju zakótwić a mjeńšinowym organizacijam prawo skorženja zmóžnić – při koaliciskich jednanjach wobkedźbuja, zdźěli Domowina.
Sćazane zwony so nawróćeja