Tomaš Žur koncertuje
Budyšin. Na dnju němskeje jednoty, potajkim zajutřišim, 3. oktobra, wuhotujetaj wuznamny organist Tomaš Žur a saksofonist Gerold Gnausch, pochadźacaj z Baćonja resp. Lubija a skutkowacaj tuchwilu předewšěm w Berlinje, zhromadny koncert w Budyskej tachantskej cyrkwi. Zarjadowanje pod hesłom „Duchowna hudźba w měsacu róžowca“ započnje so we 18 hodź., zastup je darmotny. Při zachodźe pak wjeseli so zarjadowaca katolska wosada swj. Pětra nad šćedriwymi pjenježnymi darami.
Na prózdninske dźěło
Chrósćicy. Serbske šulske towarstwo poskići młodostnym wot 15 lět, kotřiž maja zajim na dźěle jako kubłarka/kubłar, prózdninske dźěło w swojich kubłanišćach w Hornjej a Delnjej Łužicy. Zajimcy njech so z krótkim požadanjom pod přizjewja.
Kubłanske dny za młodźinu
Worklecy. Wot 15. do 17. oktobra přewjedźe dekanatne dušepastyrstwo zhromadne kubłanske dny serbskich młodostnych we Winfriedowym domje w Schmiedebergu. Přizjewić móža so zajimcy hišće hač do wutory, 5. oktobra, ale jeničce online. Wotpowědny link podawaja pod .
Domchowanka při młynje
Akcija přećiwo brojenju zežiwidłow zahajena
Na Wojerowskej dźěćacej a młodźinskej farmje su zahajili wosebitu akciju, w kotrejž zaběraja so wuknjacy z wašnjom wobchada ze zežiwidłami. Akcija traje hač do 6 oktobra.
Wojerecy (KD/SN). „Kóždy wobydler Němskeje mjeta na lěto 75 kilogramow žiwidłow do wotpadkow, byrnjež hodźeli so tute hišće za zežiwjenje wužiwać“, rjekny minjenu wutoru Sebastian Klotsche na Wojerowskej dźěćacej a młodźinskej farmje, kotraž je w nošerstwje Křesćansko-socialneho skutka Sakska (CSB). Jako zastupjer sakskeje iniciatiwy CSB „Zežiwidła maja wulku hódnotu“ je Klotsche z tuteje přičiny z mnohimi partnerami zahajenje cyłoněmskeje akcije „Němska zachowa zežiwidła“ w Sakskej wuhotował.
Nowe bydlenja a tři studnje
Kamjenc (BG/SN). Hłownej ćežišći posedźenja Kamjenskeje měšćanskeje rady běštej předwčerawšim twarski plan za Jěžow a wotpohladane dalše spřistupnjenje wužiwanja tamnišeho lětanišća. W Jěžowje ma přichodnje 26 nowych bydlenjow nastać, při lětanišću chcedźa komunalne areale za přemysła poznamjenić a za předań spřihotować. Radźićeljo nadźijeja so, tak dalšemu wuwiću města polěkować a tuž woběmaj namjetomaj přihłosowachu.
Dalši dnjowy dypk bě podlěšenje najenskeho zrěčenja ze sportowym towarstwom Natwar Němske Pazlicy. Rada wotpowědowaše žadanju wjacorych pjenjezydawarjow kraja a Zwjazka, kotrež financuja tuchwilne wobnowjenje wulkoswětłoweje připrawy sportoweho centruma towarstwa, a rozšěri dojednanje na 15 lět. Nimorjadnje přilubichu dźěćacemu dnjowemu přebywanišću „Dołha haska“ pjenjezy za wotstronjenje njedostatkow na polu wohnjoškita.
Akcija za zalutowanje wuhlikoweho dioksyda „Die Klimawette“ bě ...
Hdźe wostanje serbski napis?
Wojerecy (TR/SN). Pódlanske foto nasta na Karla-Liebknechtowej-dróze we Wojerecach njedaloko tamnišeho železniskeho přechoda. Zwjazkowe strowotniske ministerstwo a Zwjazkowa centrala za strowotniske rozwučenje (BZgA) wabitej zhromadnje z wulkim plakatom w němskej a arabskej rěči za šćěpjenje k škitej přećiwo corona-wirusej. Zawěsće wisaja tajke tež hišće druhdźe w našej krajinje.
Plakat wuwabi prašenja. Što je z nami Serbami? Naš lud je tola w Němskej připóznata awtochtona narodna mjeńšina a serbšćina po sakskej wustawje nimo němčiny oficialna hamtska rěč. Čehodla so wona tu njejewi? Je statej strowota Serbow mjenje hódna hač strowota němsko- a arabskorěčneho wobydlerstwa? Jedna so tu hižo wo pad diskriminacije?
Bjez toho zo so wotpohlad podstaja, šěrja tajke plakaty njetrjebawšo njedowěru a njezrozumjenje, napjatosće a njedowěru. A někotryžkuli złowólny wobkedźbowar budźe jich wobsah tež hišće wjele radikalnišo interpretować.
Tute plakaty měli so zaso wotewzać abo znajmjeńša wobsahowje změnić. Abo kak mysla druzy wo tym?
Krótkopowěsće (01.10.21)
Lawreat Lessingoweho myta
Drježdźany/Kamjenc. Dramaturg a intendant Wilfried Schulz je lawreat Lessingoweho myta Swobodneho stata Sakskeje 2021. Schulze běše hač do 2016 intendant Drježdźanskeho statneho činohrajneho domu a skutkuje nětko w Düsseldorfje. Nimo toho spožča tři spěchowanske myta spisowaćelce Jackie Thomae, spěwarce Anna Mateur a žurnalistce Jasnje Zajček.
Incidenca wyše 80
Budyšin. Roberta Kochowy institut je za Budyski wokrjes dźensa incidencu 80,9 podał, za Zhorjelski 57,5. Wo zwyšenych natyknjenjach z koronawirusom stej strowotniskej zarjadaj wčera informowałoj. We wokrjesu Budyšin bě 91, w Zhorjelskim 31 nowych infekcijow. Jutře poskićeja dalšu móžnosć šćěpjenja w Budyskim Centeru na Žitnych wikach a we Wojerowskim Łužiskim centeru.
Animaciski film wuznamjenjeny
Saněrowanje dróhi pozdźišo
Kinajcht (KD/SN). Wojerowska měšćanska rada kaž tež zarjadnistwo stej mjeztym wjace króć wo wodźenju wobchada na Kinajchtskej we Wojerecach wuradźowałoj. Wobydlerjo hórša so nad haru a sylnym wobchadom. Njedawno je Dietmar Wolf, nawoda fachoweho wobłuka za twarstwo města Wojerecy, Kinajchćanam móžne warianty wodźenja dróhi na nawsy předstajił. Dróha je skóncowana a ma so zasadnje saněrować. Po ličenju wobchada w juniju wužiwa ju wšědnje něhdźe 5 000 awtow. Mnozy přijědu z Łaza. Wobydlerski rozsud wo tym, kak ma so z dróhu postupować, přeje sej wyši měšćanosta Torsten Ruban-Zeh (SPD). Planowanje projekta chcedźa hakle 2023 zahajić. Za to w lětomaj 2021/2022 planowane pjenjezy chcedźa mjeztym druhdźe wudać.
Pomocna akcija
Zejicy. Towarstwo Cyrila a Metoda z.t. chce ze swojej akciju „Łužica pomha“ lětsa znowa diecezanski zwjazk Carity w pólskim Ełku podpěrać. Přijěć chce po dary direktor Carity, prelat dr. Dariusz Kruczyński. Datum hromadźenja so sčasom wozjewi.
Zazběh za lěto Zejlerja-Smolerja
Přińdźe nazyma, přewjedu so po tradiciji kubłanske jězby Domowiny. Župa „Jan Arnošt Smoler“ wjedźeše wobdźělnikow minjenu sobotu do Łazowskich kónčin. Nichtó njemóže so wo to wadźić, hač maja tute zajězdy woprawnjene mjeno „kubłanska jězba“, je dźě zeznajomjenje z krajinu a stawiznami Łužicy dosć sylny stołp narodneho kubłanja. Čim bóle, hdyž je jězba wuraznje zazběh za přichodne lěto Zejlerja-Smolerja. Spočatnje bě turistiska atrakcija Jakubec hród w Mortkowje stacija wulěta, prjedy hač wjedźeše puć dale do Łaza.
Policija (30.09.21)
Šofer drogi při sebi měł
Hamor. Na pokiw wobydlerjow su zastojnicy z Běłeje Wody a Ludwigsdorfa zawčerawšim blisko Rychwałdskeje jamy podhladne awto kontrolowali. Šofera, kotrehož móžneho přesmykowanja ludźi přez hranicu dla zwjazkowej policiji přepodachu, měješe pjenjezy wjacorych změnow kaž tež drogi při sebi.
