Slepo (AK/SN). Hort w loni wotewrjenym Němsko-serbskim šulskim centrumje Slepo chce dołhodobnje tež přirodowu a lěsnu pedagogiku do swojeho koncepta zapřijeć. Za to wjedu rozmołwy z přirodoškitnym zwjazkom a ze statnym zawodom Sakski lěs. „Chcemy rady lěsnu skupinu w horće wutworić. To ma pilotowy projekt ze statnym zawodom być“, podšmórny nawodnica šulskeho horta Christin Becker na wčerawšim posedźenju Slepjanskich gmejnskich radźićelow. Za swój zaměr chcedźa najprjedy raz ­šulski teren wužiwać. Pozdźišo móhli sej předstajić, bliski lěs sobu zapřijeć. Dwě kubłarce so tuchwilu zaměrnje dale ­kubłatej, zo byštej sej certifikat za lěsnu pedagogiku zdobyłoj. Swój projekt chce hort ze skupinu 30 šulerjow zahajić. Za nich twarski wóz wotpowědnje wuhotuja. Šulerjo a kubłarki móža jón potom po potrjebje za wuknjenske wobsahi wužiwać.

Hdyž něhdźe cyrkej přetwarjeja abo ponowjeja, njeje to jeno z wjele pjenjezami zwjazane, ale tež wulki podawk za cyłu wosadu. Tajki projekt nětko w Njeswačidle zwoprawdźeja.

Njeswačidło (ES/SN). Spočatk meje započachu Njeswačansku ewangelsku cyrkej zaróštować. Nimo ducym zdaše so Boži dom hišće w dobrym stawje, ale runje to bě zamylace. Wšako dyrbiš za twarskimi dźěłami daloko do zašłosće hladać. ­W aprylu 1945 bu Njeswačanska cyrkej nimale dospołnje zničena. Tež wěža ­tehdy swoju hawbu zhubi.

Składnosć měć, z busom bjez popłatka do susodneje wsy jěć a sej tam něšto wobstarać, mam za wulkotnu ideju. Tajki projekt wobsteji tuchwilu we Wětrowje a měri so na tych wobydlerjow, kotřiž sami hižo mobilni njejsu. Zajimcy njetrjebaja do Njeswačidła nóžkować abo z kolesom jěć a nje­trjebaja so nikoho prašeć, hač by jich dowjezł. W busu maja bjesadu ze znatymi a hdyž wjacori z jednym wozydłom jědu, škitaja klimu. Poskitk Bóščanskeho wjesnjanosty a přede­wzaćela Stanija Ryćerja je w našich kónčinach jónkrótny. Při tym njeńdźe jemu wo swójski dobytk, ale wo pomoc. Přehusto hižo je widźał Wětrowčanow, tež w naj­hroznišim wjedrje, z nakupowanskimi tošemi w ruce z Njeswačidła domoj chwatać. Nětko móža woni z małym busom sobu jěć. Na kóncu zhonja samo ­hišće wot šofera-wjesnjanosty nowinki z gmejny, a to na zabawne wašnje. Wšako je Stanij Ryćer swojeho lóštneho a wote­wrjeneho razu dla znaty. Ja bych tajki poskitk hnydom wužiła. Milenka Rječcyna

Budyšin (SN). Z planowanym skrótšenjom zarunanych pawšalow za spěšnotestowanske centery na koronawirus hrozy deficit w syći tychle srjedźišćow, boji so Budyski krajny rada Michael Harig (CDU). „Runje w mjeńšich wjesnych komunach njeje telko testow, čehoždla je hižo nětko mnohim poskićerjam ćežko, tajke centery wobhospodarjeć“, měni Harig. „Někotři poskićerjo testow su nam hižo signalizowali, zo chcedźa dźěłać přestać, budu-li pawšale skrótšene.“ Mnohe žadane dopokazy testow njemóža zwjesć.

Krajny rada Harig je zwjazkoweho ministra za strowotnistwo Jensa Spahna (CDU) do Budyšina přeprosył, zo by jemu derje fungowacy system w Budyskim wokrjesu na městnje předstajił.