THW dyrbi so rozšěrić
Kamjenc (UM/SN). Techniski pomocny skutk (THW) w Kamjencu dyrbi so nuznje rumnostnje rozšěrić. Tole wobkrući nawoda Drježdźanskeho regionalneho běrowa THW Jens Ahlgrimm na naprašowanje. We wobłuku noweho koncepta, kotryž wjetšu specializaciju lokalnych zwjazkow předwidźi, su Kamjencej fachowu skupinu za milinowe zastaranje z wotpowědnymi jězdźidłami přidźělili. W měrcu dóstachu kameradojo wjacezaměrowe techniske jězdźidło a dalši transportny wóz. Dotal pak njemóža jej do žaneje garaže stajić. „Tohodla je so THW na zwjazkowym zarjedźe za imobilijowe prašenja prócował, problem rozrisać“, Jens Ahlgrimm rozłoži. Hdy pak to budźe, docyła jasne njeje. „To móže hač do pjeć lět trać.“ Doniž nowu halu njetwarja, dyrbitej jězdźidle wonka stać. Tam pak stej awtam sobudźěłaćerjow THW na puću. Fachowa skupina za milinowe zastaranje je kmana, kaž koparske hrajnišćo wulku płoninu wobswětlić a wjetše nuzowe kwartěry z milinu zastarać.
Płun w jamje so zapalił
Policija (31.05.21)
W měsće randalěrowali
Budyšin. Najskerje přewjele mocy mějachu w nocy na sobotu młodostni, kotřiž su w Budyšinje na Hošic hasy a na Póstowym naměsće randalěrowali. Tam spowalachu wotpadkowe sudobja a wutorhachu rostliny z kwětkowych sudobjow. Zasadźeni policisća lepichu dźesać młodych ludźi. Kelko škody su skućićeljo hewrjekajo načinili, njeje hišće doskónčnje zwěsćene. Na kóždy pad změja so woni za to zamołwić.
Wutworja dźěłowe skupiny
W Kulowje nastawa wuwićowy koncept za přichod města
Kulow (AK/SN). Wutwarić kolesowanske puće, saněrować chódniki, spěchować turizm a hospodarstwo kaž tež wobswět škitać su w Kulowje wažne ćežišća do přichoda. To je wuslědk naprašowanja dorosćenych za wuwićowy koncept města, kotrež bě Drježdźanske předewzaće STEG w minjenych tydźenjach přewjedło. „Dohromady smy 301 naprašnik wupjelnjeny wróćeny dóstali. To wotpowěduje wobdźělenju 5,2 procentow, štož směmy jako dobre wobhladować“, rjekny sobudźěłaćer STEG Martin Neumann na njedawnym posedźenju Kulowskich měšćanskich radźićelow. „Zaměr je, strategijowy koncept za přichod zdźěłać a z njeho jednotliwe předewzaća definować.“ Kaž Neumann rozłoži, njeje naprašowanje reprezentatiwne.
Naposledk tola hišće meju mjetali
Róžant (jh/SN). W Róžeńće je wjesna rada zhromadnje z młodźinu a młodymi swójbami lětsa najebać pandemiju a wšelake zakazy meju stajała a sobotu tež mjetała. Hač do poslednjeho wokomika njebě cyle jasne, hač změje Róžant lětsa tola hišće mejskeho krala a kralownu. Naposledk pak tomu tak bě. Najspěšniši hólc mjez sydom běharjemi bě Kajus Debik. Wón wuzwoli sej za mejsku kralownu Lenu Kmjećec.
Kubłanske poskitki w srjedźišću
Społnomócnjena za serbske naležnosće wokrjesa Dubja-Błóta Sabrina Kuschy zhladowaše tele dny na prěnje lěto swojeho hłownohamtskeho skutkowanja. Při tym je spěchowanske sobustawstwo wokrjesa w Domowinje „měznik“ w dotalnym dźěle mjenowała.
Lubin (SN/at). Z wokrjesom Dubja-Błóta je so scyła prěnja kónčinowa korporacija z dźělom serbskeho třěšneho zwjazka stała. Ideju za to bě Sabrina Kuschy hižo w interviewje loni w našim wječorniku rozjimała. Tajke čłonstwo wótři wid na tak mjenowane wšědne nadawki.
Krótkopowěsće (31.05.21)
Incidenca zaso stupa
Budyšin. Wuwiće incidency korony dla w Budyskim wokrjesu tuchwilu dalše wolóženja znjemóžnja. Dźensniša hódnota 65,4 po RKI je třeći dźeń za sobu wyša hač 50. We wokrjesu informowachu wot pjatka hač do wčerawšeho wo 118 koronanatyknjenjach a dalšich třoch smjertnych padach. Zhorjelski wokrjes rozprawješe wčera wo 11 infekcijach. Incidenca po RKI tam je dźensa 62,1.
Michel na druhim městnje
Lipsk/Kamjenc. Direktnu kandidatku SPD we wólbnym wokrjesu 156 Kathrin Michel su wobdźělnicy krajneje wólbneje konferency strony sobotu w Lipsku na druhe městno krajneje lisćiny za wólby zwjazkoweho sejma 26. septembra wuzwolili. Michel sama ma wuslědk za pozitiwne znamjo za wuchodnu Saksku. Na načolnym lisćinowym městnje steji Lipšćan Holger Mann.
Kritizuja plany za maut
W klóšterskej zahrodźe wěnuja so lětsa mjatwičce
Pančicy-Kukow (SN/MWj). Lubowarjo přirody a wšitcy, kotřiž chcedźa na wuchodźowanju něšto přinawuknyć, smědźa so wjeselić. Štyri tydźenje pozdźišo hač planowane móže zajutřišim, njedźelu, klóšterska zahroda w zežiwjenskim a zelowym centrumje Křesćansko-socialneho kubłanskeho skutka (CSB) w klóštrje Marijinej hwězdźe w Pančicach-Kukowje pod wobkedźbowanjom koronowych postajenjow zaso wočinić. Pilni sobudźěłaćerjo su tam minjeny čas něhdźe 4 000 lětnich kwětkow we wšelakich kombinacijach nasadźeli. Tež wulka ličba kerkow skići nětko w nalěću wosebje rjany wobraz.
Lětsa wěnuja so w klóšterskej zahrodźe wosebje mjatwičce (Minze). Wo jeje wšelakich družinach a wo jich plahowanju tam nadrobnje zhoniš. W pawiljonje poskićeja wulku ličbu regionalnych wudźěłkow z iniciatiwy „Łužica słodźi“. Lětsa maja prěni raz rozšěrjeny poskitk hojenskich a hladanskich produktow regionalnych poskićowarjow. Tohorunja prěni raz poskićeja Menschelec limonadu z Hainewaldy we wšelakich družinach, rěka w nowinskej zdźělence CSB.
Wopomnišćo online wopytać
Budyšin. Na digitalnym wopyće Budyskeho wopomnišća móža so zajimcy njedźelu, 30. meje, w 16 hodź. wobdźělić, a to pod . Bastian Hempel a Ulrich Ingenlath rozprawjataj wo wosudźe Dietera Hötgera. Wón je 1962 ze Zapadneho Berlina tunl do wuchoda twarił, bu pak přeradźeny. Dźewjeć lět trajace chłostanje wotsedźa wón w Budyšinje. Tu so jemu 1967 jako jeničkemu poradźi, přez dźěru we wonkownej sćěnje ćeknyć. Dźewjeć dnjow pozdźišo pak jeho lepichu.
Poskića šulerske protyki
Kamjenc. Šulerske protyki Sakskeho krajneho sejma za šulske lěto 2021/2022 poskića zapósłanc Alojs Mikławšk (CDU) w swojim Kamjenskim běrowje na Zapadnej 4 wot póndźele do pjatka stajnje wot 8 do 14 hodź. Nimo praktiskeho tydźenskeho planowarja informuje protyka zajimcow wo parlamentariskim dźěle.
Přijimuja skazanki
Nowoslicy. Za nalětni grilowanski wječor pjatk, 4. junija, wot 18 do 23 hodź. móža so zajimcy hač do 2. junija pola Dinarjec w Nowoslicach přizjewić. Za bifej přihotuja tam najwšelakoriše předjědźe, přiłohi a hłowne jědźe. Wo hudźbne wobrubjenje stara so kapała Brankatschki. Wobdźělenje na wosobu płaći 25 eurow.
Policija (28.05.21)
Wulku škodu načinili
Ćisk. Njeznaći běchu so w nocy na srjedu do jednoho Ćišćanskeho zawoda zadobyli. Tam wottwarichu wšelake elektriske nastroje a so zminychu. Ryzy wěcna škoda wučinja po informacijach policije 4 000 eurow. Pokradnjene techniske dźěle pak maja hódnotu šěsćcyfroweje sumy. Kriminalna policija pad přepytuje.
