Wobydlerski rozsud hakle w meji
Zadźěwki poněčim wotstronjeja
Gmejnska rada koncept za busowe zastanišća wobzamknyła
Rakecy (JK/SN). Po płaćiwych zakonjach maja w Němskej busowe zastanišća zasadnje za wužiwanje bjez zadźěwkow wukmanjene być. Termin, trěbne naprawy zakónčić, je drje hižo překročeny, Sakska pak je gmejnam hladajo na objektiwne přičiny při twarskich naprawach wjace chwile přizwoliła, žadanjam zakonja wotpowědować.
W Rakečanskej gmejnje maja cyłkownje 21 zastanišćow z 39 składnosćemi, do a z busow aktualnych linijow za- a wulězć. Gmejna je za zwoprawdźenje bjezbarjerneho přistupa do busow nastajiła wotpowědny koncept a k tomu prioritnu lisćinu. Při tym złožowaše so na ličby, kotrež bě wot Budyskeho krajnoradneho zarjada dóstała. Te wuprajeja, kelko ludźi wěste zastanišća w kotrych časach wužiwa. Tak su zastanišća do wažnych a mjenje wažnych zarjadowali, wukmanjene pak budu wšitke. Na někotrych wsach su zastanišća hižo w žadanym stawje, tak na přikład w Kamjenej a Komorowje. Lětsa budźe to zastanišćo při Cyrkwinskim naměsće w Rakecach.
Štóž bě sej myslił, zo je zyma hižo wotbyta, toho je wčera koza ...
Krótkopowěsće (18.03.21)
Widźomnje wjac natyknjenjow
Budyšin. Z wčera zwěsćenymi 78 koronainfekcijemi je sydomdnjowska incidenca w Budyskim wokrjesu na 115 rozrostła. Dwaj 78lětnaj pacientaj staj zemrěłoj, krajnoradny zarjad zdźěli. Wokrjes Zhorjelc registrowaše 111 dalšich natyknjenjow, pjeć smjertnych padow wot 22. februara do 10. měrca a incidencu 136,51. Techniskich problemow dla njeje Roberta Kochowy institut dźens dopołdnja žane ličby podał.
Pufrowe pasmo powjetšene
Budyšin. Rozšěrjaceje so afriskeje swinjaceje mrětwy dla je sakska krajna direkcija pufrowe pasmo zawrjeneje kónčiny powjetšiła. W Budyskim wokrjesu płaća z tym zwisowace rjadowanja za někotre wjesne dźěle gmejnow Wulka Dubrawa, Bukecy, Rakecy, Łaz, Malešecy, Radwor kaž tež za Sprjewiny Doł a město Wóspork, kaž krajnoradny zarjad zdźěli.
Mróčel na Marsu
Carport, ławki a nowa tafla
Za wobydlerski etat 160 namjetow z města Wojerec a wsow zapodali
Wojerecy (AK/SN). Za lětuši wobydlerski etat ma město Wojerecy znowa 70 000 eurow k dispoziciji. Z toho je 50 000 eurow za město same předwidźane, po 4 000 eurach dóstanu měšćanske dźěle Brětnja-Michałki, Němcy, Hórnikecy, Čorny Chołmc a Ćisk. Dohromady je minjene tydźenje 160 namjetow do radnicy dóšło. 86 poćahuje so na město. Z tamnymi 74 namjetami je so tele dny dźěłowa skupina zaběrała a rozsudźiła, kotre ideje do lisćiny za wothłosowanje přiwzać. Kaž čłon skupiny Olaf Dominik rozłoži, maja namjety w přisłušnosći města być, wone maja na dobro mnohich ludźi być a dyrbja tež zapłaćomne być.
Z awtom do kerkow a płotu
Dobropisy předawać započeli
Komuny spytaja swojim wobchodnikam dalokož móžno pomhać, zo bychu ćežki čas koronapandemije přetrali. W Kamjencu maja nětko dobropisy, kotrymž město swój dźěl přida.
Kamjenc (SN/MWj). Podobnje kaž Kulow a dalše komuny tež město Kamjenc wikowarjow, hosćencarjow a posłužbarjow podpěruje. Woni dźě su sobu najsylnišo wot wobmjezowanjow koronapandemije dla potrjecheni. Tohodla je Kamjenska měšćanska rada spočatk februara po swojich móžnosćach wobzamknyła, kak móhła předewzaćelam pomhać. Stać ma so to z dobropisami, kiž Lessingowe město zdźěla sobu płaći a kotrež móža wobydlerjo pola lokalnych předewzaćelow zaměnić.
Ličba dobropisow je na tysac wobmjezowana, rěka w nowinskej zdźělence radnicy. Zajimc móže sej tajki dobropis za 20 eurow kupić. Hač do 30. junija město kóždemu dobropisej dalše dźesać eurow přida, tak zo je cyłkownje 30 eurow hódny. Za tule hódnotu hodźa so potom twory abo posłužby pola wobdźělenych Kamjenskich wikowarjow kupić, kotřiž su so za tónle poskitk přizjewili.
Policija (17.03.21)
Paduch so sam přeradźił
Budyšin. Dokelž njeje lěpje na swoju móšeń kedźbował, je drje so 24lětny muž předwčerawšim po padustwje sam přeradźił. Wón bě dopołdnja w kupnicy na Budyskej Kamjentnej hasy wšelake twory spakosćił a na to ćeknył. Sobudźěłaćer drje spyta jeho zadźeržeć, cuzy pak so jemu wutorhny. Při tym zhubi swoju móšeń, w kotrejž bě mjez druhim personalny wupokaz. Tak je paduch policiji tójšto dźěła zalutował.
Takrjec nowych podružnikow ma wot njedawna Hórčanski Młynkec ...
Krótkopowěsće (17.03.21)
Incidenca zaso pod 100
Budyšin. Budyski wokrjes je wčera wo zwěsćenych dwanaće natyknjenjach z koronu informował. Ličba smjertnych padow rozrosće wo jedyn na 781. Strowotniski zarjad mjenowaše incidencu 109,33, RKI dźensa 83,4. Zhorjelski wokrjes rozprawješe wčera wo 71 nowoinfekcijach, wo dwěmaj smjertnymaj padomaj wot spočatka februara a wo incidency 119,20. RKI poda dźensa 97,3.
Chcedźa čěšćinu nawuknyć
Budyšin. Za lětnjej rěčnej kursaj čěšćiny w Praze a Českich Budějovicach je tuchwilu pjeć serbskich zajimcow. Štyrjo z nich měješe loni hižo připrajenje, jich kurs pak bě korony dla wupadnył. Tak chcedźa so lětsa wobdźělić. Jim přidruži so dalša požadarka, kaž Jadwiga Kaulfürstowa z Rěčneho centruma WITAJ zdźěli. Šesta wosoba ma tuchwilu status narunanskeje kandidatki.
Stela za Marju Grólmusec
