We Wojerowskim župnym domje dalše rěčne koło přewjedli

Wojerecy (SN/mwe). Dosć derje wopytane bě wčera popołdnju we Wojerowskim župnym domje Serbske rěčne koło, na kotrež běchu sej čłonojo předsydstwa župy „Handrij Zejler“ Towarstwo za hajenje regionalneje kultury srjedźneje Łužicy přeprosyli. W srjedźišću zarjadowanja steješe serbska narodna drasta w dohodownym času. Jako temu wuzwolichu sej organizatorojo „přaznu“, to rěka Wojerowsku zymsku dźěłansku drastu a drastu božeho dźěćatka.

Mjez zajimowanymi a wćipnymi hosćimi z Wojerec, z wokolnych wsow a Kulowa běchu předsyda Towarstwa za hajenje regionalneje kultury srjedźneje Łužicy Werner Bejma kaž tež čłonce Kirsten Bejmic a Renate Scharfowa, kotřiž jednotliwe dźěle drasty wěcywustojnje serbsce rozkładowachu. „Narodna drasta a maćeršćina słušatej hromadźe. Bjez serbskich wopřijećow njebudźe naša drasta wobstać móc. Tuž je nam wažne, zo w tymle zmysle na zarjadowanjach, kaž dźensa we wobłuku rěčneho koła, zhromadnje zwučujemy“, podšmórny regionalna rěčnica Wojerowskeje župy Christina Šołćina.