60 ludźi so na zarjadowanju iniciatiwy za Serbski sejm wobdźěliło

Budyšin (SN/CoR). Štož bě so wčera pod hesłom „Na demokratiju so zwažić: Serbski sejm – prěni parlament Serbow“ popołdnju z koncertom skupiny Berlinska dróha a z filmom „Hüter der Tundra“ před něhdźe połsta připosłucharjemi a přihladowarjemi w Budyskim Kamjentnym domje započało, je tež pjeć hodźin pozdźišo přeco hišće něhdźe 40 ludźi w mjeńšich diskusijnych kołach dale zaběrało. Zajim za Serbski sejm wobsteji, to je wčerawše zarjadowanje iniciatiwy za serbske ludowe zastupnistwo we wobłuku 1. Budyskich tydźenjow demokratije jasnje pokazało. Sylnje zastupjena bě młodźina mjez wjace hač 60 zajimcami, kotřiž so na hłownym zhromadnym forumje wobdźělichu. Tež zapósłanc Sakskeho krajneho sejma Hajko Kozel (Lěwica), Budyski wyši měšćanosta Alexander Ahrens (njestronjan) a přichodny direktor Załožby za serbski lud Jan Budar tam běchu. Wjele wuspěcha přeješe projektej Serbski sejm čłon Europskeje swobodneje aliancy Bernat Joan i Mari z Katalanskeje.